ໃນໂອກາດເຂົ້າຮ່ວມກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກປະຊາຊົນ ປະຕິວັດລາວ, ສະຫາຍ ເຫຼັກໄຫຼ ສີວິໄລ ກໍາມະການສູນກາງພັກ ເລຂາຄະນະບໍລິຫານງານພັກ ລັດຖະມົນຕີກະຊວງໂຍທາທິການ ແລະ ຂົນສົ່ງ (ຍທຂ) ໄດ້ໃຫ້ສຳພາດຕໍ່ສື່ມວນຊົນກ່ຽວກັບການຈັດຕັ້ງປະຕິບັດວຽກງານທາງລົດໄຟລາວ-ຈີນ ໃນວັນທີ 7 ມັງກອນຜ່ານມາວ່າ: ໃນໄລຍະຜ່ານມາ, ຂະແໜງ ຍທຂ ກໍຄືໂຄງການທາງລົດໄຟລາວ-ຈີນໄດ້ປະເຊີນກັບສິ່ງທ້າທາຍອັນໜັກໜ່ວງທີ່ບໍ່ເຄີຍມີມາກ່ອນ ເປັນຕົ້ນແມ່ນການແຜ່ລະບາດຂອງພະຍາດໂຄວິດ-19 ທີ່ສົ່ງຜົນກະທົບຕໍ່ການເຄື່ອນຍ້າຍ ແລະ ຂົນສົ່ງ, ວິກິດການທາງດ້ານເສດຖະກິດ-ການເງິນ ແລະ ບັນຫາເງິນເຟີ້, ສະ ພາວະຄ່າຄອງຊີບສູງ ແລະ ການຂາດແຄນນ້ຳມັນເຊື້ອໄຟໃນບາງໄລຍະ ເຖິງຢ່າງໃດກໍຕາມດ້ວຍຄວາມເດັດດ່ຽວຂອງລັດຖະບານ ແລະ ການຮ່ວມມືຢ່າງໃກ້ຊິດລະຫວ່າງລາວ-ຈີນ. ໂຄງການດັ່ງກ່າວ, ຍັງສາມາດດຳເນີນການ ແລະ ສ້າງຜົນປະໂຫຍດໄດ້ຢ່າງຕໍ່ເນື່ອງ. ນັບແຕ່ເລີ່ມເປີດບໍລິການທາງລົດໄຟລາວ-ຈີນ (ວັນທີ 3 ທັນວາ 2021) ປັດຈຸບັນໄດ້ສ້າງຕົວເລກສະຖິຕິທີ່ໜ້າປະທັບໃຈທັງສອງດ້ານຄື: ດ້ານການຂົນສົ່ງຜູ້ໂດຍສານ: ສະເພາະໃນ ສປປ ລາວຂົນສົ່ງຜູ້ໂດຍສານໄດ້ທັງໝົດ 12 ລ້ານເທື່ອຄົນ, ຕະຫຼອດເສັ້ນທາງ (ວຽງຈັນ-ຄຸນໝິງ) ຂົນສົ່ງໄດ້ສູງເຖິງ 62 ລ້ານເທື່ອຄົນ; ດ້ານການຂົນສົ່ງສິນຄ້າ: ສະເພາະໃນສປປ ລາວ ສາມາດລຳລຽງສິນຄ້າໄດ້ 16 ລ້ານໂຕນ, ຕະຫຼອດເສັ້ນທາງຕົວເລກການຂົນສົ່ງສິນຄ້າສູງເຖິງ 72 ລ້ານໂຕນ, ຊ່ວຍຫຼຸດຜ່ອນຕົ້ນທຶນ ແລະ ເວລາໃນການຂົນສົ່ງຢ່າງຫຼວງຫຼາຍ. ພ້ອມນັ້ນ, ດ້ານເສດຖະກິດ ແລະ ການທ່ອງທ່ຽວທາງລົດໄຟສາຍນີ້ໄດ້ກາຍເປັນແມ່ເຫຼັກດຶງດູດນັກທ່ອງທ່ຽວສາກົນເຂົ້າມາລາວໄດ້ເຖິງ 12,5 ລ້ານຄົນ, ສາມາດສ້າງລາຍຮັບເປັນເງິນຕາຕ່າງປະເທດເຂົ້າສູ່ລະບົບເສດຖະກິດໄດ້ກວ່າ 2,6 ຕື້ໂດລາ.
ສະຫາຍ ເຫຼັກໄຫຼ ສີວິໄລ ກ່າວຕື່ມວ່າ: ເພື່ອສືບຕໍ່ຂະຫຍາຍໝາກຜົນດັ່ງກ່າວ ລັດຖະບານໄດ້ວາງແຜນຍຸດທະສາດທີ່ຕັ້ງໜ້າໃນໄລຍະ 5 ປີຕໍ່ໜ້າ (2026-2030) ຄື: ນັກທ່ອງທ່ຽວສາກົນຕັ້ງເປົ້າໃຫ້ບັນລຸ 22 ລ້ານຄົນ, ຄາດຄະເນລາຍຮັບປະມານ 8 ຕື້ໂດລາ, ນັກທ່ອງທ່ຽວພາຍໃນສູ້ຊົນໃຫ້ໄດ້ 11 ລ້ານເທື່ອຄົນ, ຄາດຄະເນລາຍຮັບ 5 ຕື້ໂດລາ, ການຂະຫຍາຍໂຄງຂ່າຍ ແລະ ເຊື່ອມຕໍ່ພື້ນຖານໂຄງລ່າງ ຈະສືບຕໍ່ຍົກລະດັບການເຊື່ອມຕໍ່ລະຫວ່າງທາງລົດໄຟ ລາວ-ໄທ ແລະ ລາວ-ຈີນໃຫ້ມີຄວາມຄ່ອງຕົວ ແລະ ກາຍເປັນສູນກາງໂລຈິສຕິກຂອງພາກພື້ນ, ເສັ້ນທາງໃໝ່ຄາດວ່າຈະເລີ່ມລົງມືກໍ່ສ້າງທາງລົດໄຟລາວ-ຫວຽດນາມ (ໄລຍະແຂວງຄຳມ່ວນ ຫາ ຊາຍແດນຫວຽດນາມ) ໃນຕົ້ນປີນີ້ ແລະ ເລີ່ມສຶກສາຄວາມເປັນໄປໄດ້ໃນການສ້າງທາງລົດໄຟວຽງຈັນ-ປາກເຊ ເພື່ອເຊື່ອມຕໍ່ລົງສູ່ພາກໃຕ້.
ຄໍາເຫັນ