 |
ໃນປີ 2025 ສະຖາບັນເລືອດແຫ່ງຊາດ ໄດ້ຈັດກອງປະຊຸມວາງແຜນອອກຮັບບໍລິຈາກເລືອດຢູ່ນະຄອນຫຼວງວຽງຈັນ ແລະ ບັນດາແຂວງໃນທົ່ວປະເທດ ໂດຍສະເພາະແມ່ນຢູ່ນະຄອນຫຼວງວຽງຈັນ, ໄດ້ຈັດປະຊຸມວາງແຜນຮ່ວມກັບພາກສ່ວນການຈັດຕັ້ງຕ່າງໆເຊັ່ນ: ປກຊ-ປກສ, ກະຊວງ, ອົງການ, ມະຫາວິ ທະຍາໄລ, ມັດທະຍົມສົມບູນ, ພາກສ່ວນທຸລະກິດ, ໂຮງຈັກ-ໂຮງງານ, ປັບປຸງພື້ນຖານໂຄງລ່າງ ໂດຍໄດ້ສ້ອມແປງສູນເລືອດແຂວງ ຈໍານວນ 5 ແຂວງ ເພື່ອໃຫ້ເຮັດວຽກໄດ້ດີ, ໄດ້ສະໜອງອຸປະກອນການແພດ, ຄອມພີວເຕີ ຈຳນວນ 5 ໜ່ວຍ ໃຫ້ສູນເລືອດແຂວງ, ໄດ້ສະໜອງພາຫະນະຮັບໃຊ້ທາງດ້ານວິຊາການ 3 ຄັນ ປະກອບມີ: ລົດສຳລັບອົບຮົມ ແລະ ຊຸກຍູ້ຕິດຕາມ 1 ຄັນ ໃຫ້ສະຖາບັນເລືອດແຫ່ງຊາດ, ລົດຕູ້ຮັບບໍລິຈາກເລືອດ ໃຫ້ແກ່ແຂວງໄຊສົມບູນ 1 ຄັນ ແລະ ແຂວງເຊກອງ 1 ຄັນ, ໄດ້ສະໜອງຄອມພິວເຕີໃຫ້ 3 ແຂວງ ມີ: ຫຼວງພະບາງ, ໄຊຍະບູລີ ແລະ ແຂວງວຽງຈັນ ພ້ອມນັ້ນ ຍັງໄດ້ອົບຮົມແນະນໍາທາງດ້ານວິຊາການເພື່ອກະກຽມສອບເສັງເອົາໃບຢັ້ງຢືນຄຸນນະພາບຈາກສາກົນ ກໍຄື ຈາກໜ່ວຍງານສະມາຄົມຮັບປະກັນຄວາມປອດໄພຂອງເລືອດສາກົນ (AABB Certificate in Quality).
ນອກຈາກນັ້ນ, ທ່ານ ຈັນທະລາ ສຸກສາຄອນ ຍັງໄດ້ລາຍງານເພີ່ມຕື່ມວ່າ: ເລືອດແຕ່ລະຖົງໃນທົ່ວປະເທດແມ່ນໄດ້ຮັບການກວດວິເຄາະຢ່າງເປັນລະບົບໂດຍພະນັກງານວິຊາການທີ່ໄດ້ຮັບການຝຶກອົບ ຮົມ ທີ່ເປັນໄປຕາມມາດຕະຖານຂອງສະຖາບັນເລືອດແຫ່ງຊາດ, ການນໍາໃຊ້ສ່ວນປະກອບຂອງເລືອດ ໄດ້ເພີ່ມຂຶ້ນໃນທົ່ວປະເທດ ກວມເອົາ 93% ຂອງການນໍາໃຊ້ເລືອດທັງໝົດ, ໂດຍສະເພາະແມ່ນຢູ່ສູນກາງ 99%, ໄດ້ເຮັດການຝຶກອົບຮົມທາງດ້ານວິຊາການ, ການປຸກລະດົມບໍລິຈາກເລືອດ, ຄວາມປອດໄພຂອງເລືອດ ແລະ ການນໍາໃຊ້ເລືອດໃນລະດັບສູນກາງ ແລະ ລະດັບແຂວງ ມີຜູ້ເຂົ້າຮ່ວມຫຼາຍກວ່າ 150 ເທື່ອຄົນ, ໄດ້ມີການເຮັດການກວດສອບກັບທີ່ທາງດ້ານວິຊາການເພື່ອຊອກຮູ້ໄດ້ຄວາມສ່ຽງ ແລະ ແກ້ໄຂບັນດາຄວາມຜິດພາດ ຢູ່ສູນກາງ 2 ຄັ້ງ ແລະ ແຕ່ລະແຂວງ 1 ຄັ້ງ, ໄດ້ນໍາໃຊ້ຊ່ອງທາງການສື່ສານ ດ້ວຍຮູບການຕ່າງໆ ທັງໝົດ 3,636 ຄັ້ງ.
ພ້ອມນັ້ນ, ສະຖາບັນເລືອດແຫ່ງຊາດ ຍັງໄດ້ສ້າງຂະບວນການໃນວັນສຳຄັນຂອງພັກ-ຂອງຊາດແລະ ສາກົນອື່ນ ເຊັ່ນ: ຢູ່ນະຄອນຫຼວງວຽງຈັນ, ຈໍາປາສັກ, ຫຼວງພະບາງ, ສະຫວັນນະເຂດ ແລະ ແຕ່ລະແຂວງກໍໄດ້ຈັດຂຶ້ນເຊັ່ນດຽວກັນ, ໄດ້ຈັດກອງປະຊຸມ, ຈັດຝຶກອົບຮົມໃຫ້ຜູ້ປະສານງານ ຮ່ວມກັບ ບັນດາໂຮງຈັກ, ໂຮງງານ ແລະ ຫົວໜ່ວຍທຸລະກິດ ໂດຍມີຜູ້ບໍລິຈາກເລືອດໃນກຸ່ມເປົ້າໝາຍ ໃຫ້ເພີ່ມຂຶ້ນ 25% ທຽບຈາກປີ 2024, ຕົວຊີ້ວັດວຽກງານປຸກລະດົມບໍລິຈາກເລືອດໄດ້ຖືກບັນຈຸ ຢູ່ໃນແຜນພັດທະນາເສດຖະ ກິດ-ສັງຄົມ ຂອງສະພາແຫ່ງຊາດ, ງົບປະມານຈາກລັດຖະບານກໍໄດ້ມີການເພີ່ມຂຶ້ນໃນແຕ່ລະປີ ໄປ ພ້ອມໆກັບຈໍານວນຮັບບໍລິຈາກເລືອດເພີ່ມຂຶ້ນ, ໄດ້ສຸມໃສ່ຊຸກຍູ້ໃຫ້ແຂວງເພີ່ມທະວີການປຸກລະດົມບໍລິຈາກເລືອດໃຫ້ຫຼາຍຂຶ້ນ ໂດຍສະເພາະແຂວງທີ່ມີທ່າແຮງໃຫ້ສາມາດກຸ້ມຕົນເອງ ຄືແຂວງສະຫວັນນະເຂດ, ຈໍາປາສັກ, ຄໍາມ່ວນ ແລະ ສາລະວັນ, ອັດຕາສ່ວນໃນການໃຊ້ຈ່າຍທີ່ຈໍາເປັນທີ່ໄດ້ຮັບຈາກລັດຖະບານ ແລະ ການເກັບຄ່າຊົດເຊີຍເພີ່ມຂຶ້ນໂດຍກວມເອົາອັດຕາສ່ວນຂອງການໃຊ້ຈ່າຍທັງໝົດ. ສໍາຄັນໄປກວ່ານັ້ນ, ໄດ້ຈັດກອງປະຊຸມຄະນະກຳມະການສົ່ງເສີມການບໍລິຈາກເລືອດ ສົ່ງເລືອດແຫ່ງຊາດ ແລະ ໄດ້ຈັດກອງປະຊຸມຮ່ວມກັບພາກສ່ວນສາທາລະນະສຸກໃນການປ້ອງກັນ ແລະ ຄວບຄຸມພະຍາດທາລາດເຊເມຍ.
ດັ່ງນັ້ນ, ເພື່ອໃຫ້ບັນລຸຕາມແຜນທີ່ວາງໄວ້ ປວງຊົນທຸກໆພາກສ່ວນ ຕ້ອງໄດ້ໃຫ້ຄວາມຮ່ວມມື ໃນການບໍລິຈາກເລືອດແບບສະໝັກໃຈ ບໍ່ຮຽກຮ້ອງຄ່າຕອບແທນ ໃຫ້ຫຼາຍຂຶ້ນ ເພື່ອກອບກູ້ເອົາຊີວິດ ຂອງເພື່ອນມະນຸດດ້ວຍກັນ ໃຫ້ກັບຄືນມາມີຊີວິດ ໃນສັງຄົມ.
ຄໍາເຫັນ