ການນໍາເຂົ້າສິນຄ້າຈາກ ສະຫະລັດ ອາເມຣິກາ ໄປຍັງ ສະວິດ ເພີ່ມຂຶ້ນພຽງແຕ່ 5.5%, ສົ່ງຜົນໃຫ້ການຂາດດຸນການຄ້າຂອງສະຫະລັດ ອາເມຣິກາ ກັບ ສະວິດ ເພີ່ມຂຶ້ນເປັນ 3.3 ຕື້ຟຣັງ (ສະກຸນເງິນສະວິດ) (4.2 ຕື້ໂດລາ) ໃນເດືອນກັນຍາ, ເພີ່ມຂຶ້ນຈາກ 2.06 ຕື້ຟຣັງໃນເດືອນສິງຫາ ຊຶ່ງເປັນການຂາດດຸນທີ່ຫຼາຍທີ່ສຸດໃນປີນີ້.
ໂຕເລກດັ່ງກ່າວຖືເປັນຂໍ້ມູນທໍາອິດທີ່ສະແດງໃຫ້ເຫັນວ່າການຄ້າຂອງສະວິດສືບຕໍ່ໄຫຼວຽນຕະຫຼອດເດືອນ, ເຖິງແມ່ນວ່າ ທ່ານ ໂດໂນ ທຣໍາ ໄດ້ປະກາດອັດຕາພາສີສິນຄ້ານຳເຂົ້າຈາກສະວິດ 39% ໃນຕົ້ນເດືອນສິງຫາ.
ເຖິງຢ່າງໃດກໍ່ຕາມ, ມາດຕະການດັ່ງກ່າວຂອງທ່ານ ທຣໍາ ໄດ້ເຮັດໃຫ້ລັດຖະບານສະວິດຫຼຸດລະດັບການຄາດຄະເນການເຕີບໂຕຂອງເສດຖະກິດໃນປີໜ້າ. ໂດຍອັດຕາພາສີທີ່ ທ່ານ ທຣໍາ ວາງໄວ້ຕໍ່ສະວິດ ຖືເປັນອັດຕາພາສີສູງທີ່ສຸດໃນບັນດາປະເທດທີ່ພັດທະນາແລ້ວ ແລະ ສົ່ງຜົນກະທົບຕໍ່ຜະລິດຕະພັນຂອງສະວິດ ນັບຕັ້ງແຕ່ໂມງຈົນເຖິງເຄື່ອງຈັກ ແລະ ຊັອກໂກແລັດ. ນອກຈາກນີ້, ທ່ານ ທຣໍາ ຍັງໄດ້ປະກາດອັດຕາພາສີກ່ຽວກັບການນຳເຂົ້າຢາ ຊຶ່ງເປັນສິນຄ້າສົ່ງອອກທີ່ສໍາຄັນອີກປະເພດໜຶ່ງຂອງສະວິດ.
ທັງນີ້, ລັດຖະບານສະວິດສືບຕໍ່ເຈລະຈາກັບສະຫະລັດ ອາເມຣິກາ ເພື່ອຫຼຸດຜ່ອນອັດຕາພາສີ, ເຖິງແມ່ນວ່າໂອກາດຂອງຄວາມສໍາເລັດຍັງບໍ່ແນ່ນອນ. ໂດຍ ທ່ານ ໂຮເວີຣດ ລຸດນິກ ລັດຖະມົນຕີການຄ້າສະຫະລັດ ອາເມຣິກາ ກ່າວໃນເດືອນແລ້ວນີ້ວ່າ ສະຫະລັດ ອາເມຣິກາ ອາດຈະບັນລຸຂໍ້ຕົກລົງກັບສະວິດ, ແຕ່ບໍ່ມີສັນຍານຄວາມຄືບໜ້ານັບແຕ່ນັ້ນມາ.
ຄໍາເຫັນ