ສະຫວັນນະເຂດ ປາຖະກະຖາວັນສ້າງຕັ້ງອົງການກວດກາ ພັກ-ລັດ ແລະວັນຕ້ານການສໍ້ລາດບັງຫຼວງສາກົນ

ທ່ານ ແສນສັກ ພິມວົງສາ ໄດ້ຍົກໃຫ້ຮູ້ເຖິງມູນເຊື້ອວັນສ້າງຕັ້ງອົງການກວດກາພັກ-ລັດ ຄົບຮອບ 44 ປີ, ຊຶ່ງໃນຕະຫຼອດໄລຍະຜ່ານມາ, ວຽກງານກວດກາ ໄດ້ດຳເນີໄປຄຽງຄູ່ກັບວຽກງານກໍ່ສ້າງພັກ ທາງດ້ານການເມືອງ-ແນວຄິດ ແລະການຈັດຕັ້ງ, ພັກສາມາດຮັກສາໄດ້ບົດບາດເປັນແກນນຳທີ່ແໜ້ນແກນໃນລະບົບການເມືອງຢູ່ ສປປລາວ, ພັກເຮົາຍາມໃດ ກໍຖືສຳຄັນວຽກງານກວດກາພັກ-ລັດ, ນັບແຕ່ມື້ໄດ້ຮັບການສ້າງຕັ້ງເປັນຕົ້ນມາ,ພັກເຮົາ ໄດ້ຖືວຽກງານກວດກາພາຍໃນພັກ ເປັນໜຶ່ງໃນພາລະບົດບາດນໍາພາທີ່ຂາດບໍ່ໄດ້ ໂດຍຢຶດໝັ້ນທັດສະນະທີ່ວ່າ: ການນໍາພາຕ້ອງຕິດພັນກັບການກວດກາ, ຖ້າບໍ່ມີການກວດກາ ກໍເໝືອນບໍ່ມີການນໍາພາ; ພ້ອມນີ້ ທ່ານຍັງໄດ້ສືບຕໍ່ຍົກໃຫ້ເຫັນຜົນຮ້າຍຂອງການສໍ້ລາດບັງຫຼວງ, ຊຶ່ງແມ່ນອາຊະຍະກຳໜຶ່ງທີ່ເກີດຂຶ້ນໃນກົງຈັກການຈັດຕັ້ງຂອງລັດ, ເອກະຊົນ ແລະສັງຄົມ, ເປັນໄພອັນຕະລາຍທີ່ສົງຜົນກະທົບ ສ້າງຄວາມເສຍຫາຍ ແລະກົດໜວ່ງຖວງດຶງອັນຮ້າຍແຮງຕໍ່ການພັດທະນາເສດຖະກິດ-ສັງຄົມຂອງປະເທດຕ່າງໆ ບໍ່ວ່າຈະແມ່ນປະເທດນ້ອຍ ຫຼື ໃຫຍ່, ປະເທດທຸກຍາກ ຫຼື ຮັ່ງມີກໍຕາມ, ລ້ວນແຕ່ມີຜົນກະທົບເຊັ່ນດຽວກັນ, ການສໍ້ລາດບັງຫຼວງຍັງເປັນໄພຂົ່ມຂູ່ ແລະບັນທອນຕໍ່ສະຖຽນລະພາບທາງການເມືອງ, ປະສິດທິພາບໃນການເຄື່ອນໄຫວ, ຄວາມເຊື່ອໝັ້ນຕໍ່ສັງຄົມຕໍ່ອົງການອໍານາດລັດ ກໍຄືການຈັດຕັ້ງທຸກຂັ້ນຂອງລັດ ແລະສັງຄົມ, ພາໃຫ້ເກີດມີຄວາມບໍ່ສະຫງົບ, ຄວາມບໍ່ສະເໝີພາບ ແລະຄວາມບໍ່ຍຸຕິທຳໃນສັງຄົມ, ການສໍ້ລາດບັງຫຼວງສົ່ງຜົນກະທົບໂດຍກົງຕໍ່ລາຍໄດ້ຂອງຊາດ, ງົບປະມານໃນການພັດທະນາຂອງລັດ, ຕັດຮອນເອົາລາຍຮັບຂອງລວມໝູ່ ກໍຄືຂອງພົນລະເມືອງດ້ວຍຫຼາຍຮູບ, ຫຼາຍວິທີ ທີ່ເລິກແລບແນບນຽນ, ເຮັດໃຫ້ລັດ, ລວມໝູ່ ແລະພົນລະເມືອງເສຍຜົນປະໂຫຍດ ຫຼື ເສຍລາຍຮັບຈໍານວນບໍ່ໜ້ອຍ.

(ແຫຼ່ງຂ່າວ: ແຂວງສະຫວັນນະເຂດ)