 |
ສະຫາຍ ຄຳພັນ ເຜີຍຍະວົງ ໄດ້ກ່າວເປີດກອງປະຊຸມຢ່າງເປັນທາງການ ແລະ ສະແດງຄວາມປິຕິຍິນດີ ຊົມເຊີມບັນດາສະຫາຍຄະນະປະຈຳ ແລະ ບັນດາສະຫາຍສະມາຊິກສະພາທິດສະດີສູນກາງພັກ ສະໄໝທີ III ທີ່ໄດ້ທຸ່ມເທເຫື່ອແຮງ, ສະຕິປັນຍາຂອງຕົນເຂົ້າໃນການຄົ້ນຄວ້າທິດສະດີການເມືອງ, ແນວຄິດທິດສະດີຂອງພັກ ແລະ ຄົ້ນຄວ້າວິທະຍາສາດສັງຄົມ ມີຜົນສໍາເລັດເປັນຢ່າງດີ. ຕະຫຼອດໄລຍະ 5 ປີ ຜ່ານມານີ້, ໂດຍໄດ້ຮັບການນໍາພາ-ຊີ້ນໍາ ຈາກກົມການເມືອງສູນກາງພັກ, ຄະນະເລຂາທິການສູນກາງພັກ ເຫັນວ່າ: ບັນ ດາວຽກງານຕ່າງໆຂອງສະພາທິດສະດີສູນກາງພັກ ແມ່ນໄດ້ຮັບການພັດທະນາຂຶ້ນເປັນກ້າວໆ ຖ້າທຽບໃສ່ໄລຍະຜ່ານມາ ຊຶ່ງມັນສະແດງອອກເປັນຕົ້ນແມ່ນບົດບາດຂອງສະພາທິດສະດີໄດ້ຮັບການຍົກສູງຂຶ້ນ ແລະ ໄດ້ຮັບຄວາມໄວ້ເນື້ອເຊື່ອໃຈຈາກສູນກາງພັກ ຊຶ່ງສະພາທິດສະດີສູນກາງພັກໄດ້ປະຕິບັດສໍາເລັດພາລະກິດອັນໃຫຍ່ຫຼວງທີ່ພັກໄດ້ມອບໝາຍ ເປັນຕົ້ນການຂຽນໂຄງການການເມືອງ ສະບັບທີ 3 ຂອງພັກ, ການສະຫຼຸບ 40 ປີແຫ່ງການປ່ຽນແປງໃໝ່ ຢູ່ ສປປ ລາວ, ການຄົ້ນຄວ້າທິດສະດີ-ພຶດຕິກຳ ແລະ ການຈັດກອງປະຊຸມສຳມະນາສອງພັກ ແລະ ວຽກງານອື່ນໆເຫັນວ່າມີຜົນສຳເລັດສູງ ແລະ ໄດ້ຮັບຄວາມຍ້ອງຍໍຊົມເຊີຍຈາກຂັ້ນເທິງໃນຖານະປະຕິບັດພາລະບົດບາດເປັນເສນາທິການໃຫ້ແກ່ພັກ; ໄດ້ເອົາໃຈໃສ່ປະຕິບັດໜ້າທີ່ວຽກງານໂດຍຢຶດໝັ້ນຫຼັກການນຳພາຂອງພັກ, ສອດຄ່ອງກັບລັດຖະທໍາມະນູນ ແລະ ລະບຽບກົດໝາຍ ຊຶ່ງເປັນການສະແດງເຖິງສະຕິຕື່ນຕົວທາງດ້ານການເມືອງ ແລະ ຄວາມຮັບຜິດຊອບສູງຂອງສະພາທິດສະດີສູນກາງພັກ ຕໍ່ກົມການເມືອງສູນກາງພັກ, ຄະນະເລຂາທິການສູນກາງພັກ.
ກອງປະຊຸມຄັ້ງນີ້ໄດ້ສຸມໃສ່ບາງບັນຫາຄື: ໜຶ່ງ: ໄດ້ຮັບຟັງລາຍງານການສະຫຼຸບຕີລາຄາຜົນການຈັດຕັ້ງເຄື່ອນໄຫວວຽກງານ ຂອງສະພາທິດສະດີສູນກາງພັກ ໄລຍະປີ 2021-2025 ແລະ ວາງທິດທາງແຜນການ ໄລຍະປີ 2026-2030; ສອງ: ຄົ້ນຄວ້າປະກອບຄໍາຄິດຄໍາເຫັນ ຕໍ່ບົດສະຫຼຸບຕີລາຄາຜົນການຈັດຕັ້ງເຄື່ອນໄຫວວຽກງານ ຂອງສະພາທິດສະດີສູນກາງພັກ ໄລຍະ 5 ປີຜ່ານມາ ແລະ ວາງທິດທາງແຜນການ 5 ປີ ໃນຕໍ່ໜ້າ (2026-2030); ສາມ: ຄົ້ນຄວ້າປະກອບຄວາມເຫັນໃສ່ບັນດານິຕິກໍາຂອງສະພາທິດສະດີສູນກາງພັກ ໃຫ້ສອດຄ່ອງກັບໜ້າທີ່ການເມືອງໃນໄລຍະໃໝ່; ສີ່: ແລກປ່ຽນບົດຮຽນຊຶ່ງກັນ ແລະ ກັນໃນການປະຕິບັດໜ້າທີ່ການເມືອງ ຂອງສະພາທິດສະດີສູນກາງພັກໃນໄລຍະຜ່ານມາ.
 |
ກອງປະຊຸມໄດ້ດຳເນີນດ້ວຍຜົນສໍາເລັດຢ່າງຈົບງາມ, ເພື່ອເປັນພື້ນຖານໃຫ້ແກ່ການເຄື່ອນໄຫວ ແລະ ຈັດຕັ້ງປະຕິບັດໜ້າທີ່ການເມືອງຂອງຕົນ, ບັນດາສະຫາຍຄະນະປະຈຳ, ບັນດາຄະນະກຳມະການດ້ານຕ່າງໆ ແລະ ຄະນະເລຂາທິການວິທະຍາສາດ, ບັນດາສະຫາຍສະມາຊິກສະພາທິດສະດີ ຈະຕ້ອງໄດ້ພ້ອມກັນຈັດຕັ້ງຜັນຂະຫຍາຍເນື້ອໃນຈິດໃຈຂອງກອງປະຊຸມໃນຄັ້ງນີ້ອອກເປັນແຜນການ, ແຜນງານອັນລະອຽດຂອງຕົນ ແລະ ຮ່ວມກັບການຈັດຕັ້ງພັກ-ລັດ ທັງສູນກາງ ແລະ ທ້ອງຖິ່ນ ເພື່ອພ້ອມກັນເຮັດສໍາເລັດວຽກງານ, ພ້ອມນີ້ກໍຕ້ອງໄດ້ປະສານສົມທົບກັບບັນດາພັກການເມືອງຂອງເພື່ອນມິດຍຸທະຍາດ, ເພື່ອນຮ່ວມອຸດົມການໃນການຄົ້ນຄວ້າທິດສະດີ-ພຶດຕິກຳ ແລະ ຕັ້ງໜ້າຈັດຕັ້ງເຄື່ອນໄຫວວຽກງານ ໄລຍະ 5 ປີ (2026-2030) ຂອງສະພາທິດສະດີສູນກາງພັກໃຫ້ມີຜົນສໍາເລັດໃໝ່ຍິ່ງຂຶ້ນ.
(ຂ່າວ-ພາບ: ສໍານານ)
ຄໍາເຫັນ