 |
ໃນ 10 ກວ່າປີຜ່ານມາ, ການທ່ອງທ່ຽວຂອງຈີນໄດ້ກ້າວເຂົ້າສູ່ເສັ້ນທາງທີ່ພັດທະນາຢ່າງວ່ອງໄວ, ມັນບໍ່ພຽງແຕ່ເປັນກິດຈະກຳພັກຜ່ອນຢ່ອນໃຈທີ່ທ່ຽວຊົມທິວທັດ ແລະ ຊີມອາຫານທີ່ແຊບຊ້ອຍເທົ່ານັ້ນ, ຍິ່ງກາຍເປັນກຳລັງສຳຄັນທີ່ຂັບເຄື່ອນເສດຖະກິດ ປັບປຸງຊີວິດການເປັນຢູ່ຂອງປະຊາຊົນ ແລະ ເຜີຍແຜ່ວັດທະນະທຳອີກດ້ວຍ. ຂໍ້ມູນສະຖິຕິສະແດງໃຫ້ເຫັນວ່າ, ນັບແຕ່ປີ 2012 ຮອດປີ 2025, ຈຳນວນນັກທ່ອງທ່ຽວພາຍໃນປະເທດຈີນໄດ້ເພີ່ມຂຶ້ນ 1.2 ເທົ່າ, ຄ່າໃຊ້ຈ່າຍໃນການທ່ອງທ່ຽວໄດ້ເພີ່ມຂຶ້ນ 1.77 ເທົ່າ. ປີ 2024, ອັດຕາສ່ວນຂອງມູນຄ່າເພີ່ມດ້ານການທ່ອງທ່ຽວ ແລະ ອຸດສາຫະກຳອ້ອມຂ້າງທີ່ກ່ຽວຂ້ອງໃນລວມຍອດ GDP ທົ່ວປະເທດຈີນບັນລຸເຖິງ 4.35%. ປີ 2026, ຄຳວ່າ “ປະເທດເຂັ້ມແຂງດ້ານການ ທ່ອງທ່ຽວ” ໄດ້ຖືກບັນທຶກເຂົ້າໃນແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ເປັນຄັ້ງທຳອິດ, ສະແດງໃຫ້ເຫັນວ່າ ອຸດສາຫະກຳການທ່ອງທ່ຽວຖືກຍົກຂຶ້ນສູ່ລະດັບຍຸດທະສາດສູງກວ່າເກົ່າ.
ຢູ່ປະເທດຈີນທ່ານຈະໄດ້ເຫັນວ່າ, ການທ່ອງທ່ຽວໄດ້ລື່ນກາຍ “ການແລ່ນເບິ່ງທິວທັດຢ່າງຟ້າວຟັ່ງ” ມາແຕ່ດົນແລ້ວ. ນັກທ່ອງທ່ຽວນັບມື້ນັບຫຼາຍໄດ້ໃສ່ຊຸດບູຮານຈີນທ່ຽວຊົມເມືອງບູຮານ, ຮຽນຮູ້ສີມືນຳຜູ້ສືບທອດມໍລະດົກວັດທະນະທຳນາມມະທຳ ຫຼື ວ່າເດີນທາງໄປຕົວເມືອງໃດໜຶ່ງຍ້ອນຮູບເງົາເລື່ອງໃດໜຶ່ງ ຫຼື ງານດົນຕີຄັ້ງໜຶ່ງ. ສຳລັບກິດຈະກຳສິລະປະວັດທະນະທຳ ແລະ ງານກິລາທີ່ເຂດຊົນນະບົດຈັດເອງ, ກໍກາຍເປັນຍີ່ຫໍ້ໃໝ່ດຶງດູດນັກທ່ອງທ່ຽວ. ການທ່ອງທ່ຽວປະຕິວັດ, ແລະ ການທ່ອງທ່ຽວແບບທັດສະນະສຶກສາກໍໄດ້ຮັບຄວາມນິຍົມຊົມຊອບເພີ່ມຂຶ້ນ, ນັກທ່ອງທ່ຽວສາມາດສຳຜັດກັບປະຫວັດສາດ ແລະ ໄດ້ຮັບກຳລັງທາງຈິດໃຈໃນການເດີນທາງ. ກົງກັນຂ້າມ, ສີສັນວັດທະນະທຳທີ່ອຸດົມສົມບູນເຮັດໃຫ້ການທ່ອງທ່ຽວໄດ້ສ້າງຄວາມປະທັບໃຈຫຼາຍກວ່າເກົ່າໃຫ້ແກ່ນັກທ່ອງທ່ຽວ.
ການເຊື່ອມໂຍງແບບນີ້ບໍ່ແມ່ນເກີດຂຶ້ນແບບທຳມະຊາດ, ແຕ່ມີການຊີ້ນຳທາງນະໂຍບາຍຢ່າງຊັດເຈນ. ຈີນໄດ້ສ້າງຕັ້ງກະຊວງວັດທະນະທຳ ແລະ ທ່ອງທ່ຽວ, ທັງໄດ້ວາງແຜນກ່ຽວກັບການເຊື່ອມໂຍງວັດທະນະທຳກັບການທ່ອງທ່ຽວໃນແຜນການ 5 ປີຫຼາຍສະບັບ. ຈາກຖ້ຳຫີນໂຫຼງເມີນທີ່ເປັນມໍລະດົກວັດທະນະທຳໂລກຮອດເມືອງບູຮານລີ້ຈ່ຽງແຂວງຢຸນນານ, ຜູ້ນຳຈີນເຄີຍເນັ້ນໜັກມາຫຼາຍເທື່ອວ່າ “ບຳລຸງສ້າງການທ່ອງທ່ຽວດ້ວຍວັດທະນະທຳ, ສ່ອງແສງວັດທະນະທຳດ້ວຍການທ່ອງທ່ຽວ”, ບຳລຸງສ້າງອຸດສາຫະກຳການທ່ອງທ່ຽວວັດທະນະທຳເປັນອຸດສາຫະກຳເສົາຄ້ຳ, ອຸດສາຫະກຳເພື່ອຊີວິດການເປັນຢູ່ຂອງປະຊາຊົນ ແລະ ອຸດສາຫະກຳທີ່ເພີ່ມພູນຄູນສ້າງຄວາມສຸກໃຫ້ແກ່ປະຊາຊົນ.
ປັດຈຸບັນ, ຈີນໄດ້ສ້າງຕະຫຼາດການທ່ອງທ່ຽວພາຍໃນປະເທດຂະໜາດໃຫຍ່ທີ່ສຸດຂອງທົ່ວໂລກ. ແຫຼ່ງທ່ອງທ່ຽວລະດັບ A ໃນທົ່ວປະເທດບັນລຸເຖິງ 16,500 ແຫ່ງ, ຣີສອດລະດັບຊາດ ຄຸ້ມຖະໜົນແບບພັກຜ່ອນຢ່ອນອາລົມ, ເຂດບໍລິໂພກຕອນຄ່ຳຫຼາຍກວ່າ 500 ແຫ່ງ. ໃນດ້ານການທ່ອງທ່ຽວຊົນນະບົດ, ມີບ້ານຊົນນະບົດ 19 ແຫ່ງໄດ້ຖືກອົງການທ່ອງທ່ຽວສະຫະປະຊາຊາດເລືອກເປັນ “ບ້ານທ່ອງທ່ຽວທີ່ດີທີ່ສຸດ”, ຊຶ່ງເປັນອັນດັບໜຶ່ງໃນໂລກ. ປີ 2025, ນັກທ່ອງທ່ຽວພາຍໃນປະເທດຈີນມີເຖິງ 6 ຕື້ 522 ລ້ານເທື່ອຄົນ, ຄ່າໃຊ້ຈ່າຍໃນການທ່ອງທ່ຽວບັນລຸເຖິງ 6,300 ຕື້ຢວນ; ນັກທ່ອງທ່ຽວຕ່າງປະເທດທີ່ເຂົ້າເມືອງຈີນຫຼາຍກວ່າ 150 ລ້ານເທື່ອຄົນ, ຄ່າໃຊ້ຈ່າຍຫຼາຍກວ່າ 130 ຕື້ໂດລາ, ເພີ່ມຂຶ້ນເກືອບ 40% ເມື່ອທຽບໃສ່ປີ 2024.
ໂດຍມຸ່ງໜ້າສູ່ອະນາຄົດ, ອຸດສາຫະກຳການທ່ອງທ່ຽວຂອງຈີນພວມສຸມຄວາມພະຍາຍາມກ້າວໄປສູ່ທິດທາງທີ່ຍົກສູງຄຸນນະພາບ ແລະ ປະສິດທິພາບ, ປັບປຸງຍົກລະດັບໃຫ້ສູງຂຶ້ນ. ພ້ອມກັນນັ້ນ, ຈີນໄດ້ອອກແຮງຍົກລະດັບຄວາມສະດວກສຳລັບນັກທ່ອງທ່ຽວຕ່າງປະເທດທີ່ເຂົ້າເມືອງຈີນ, ເຮັດໃຫ້ຄົນຕ່າງປະເທດສາມາດມາທ່ອງທ່ຽວຢູ່ຈີນຢ່າງສະດວກກວ່າເກົ່າ. ຄືດັ່ງຜູ້ນຳຈີນກ່າວວ່າ, ການທ່ອງທ່ຽວຕ້ອງ “ຮັບໃຊ້ຊີວິດການເປັນຢູ່ທີ່ດີງາມ, ຊຸກຍູ້ການພັດທະນາເສດຖະກິດ, ສ້າງບ້ານເມືອງແຫ່ງຈິດໃຈ, ສະແດງໃຫ້ເຫັນພາບພົດຂອງຈີນ ແລະ ເພີ່ມທະວີການແລກປ່ຽນດ້ານອະລິຍະທຳໃຫ້ດີກວ່າເກົ່າ”.
ບົດໂດຍ: ວິທະຍຸໂທລະພາບສູນກາງຈີນ (CMG)
ຄໍາເຫັນ