ກອງບັນຊາການ ປກສ ແຂວງສະຫວັນນະເຂດ ຈັດພິທີສະເຫຼີມສະຫຼອງວັນແຫ່ງຊາດຕ້ານຢາເສບຕິດ ຄົບຮອບ 22 ປີ (12/10/2001-12/10/2023) ແລະ ທຳລາຍຢາເສບຕິດປະຈຳປີ 2023 ຂຶ້ນທີ່ສະໜາມກິລາຫຼັກ 4 ຂອງແຂວງ ໂດຍມີທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດ, ມີທ່ານ ນາງ ຫຼິງທອງ ແສງຕາວັນ ຮອງເຈົ້າແຂວງສະຫວັນນະເຂດ ທັງເປັນປະທານຄະນະກຳມະການກະກຽມສະເຫຼີມສະຫຼອງວັນແຫ່ງຊາດຕ້ານຢາເສບຕິດ ພ້ອມດ້ວຍ ຄະນະພັກ-ຄະນະບັນຊາ ປກຊ-ປກສ ແຂວງ, ພະແນກການກົມກອງອ້ອມຂ້າງແຂວງ ແລະ ຫຼາຍພາກເຂົ້າຮ່ວມ.
ທ່ານ ນາງ ຫຼິງທອງ ແສງຕາວັນ ໃຫ້ຮູ້ວ່າ: ພິທີຈູດທຳລາຍຢາເສບຕິດ ກໍເພື່ອເປັນການສະແດງເຖິງເຈດຈຳນົງ ແລະ ຄວາມໝາຍໝັ້ນຂອງສັງຄົມ ໃນການຮ່ວມມືກັນຕໍ່ສູ້ ແລະ ຕ້ານກັບບັນຫາຢາເສບຕິດ ຊຶ່ງເປັນໄພຄຸກຄາມຕໍ່ການພັດທະນາເສດຖະກິດ-ສັງຄົມ, ຄວາມເປັນລະບຽບຮຽບຮ້ອຍ, ຄວາມສະຫງົບ ແລະ ຄວາມໝັ້ນຄົງຂອງຊາດເຮົາ. ປີ 2021 ພັກ-ລັດຖະບານ ໄດ້ຍົກເອົາບັນຫາດັ່ງກ່າວ ມາເປັນວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໂດຍມີຈຸດປະສົງເປົ້າໝາຍ ກໍານົດເອົາ 3 ຫຼັກການຄື: ເດັດຂາດ, ໂປ່ງໃສ ແລະເປັນມືອາຊີບ ແລະ 6 ວຽກຈຸດສຸມ ເປັນຫຼັກການ, ມາດຕະການ ມາສະກັດກັ້ນ ແລະແກ້ໄຂບັນຫາຢາເສບຕິດ ໃຫ້ກາຍເປັນສະໜາມຮົບ ກໍ່ຄືເປັນໜ້າທີ່ການເມືອງອັນສູງສົ່ງຂອງທຸກພາກສ່ວນອົງການຈັດຕັ້ງສັງຄົມ ນຳໄປຈັດຕັ້ງປະຕິບັດຢ່າງແຂງແຮງ.
ຕະຫຼອດໄລຍະຂອງການຈັດຕັ້ງປະຕິບັດວາລະແຫ່ງຊາດ ໂດຍເລີ່ມຕົ້ນແຕ່ເດືອນ 8 ປີ 2021 ມາເຖິງປັດຈຸບັນ ເປັນເວລາ 797 ວັນ, ໂດຍການນຳຂັ້ນແຂວງ ກໍໄດ້ສຸມໃສ່ລົງເລິກນຳພາ-ຊີ້ນຳອຳນາດການປົກຄອງຂັ້ນເມືອງ ຕະຫຼອດຮອດອຳນາດການປົກຄອງຂັ້ນບ້ານ ແລະ ອຳນວຍຄວາມສະດວກດ້ານຕ່າງໆໃຫ້ແກ່ການເຄື່ອນໄຫວ, ພິເສດແມ່ນກຳລັງປ້ອງກັນຊາດ-ປ້ອງກັນຄວາມສະຫງົບຂັ້ນແຂວງ ກໍໄດ້ເປັນກຳລັງຫຼັກແຫຼ່ງ, ໃຈກາງໃນການແກ້ໄຂ ແລະ ປະສານງານກັບກະຊວງ, ກົມກອງວິຊາສະເພາະທີ່ກ່ຽວຂ້ອງຢ່າງເປັນລະບົບ, ບັນຫາທີ່ພົ້ນເດັ່ນ: ສາມາດແກ້ໄຂຄະດີຢາເສບຕິດໃນທົ່ວແຂວງໄດ້ 1.014 ລາຍ, ຜູ້ຖືກຫາ 1.545 ຄົນ ຍິງ 149 ຄົນ ສາມາດຢຶດຂອງກາງຢາບ້າ 8.452.500 ເມັດ, ຢາອີ 960 ເມັດ, ຢາເຄ 17 ຖົງ, ຢາໄອສ 365 ຖົງ, ເຮໂລອິນ 164 ແທ່ງ (ເທົ່າກັບ 61,50 ກິໂລກຣາມ), ກັນຊາແຫ້ງ 890 ກິໂລກຣາມ, ໃບກະທ້ອມ 46 ກິໂລກຣາມ, ກາເຟ (ປະສົມສານສິບຕິດ) 2.023 ຊອງ, ຢາດີໄອ 929 ກວດ, ບັ້ງແກັສ 3 ບັ້ງ, ປຸ່ມເປົ້າ 166 ໜ່ວຍ, ອາວຸດເສິກ 32 ກະບອກ, ອາວຸດລ່າເນື້ອ 40 ກະບອກ ແລະອື່ນໆ. ສ່ວນຂອງກາງຄະດີຢາເສບຕິດທີ່ສານຕັດສິນໃຊ້ໄດ້ເດັດແລ້ວ ທີ່ຈະນຳອອກມາທໍາລາຍໃນມື້ນີ້ມີ: ຢາບ້າ ຈຳນວນ 963.028 ເມັດ, ນໍ້າໜັກ 56.151 ກິໂລກຣາມ, ຢາໄອສ 8 ຖົງໃຫຍ່ 27 ຫຼອດ, ນ້ຳໜັກ 9.931 ກິໂລກຣາມ, ຢາອີ 57 ເມັດ ນ້ຳໜັກ 23 ກວ່າກຣາມ, ຄັນຊາແຫ້ງ 19 ແທ່ງ 6 ໂຄ້ນ ນໍ້າໜັກ 24.888 ກິໂລກຣາມ.
ຈາກນັ້ນ, ຄະນະການນຳຂັ້ນສູງຂອງແຂວງ ກໍໄດ້ຮ່ວມກັນຈູດທຳລາຍຢາເສບຕິດ ເພື່ອສະແດງເຈດຈຳນົງຢ່າງໜັກແໜ້ນ ວ່າຢາເສບຕິດຄືສັດຕູຂອງຊາດ ທີ່ຂັດຂວາງການພັດທະນາເສດຖະກິດ-ສັງຄົມ ແລະ ທຳລາຍອະນາຄົດລູກຫຼາຍຂອງພວກເຮົາ.
ຂ່າວ-ພາບ: ສະຫວັນນະເຂດ
ຄໍາເຫັນ