ສາທາ ຈະສຸມໃສ່ປັບປຸງສະຖານທີ່ບໍລິການສາທາລະນະສຸກ ການສະໜອງນໍ້າສະອາດ ແລະ ວິດຖ່າຍ

ທ່ານ ນາງ ໃບຄໍາ ຂັດທິຍະ ລັດຖະມົນຕີກະຊວງສາທາລະນະສຸກ ໄດ້ຊີ້ແຈງຕໍ່ການຊັກຖາມຂອງສະພາແຫ່ງຊາດ ກ່ຽວກັບວາລະແຫ່ງຊາດ ວ່າດ້ວຍການພັດທະນາຊົນນະບົດ ແລະ ແກ້ໄຂຄວາມທຸກຍາກ ໃນກອງປະ ຊຸມສະໄໝວິສາມັນ ເທື່ອທີ 1 ຂອງສະພາແຫ່ງຊາດ ຊຸດທີ X ໃນວັນທີ 8 ກໍລະກົດນີ້, ທີ່ສະພາແຫ່ງຊາດວ່າ: ການປະກອບສ່ວນເຂົ້າໃນການພັດທະນາຊົນນະບົດ ແລະ ລຶບລ້າງຄວາມທຸກຍາກ ກະຊວງສາທາລະນະສຸກ ຈະໄດ້ສຸມໃສ່ບັນດາວຽກງານຈຸດສຸມທີ່ເປັນບຸລິມະສິດ ໂດຍສະເພາະການປັບປຸງສະຖານທີ່ບໍລິການສາທາລະນະສຸກ ລວມທັງການສະໜອງນໍ້າສະອາດ ແລະ ວິດຖ່າຍ: ການປັບປຸງສະຖານທີ່ບໍລິການສາທາລະນະສຸກ ພວກເຮົາເຫັນວ່າ ສະຖານທີ່ບໍລິການສາທາລະນະສຸກຫຼາຍແຫ່ງຢູ່ຂັ້ນເມືອງ, ສຸກສາລາຍັງບໍ່ໄດ້ມາດຕະຖານ. ປັດຈຸບັນກະຊວງສາທາລະນະສຸກ ກໍາລັງປັບປຸງມາດຕະຖານຂອງໂຮງໝໍຕາແສງ ແລະ ສຸກສາລາ ເພື່ອເປັນບ່ອນອີງໃນການປັບ ປຸງຍົກລະດັບສະຖານທີ່ບໍລິການໃຫ້ໄດ້ມາດຕະຖານດີຂຶ້ນ ໄປຄຽງຄູ່ກັບການພັດທະນາເສດຖະກິດ-ສັງຄົມຢູ່ແຕ່ລະທ້ອງຖິ່ນ. ດ້ານການສະໜອງນໍ້າສະອາດ ແລະ ວິດຖ່າຍ: ມາຮອດປັດຈຸບັນ ປະຊາຊົນລາວບັນດາເຜົ່າໃນທົ່ວປະ ເທດສາມາດເຂົ້າເຖິງນໍ້າສະອາດ ແລະ ວິດຖ່າຍໄດ້ຫຼາຍກວ່າ 90% ແຕ່ເຫັນວ່າຍັງມີບາງບ່ອນ ບໍ່ສາມາດມີນໍ້າໃຊ້ຕະຫຼອດປີ ຍ້ອນຜົນກະທົບຈາກໄພພິບັດທຳມະຊາດເຊັ່ນ: ໄພແຫ້ງແລ້ງ ແລະ ນໍ້າຖ້ວມ, ກະຊວງສາທາລະນະສຸກຈະໄດ້ສຳຫຼວດ ແລະ ຂຶ້ນແຜນປັບປຸງຄືນ ເພື່ອຮັບປະກັນໃຫ້ປະຊາຊົນໃນທົ່ວປະເທດ ສາມາດເຂົ້າເຖິງການຊົມໃຊ້ນໍ້າ ແລະ ວິດຖ່າຍໄດ້ຢ່າງທົ່ວເຖິງ.

ການປັບປຸງການບໍລິການ: ເພື່ອຮັບປະກັນໃຫ້ປະຊາຊົນລາວບັນດາເຜົ່າ ສາມາດເຂົ້າເຖິງການບໍລິການສຸຂະພາບທີ່ມີຄຸນນະພາບຢ່າງທົ່ວເຖິງ ໂດຍສະເພາະຢູ່ເຂດຊົນນະບົດຫ່າງໄກສອກຫຼີກ, ກະຊວງສາທາລະນະສຸກ ຈະສືບຕໍ່ຊຸກຍູ້ການພັດທະນາຍົກລະດັບ ບັນດາໂຮງໝໍສູນກາງ ແລະ ໂຮງໝໍແຂວງໃຫ້ມີຄຸນນະພາບ, ທັນສະໄໝ ແລະ ເປັນເຈົ້າຕົນເອງຕາມທິດເສດຖະກິດເອກະລາດ ເປັນເຈົ້າຕົນເອງ (ສອຈ) ໄປພ້ອມກັບການສ້າງຄວາມເຂັ້ມ ແຂງຕາໜ່າງສາທາລະນະສຸກໄປສູ່ຊົນນະບົດ, ຊຸກຍູ້ພະນັກງານສາທາລະນະສຸກຢູ່ຂັ້ນເມືອງ, ສຸກສາລາ ສົມທົບອາສາສະໝັກບ້ານ (ອສບ) ໃນການເຮັດວຽກງານສຸຂະສຶກສາໃຫ້ຄວາມຮູ້ກ່ຽວກັບການຮັກສາສຸຂະພາບ, ກວດພະ ຍາດ ແລະ ບໍລິການປິ່ນປົວອາການເຈັບຢູ່ເຂດຫ່າງໄກສອກຫຼີກ ພ້ອມທັງສຸມໃສ່ສ້າງຄວາມເຂັ້ມແຂງການບໍລິການຢູ່ຂັ້ນພື້ນຖານ ດ້ວຍການອົບຮົມ ຍົກລະດັບຄະນະກຳມະການຮັກສາສຸຂະພາບຂັ້ນບ້ານ ແລະ ອສບ ເພື່ອເປັນຜູ້ເຮັດວຽກງານສຸຂະສຶກສາ ປຸກລະດົມປະຊາຊົນບັນດາເຜົ່າເຂົ້າຮັບການບໍລິການຮັກສາສຸຂະພາບຢູ່ສະຖານທີ່ບໍລິ ການ ກໍຄືການຮັບວັກຊິນກັນພະຍາດ, ການເກີດລູກມີແພດຊ່ວຍ ໄປພ້ອມກັບການສ້າງຄວາມເຂັ້ມແຂງລະບົບສົ່ງຕໍ່ຄົນເຈັບໄປຫາສະຖານທີ່ບໍລິການບ່ອນທີ່ມີເງື່ອນໄຂດີກວ່າ ໃນກໍລະນີອາການເຈັບໜັກ ແລະ ສຸກເສີນໃຫ້ທັນເວລາ.

ທ່ານ ນາງ ໃບຄໍາ ຂັດທິຍະ ກ່າວຕື່ມວ່າ: ໃນຕໍ່ໜ້າ, ເພື່ອປະກອບສ່ວນເຂົ້າໃນການພັດທະນາຊົນນະບົດ ແລະ ແກ້ໄຂຄວາມທຸກຍາກໃຫ້ໄດ້ຮັບຜົນດີ, ກະຊວງສາທາລະນະສຸກ ຈະໄດ້ສຸມໃສ່ຍົກລະດັບໃຫ້ປະຊາຊົນລາວບັນດາເຜົ່າມີສຸຂະພາບແຂງແຮງ, ມີສະພາບແວດລ້ອມທີ່ດີຕໍ່ການດໍາລົງຊີວິດ ແລະ ເຂົ້າເຖິງການບໍລິການດ້ານສາທາລະນະສຸກດ້ວຍການສຸມໃສ່ຈັດຕັ້ງປະຕິບັດ 14 ຕົວຊີ້ບອກ ທີ່ສະພາແຫ່ງຊາດຮັບຮອງໃຫ້ບັນລຸຕາມຄາດ ໝາຍທີ່ໄດ້ວາງໄວ້. (ຂ່າວ: ວັນເພັງ, ພາບ: ສໍານານ)