ສາຍການບິນຍີ່ປຸ່ນ ກຳໄລສຸດທິຫຼຸດລົງຫຼາຍກວ່າ 80%

ວິທະຍຸກະຈາຍສຽງຫວຽດນາມລາຍງານໃນວັນທີ 4 ສິງຫາ ຜ່ານມາວ່າ: ຕາມ​ຂໍ້​ມູນ​ຂອງ​ກົມ​ສະ​ຖິ​ຕິ (ກະ​ຊວງ​ການ​ເງິນ ຫວຽດ​ນາມ) ທີ່ປະ​ກາດ​ໃນ​ວັນ​ທີ 3 ສິງ​ຫາ​ ຜ່ານມາ, ຫວຽດ​ນາມ ຕ້ອນ​ຮັບ​ນັກທ່ອງ​ທ່ຽວ​ສາ​ກົນ 1.67 ລ້ານ​ເທື່ອ​ຄົນ​ໃນ​ເດືອນ​ກໍ​ລະ​ກົດ 2026, ເພີ່ມ​ຂຶ້ນ 6.6% ເມື່ອ​ທຽບ​ໃສ່​ໄລ​ຍະ​ດຽວ​ກັນ​ຂອງ​ປີ 2025. ໄລ່​ລວມ 7 ເດືອນ​ຕົ້ນ​ປີ 2026, ຈຳ​ນວນ​ນັກ​ທ່ອງ​ທ່ຽວ​ສາ​ກົນ​ບັນ​ລຸ​ເກືອບ 14 ລ້ານ​ເທື່ອ​ຄົນ, ເພີ່ມ​ຂຶ້ນ 13.8% ເມື່ອ​ທຽບ​ໃສ່​ໄລ​ຍະ​ດຽວ​ກັນ​ຂອງ​ປີ​ 2025.

ວິທະຍຸໂທລະພາບສູນກາງຈີນ (CMG) ລາຍງານວ່າ: ໃນວັນທີ 3 ສິງ​ຫາ ຜ່ານມາ, ກະຊວງການຕ່າງປະເທດ ສະຫະລັດ ອາເມຣິກາ ໄດ້ແຈ້ງຕໍ່ສະພາ ກ່ຽວກັບແຜນການປິດສະຖານທູດ ແ​ລະ ສະຖານກົງສູນ 5 ແຫ່ງຢູ່​ຕ່າງ​ປະ​ເທດ ລວມມີ: ສະຖານທູດ ທີ່ ນະຄອນເຊນຈອຈ ໃນເກຣີນາດາ, ສະຖານກົງສູນ ທີ່ ນະຄອນນະໂກຢະ ປະເທດຍີ່ປຸ່ນ, ສະຖານກົງສູນ ທີ່ນະຄອນເມດານ ປະເທດອິນໂດເນເຊຍ, ສຳນັກງານສາຂາຂອງສະຖານທູດ ທີ່ ນະຄອນດູອາລາ ປະເທດກາເ​ມີຣຸນ ແລະ ສະຖານກົງສູນ ທີ່ ນະຄອນວີນນີເປັກ ປະເທດການາດາ.

ຂ່າວຕ່າງປະເທດລາຍງານໃນວັນທີ 4 ສິງຫາ ຜ່ານມາວ່າ: ທ່ານ ລີແຈມຽງ ປະທານາທິບໍດີ ສ ເກົາຫຼີ ໄດ້ສັ່ງໃຫ້ອົງການທີ່ກ່ຽວຂ້ອງເລັ່ງການຊ່ວຍເຫຼືອປະຊາຊົນທີ່ໄດ້ຮັບຜົນກະທົບຈາກຄື້ນຄວາມຮ້ອນທີ່ຮ້າຍແຮງແບບບໍ່ເຄີຍມີມາກ່ອນ, ໂດຍເຕືອນວ່າສະພາບອາກາດທີ່ຮຸນແຮງກຳລັງເກີດຂຶ້ນເລື້ອຍໆ ແລະ ອາດຈະກາຍເປັນເລື່ອງປົກກະຕິ.

ວິທະຍຸໂທລະພາບສູນກາງຈີນ (CMG) ລາຍງານໃນວັນທີ 4 ສິງຫາ ຜ່ານມາວ່າ: ໂຕເລກຫຼ້າສຸດທີ່ກະຊວງອຸດສາຫະກຳ ແລະ ເຕັກໂນໂລຊີຂໍ້ມູນຂ່າວສານຈີນປະກາດສະແດງໃຫ້ເຫັນວ່າ, ໃນ 6 ເດືອນຕົ້ນປີນີ້ ອຸດສາຫະກຳບໍລິການຊັອຟແວ ແລະ ເຕັກໂນໂລຊີຂໍ້ມູນຂ່າວສານຂອງຈີນໄດ້ດຳເນີນໄປດ້ວຍດີ, ລາຍຮັບຈາກອຸດສາຫະກຳຊັອຟແວໄດ້ເພີ່ມຂຶ້ນ 9.5% ເມື່ອທຽບໃສ່ໄລຍະດຽວກັນຂອງປີ 2025.

ສຳນັກຂ່າວສານຊິນຮວາລາຍງານໃນວັນທີ 4 ສິງຫາ ຜ່ານມາວ່າ: ການພະຍາກອນອາກາດຫຼ້າສຸດຈາກສູນອຸຕຸນິຍົມວິທະຍາອາຊຽນ (ASMC) ຄາດຄະເນວ່າ, ອາຊີຕາເວັນອອກສ່ຽງໃຕ້ຈະປະເຊີນກັບສະພາບອາກາດທີ່ຮ້ອນ ແລະ ແຫ້ງແລ້ງຫຼາຍຂຶ້ນໃນເດືອນຂ້າງໜ້າ, ພ້ອມທັງມີຄວາມສ່ຽງເກີດໄຟໄໝ້ປ່າ ແລະ ໝອກຄວັນຂ້າມຊາຍແດນ, ຫຼັງຈາກປະກົດການແອວນີໂຢທີ່ຮຸນແຮງຂຶ້ນ ເຮັດໃຫ້ມີຝົນຕົກຫຼຸດລົງ.

ວິທະຍຸກະຈາຍສຽງຫວຽດນາມລາຍງານໃນວັນທີ 3 ສິງຫາ ຜ່ານມາວ່າ: ນັບແຕ່ວັນທີ 2 ສິງຫາ ເປັນຕົ້ນໄປ, ສະຫະພາບເອີຣົບ (ອີຢູ) ໄດ້ນຳໃຊ້ຂໍ້ກຳນົດໃໝ່ຢ່າງເປັນທາງການ ຮຽກຮ້ອງໃຫ້ບັນດາວິສາຫະກິດຕິດສະແຕມຢ່າງຈະແຈ້ງສຳລັບເນື້ອໃນທີ່ສ້າງຂຶ້ນໂດຍປັນຍາປະດິດ (AI), ເພື່ອຊ່ວຍໃຫ້ຜູ້ນຳໃຊ້ງ່າຍໃນການຈຳແນກລະຫວ່າງເນື້ອໃນແທ້ ແລະ ເນື້ອໃນສ້າງຂຶ້ນໂດຍ AI ຫຼື ດັດປັບ.

ສຳນັກຂ່າວສານຊິນຮວາລາຍງານໃນວັນທີ 2 ສິງຫາ ຜ່ານມາວ່າ: ທ່ານ ມິນ ອອງ ລາຍ ປະທານາທິບໍດີມຽນມາ ໄດ້ເຂົ້າຮ່ວມກອງປະຊຸມສະໄໝສາມັນຄັ້ງທີ 2 ຂອງລັດຖະສະພາສະຫະພາບຄັ້ງທີ 3 ໃນວັນທີ 31 ກໍລະກົດ ຜ່ານມາ ໄດ້ເປີດເຜີຍແຜນການທີ່ຈະເພີ່ມການລົງທຶນໃນຂະແໜງການສຶກສາ ເພື່ອສົ່ງເສີມການພັດທະນາການສຶກສາແຫ່ງຊາດ. ໂດຍລັດຖະບານມຽນມາຈະຈັດສັນງົບປະມານແຫ່ງຊາດ 6.92% ໃຫ້ແກ່ກະຊວງສຶກສາທິການໃນປີງົບປະມານ 2026-2027.

ວິທະຍຸໂທລະພາບສູນກາງຈີນ (CMG) ລາຍງານໃນວັນທີ 3 ສິງຫາ ຜ່ານມາວ່າ: ອີງ​ຕາມ​ຂໍ້​ມູນ​ຈາກກະຊວງອຸດສາຫະກຳ ແລະ ເຕັກໂນໂລຊີຂໍ້ມູນຂ່າວສານຈີນສະ​ແດງ​ໃຫ້​ເຫັນ​ວ່າ, 6 ເດືອນ​ຕົ້ນ​ປີ​ນີ້, ອຸດ​ສາ​ຫະ​ກຳ​ການ​ຜະ​ລິດ​ດ້ານ​ຂໍ້​ມູນ​ຂ່າວ​ສານ​ເອ​ເລັກ​ໂຕ​ຣ​ນິກ​ຂອງ​ຈີນໄດ້​ສືບ​ຕໍ່​ເລັ່ງ​ລັດ​ການ​ຜະ​ລິດ, ການ​ສົ່ງ​ອອກ​ມີ​ຄວາມ​ໝັ້ນ​ທ່ຽງ ແລະ​ ມີ​ທ່າ​ອ່ຽງທີ່​ດີ, ປະ​ສິດ​ທິ​ຜົນ​ສືບ​ຕໍ່​ເພີ່ມ​ຂຶ້ນ ແລະ ການ​ລົງ​ທຶນ​ໄດ້​ເພີ່ມ​ຂຶ້ນ​ຢ່າງ​ໝັ້ນ​ທ່ຽງ.

ສຳນັກຂ່າວສານຊິນຮວາລາຍງານໃນວັນທີ 3 ສິງຫາ ຜ່ານມາວ່າ: ສະຖາບັນຄົ້ນຄວ້າດາລາສາດ ແລະ ທໍລະນີຟີຊິກ ແຫ່ງຊາດເອຢິບ ໄດ້ລາຍງານເຫດການແຜ່ນດິນໄຫວທີ່ມີຄວາມແຮງ 5.5 ຣິກເຕີ ໃນເຂດພາກຕາເວັນອອກສຽງ ເໜືອຂອງເມືອງຊາຣມ ເອລ ຊີກ ໃນເວລາປະມານ 3:00 ໂມງເຊົ້າ ຂອງວັນທີ 3 ສິງຫາ ຜ່ານມາ (ຕາມເວລາທ້ອງຖິ່ນ). ໂດຍມີຈຸດສູນກາງຂອງແຜ່ນດິນໄຫວຕັ້ງຢູ່ເສັ້ນຂະໜານ 30.19 ອົງສາເໜືອ ແລະ ເສັ້ນແວງ 32.61 ອົງສາຕາເວັນອອກ, ມີຄວາມເລິກ 10 ກິໂລແມັດ.

ສຳນັກຂ່າວສານຊິນຮວາລາຍງານໃນວັນທີ 3 ສິງຫາ ຜ່ານມາວ່າ: ໂອເປັກພລັສ (OPEC+) ຫຼື ກຸ່ມພັນທະມິດ ຜູ້ສົ່ງອອກນ້ຳມັນຂອງ OPEC 7 ປະເທດ (ຊາອຸດິດ ອາຣັບບີ, ຣັດເຊຍ, ອີຣັກ, ກູເວດ, ກາຊັກສະຖານ, ອານເຊຣີ ແລະ ໂອມັນ) ໄດ້ຕົກລົງທີ່ຈະເພີ່ມເພດານການຜະລິດນ້ຳມັນໃນເດືອນກັນຍາ ອີກ 188,000 ບາເຣວຕໍ່ມື້ ຫຼັງຈາກກອງປະຊຸມເພື່ອທົບທວນສະຖານະການ ແລະ ທ່າອ່ຽງຂອງຕະຫຼາດໂລກ.