ບົດລາຍງານລະບຸວ່າ: ພື້ນຖານຂອງການເຊື່ອມໂຍງການຄ້າໃນອາຊີຍັງສືບຕໍ່ເຂັ້ມແຂງຂຶ້ນ, ໂດຍອ້າງອີງຂໍ້ມູນທີ່ສະແດງໃຫ້ເຫັນວ່າການເພິ່ງພາອາໄສການຄ້າພາຍໃນພາກພື້ນເພີ່ມຂຶ້ນເລັກນ້ອຍຈາກ 56.3% ໃນປີ 2023 ເປັນ 57.2% ໃນປີ 2024 ຍ້ອນວ່າເສດຖະກິດທີ່ສໍາຄັນໃນທົ່ວພາກພື້ນຫັນມາໃຫ້ຄວາມສໍາຄັນກັບສາຍພົວພັນທາງການຄ້າລະຫວ່າງກັນຫຼາຍຂຶ້ນ. ໃນຂະນະທີ່ຈີນ ແລະ ອາຊຽນຍັງຄົງໂດດເດັ່ນໃນຖານະທີ່ເປັນ "ເສົາຄ້ຳແຫ່ງສະຖຽນລະພາບ" ໃນພາກພື້ນ.
ເສດຖະກິດໃນພາກພື້ນອາຊີປາຊີຟິກກຳລັງຫັນປ່ຽນຈາກການເຊື່ອມໂຍງທີ່ແຕກແຍກພາຍໃນລະບົບຕ່ອງໂສ້ມູນຄ່າລະດັບໂລກໄປສູ່ການເຊື່ອມໂຍງພາກພື້ນທີ່ມີການແບ່ງປັນກັນຫຼາຍຂຶ້ນ. ໂດຍຫຼາຍປະເທດກຳລັງຍົກລະດັບລະບົບຕ່ອງໂສ້ມູນຄ່າໄປສູ່ລະດັບທີ່ສູງຂຶ້ນດ້ວຍການສະໜັບສະໜູນຈາກພາຍໃນພາກພື້ນ.
ພາກພື້ນດັ່ງກ່າວຍັງຄົງເປັນຈຸດໝາຍປາຍທາງອັນດັບໜຶ່ງຂອງໂລກສຳລັບການລົງທຶນໂດຍກົງຈາກຕ່າງປະເທດ, ໂດຍໄດ້ຮັບການຍອມຮັບໃນດ້ານຄວາມຍືດຍຸ່ນ, ທ່າແຮງການເຕີບໂຕ ແລະ ຄວາມດຶງດູດໃຈຂອງນັກລົງທຶນທົ່ວໂລກ, ໂດຍຈີນ ແລະ ອາຊຽນເປັນຜູ້ນຳໜ້າໃນຖານະເປັນຈຸດໝາຍປາຍທາງທີ່ໜ້າສົນໃຈທີ່ສຸດ.
ໃນດ້ານເຕັກໂນໂລຊີ, ບົດລາຍງານຊີ້ໃຫ້ເຫັນວ່າ: ສູນກາງການພັດທະນາປັນຍາປະດິດ (AI) ລະດັບໂລກກຳລັງຄ່ອຍໆປ່ຽນຈາກເອີຣົບ ແລະ ສະຫະລັດ ອາເມຣິກາ ໄປສູ່ອາຊີ. ເສດຖະກິດອາຊີກຳລັງພັດທະນາຢ່າງໄວວາຈາກຜູ້ຕິດຕາມໄປສູ່ຜູ້ນຳດ້ານ AI, ໂດຍການນຳໃຊ້ປະໂຫຍດຈາກຈຳນວນປະຊາກອນດີຈີຕອນຈຳນວນຫຼວງຫຼາຍ, ລະບົບນິເວດການນຳໃຊ້ທີ່ຫຼາກຫຼາຍ ແລະ ຂອບນະໂຍບາຍທີ່ສອດຄ່ອງກັນ.
ກອງປະຊຸມເວທີປຶກສາຫາລືອາຊີໂປອາວ, ສ້າງຕັ້ງຂຶ້ນໃນປີ 2001, ເປັນອົງການຈັດຕັ້ງທີ່ບໍ່ຂຶ້ນກັບລັດຖະບານ ແລະ ບໍ່ຫວັງຜົນກຳໄລ ຊຶ່ງມີຈຸດປະສົງເພື່ອສົ່ງເສີມການເຊື່ອມໂຍງເສດຖະກິດພາກພື້ນ ແລະ ນຳເອົາບັນດາປະເທດໃນອາຊີໃຫ້ເຂົ້າໃກ້ເປົ້າໝາຍການພັດທະນາຂອງຕົນຫຼາຍຂຶ້ນ. ກອງປະຊຸມໃນປີນີ້, ຈັດຂຶ້ນໃນວັນທີ 24-27 ມີນາ, ມີຫົວຂໍ້ວ່າ : "ການສ້າງອະນາຄົດຮ່ວມກັນ: ການເຄື່ອນໄຫວໃໝ່, ໂອກາດໃໝ່, ການຮ່ວມມືໃໝ່."
ຄໍາເຫັນ