ສັງເກດການປ່ຽນແປງລາຄາສິນຄ້າເດືອນພຶດສະພາ2025ທຽບກັບເດືອນເມສາ2025ລາຄາສິນຄ້າຍັງສືບຕໍ່ເພີ່ມຂຶ້ນ. ໃນນີ້, ໝວດສຸຂະພາບແລະຢາເພີ່ມຂຶ້ນ1,7%; ໝວດສະບຽງອາຫານແລະເຄື່ອງດື່ມທີ່ບໍ່ແມ່ນເຫຼົ້າເພີ່ມຂຶ້ນ0,6%ພົ້ນເດັ່ນ ປະເພດຊີ້ນເພີ່ມຂຶ້ນ1,2%;ໝວດສິນຄ້າແລະການບໍລິການອື່ນໆເພີ່ມຂຶ້ນ2,8% ພົ້ນເດັ່ນກຸ່ມວັດຖຸມີຄ່າເພີ່ມຂຶ້ນ4,7%ເຊິ່ງລາຄາຄໍາຟຸ່ງຂຶ້ນ5,5%;
ທ່ານຫົວໜ້າຫ້ອງການ ທຫລ ໄດ້ເປີດເຜີຍ ວ່າ: ໃນໄລຍະເດືອນເມສາ 2025ເປັນຕົ້ນ ການຄຸ້ມຄອງອັດຕາແລກປ່ຽນແລະຄຸ້ມຄອງເງິນຕາຕ່າງປະເທດ; ທຫລ ສືບຕໍ່ປະຕິບັດນະໂຍບາຍອັດຕາແລກປ່ຽນຕາມກົນໄກຕະຫຼາດທີ່ມີການຄຸ້ມຄອງຂອງລັດຢູ່ໃນຂອບບໍ່ເກີນ±6.5% ທຽບໃສ່ອັດຕາແລກປ່ຽນອ້າງອີງແລະສືບຕໍ່ເກັບຊື້ເງິນຕາຕ່າງປະເທດຈາກພາກສ່ວນຕ່າງໆໂດຍສະເພາະຜູ້ສົ່ງອອກແລະຜູ້ລົງທຶນໂດຍກົງຈາກຕ່າງປະເທດເພື່ອສ້າງຄວາມເຂັ້ມແຂງໃຫ້ຄັງສຳຮອງເງິນຕາຕ່າງປະເທດແລະຮອງຮັບໃຫ້ການດັດສົມສິນຄ້າບູລິມະສິດຈໍາເປັນຊຶ່ງມາຮອດທ້າຍເດືອນເມສາ2025ຄັງສຳຮອງເງິນຕາຕ່າງປະເທດທີ່ຢູ່ພາຍໃຕ້ການຄຸ້ມຄອງຂອງທຫລສາມາດກຸ້ມການນໍາເຂົ້າໄດ້4.53ເດືອນ;
ມາຮອດທ້າຍເດືອນເມສາ 2025 ໄດ້ມີບໍລິສັດມາຂໍອະນຸຍາດນໍາໃຊ້ເງິນຕາຕ່າງປະເທດ ຈໍານວນ 07 ບໍລິສັດ, ໃນນັ້ນ ບໍລິສັດທີ່ໄດ້ຮັບອະນຸຍາດໃຫ້ນໍາໃຊ້ເງິນຕາຕ່າງປະເທດ ມີ05ບໍລິສັດ;ທຫລ ໄດ້ອອກໜັງສືຢັ້ງຢືນເພື່ອເປີດບັນຊີເງິນຝາກສະເພາະກ່ຽວກັບການນໍາເຂົ້າ-ສົ່ງອອກໃຫ້ບໍລິສັດນໍາເຂົ້າ-ສົ່ງອອກຈຳນວນ5,277ບໍລິສັດ, ໃນນີ້ມີ 3,429ເທື່ອບໍລິສັດ ໄດ້ເປີດ ແລະ ຫັນບັນຊີສະເພາະທັງໝົດ 10,308ບັນຊີ ຢູ່29 ທະນາຄານ; ພ້ອມດຽວກັນນີ້, ຍັງໄດ້ປະສານສົມທົບກັບເຈົ້າໜ້າທີ່ທີ່ກ່ຽວຂ້ອງ ກວດກາກັບທີ່ບັນດາຮ້ານຂາຍເຄື່ອງວັດສະດຸກໍ່ສ້າງ ແລະຮ້ານແລກປ່ຽນເງິນຕາທີ່ບໍ່ໄດ້ຮັບອະນຸຍາດ ຢູ່ ນະຄອນຫຼວງວຽງຈັນ.
ກ່ຽວກັບການຄຸ້ມຄອງທະນາຄານທຸລະກິດ (ທທກ) ໂດຍສະເພາະທະນາຄານຄໍາໄດ້ໃຫ້ບໍລິການລູກຄ້າຫຼາກຫຼາຍຜະລິດຕະພັນ ເຊັ່ນ: ການຮັບຝາກຄໍາ, ການຮັບຝາກເງິນບັນຊີກະແສລາຍວັນ, ການບໍລິການຊື້-ຂາຍຄໍາ ຜ່ານເຄົາເຕີ ແລະຕູ້ຈຳໜ່າຍວັດຖຸມີຄ່າອັດຕະໂນມັດ,ການຢັ້ງຢືນຄຸນນະພາບຄໍາ ບໍລິການເກັບຮັກສາວັດຖຸມີຄ່າ.ສຳລັບບັນຊີການຮັບຝາກຄໍາຈາກລູກຄ້າ ທັງໝົດ 1,821ບັນຊີ.
ສໍາລັບ ການຈັດຕັ້ງປະຕິບັດ 2 ນະໂຍບາຍສິນເຊື່ອ:ມາຮອດວັນທີ 18 ເມສາ 2025ນະໂຍບາຍສິນເຊື່ອເພື່ອກະຕຸ້ນເສດຖະກິດ: ໄດ້ຄົ້ນຄວ້າອະນຸມັດໃຫ້47ຫົວໜ່ວຍເຂົ້າຮັບນະໂຍບາຍດັ່ງກ່າວລວມວົງເງິນ ທີ່ເປັນແຫຼ່ງທຶນຂອງ ທທກ ຈຳນວນ4,652.20ຕື້ກີບ.ທຫລ ໄດ້ຊໍາລະດອກເບ້ຍສົມທົບງວດເດືອນພະຈິກ 2023-ກຸມພາ 2025 ໃຫ້ 44 ຫົວໜ່ວຍ ລວມວົງເງິນສົມທົບທັງໝົດ 68.60ຕື້ກີບ ຊຶ່ງກວມ 2.74% ຂອງແຜນປີ 2025. ນະໂຍບາຍສິນເຊື່ອເພື່ອກະຈາຍແຫຼ່ງທຶນສູ່ທ້ອງຖິ່ນ: ມີ 767ຫົວໜ່ວຍທຸລະກິດໄດ້ຮັບນະໂຍບາຍດັ່ງກ່າວ ລວມວົງເງິນ 1,420.48 ຕື້ກີບ, ແຕ່ການເບີກຖອນເງິນກູ້ຕົວຈິງ ມີ 1,247.26ຕື້ກີບ ກວມ87.81%ຂອງວົງເງິນອະນຸມັດທັງໝົດ.
ທຫລ ຍັງສຸມໃສ່ຮັກສາສະຖຽນລະພາບທາງດ້ານລາຄາ ກໍ່ຄືອັດຕາເງິນເຟີ້ໂດຍໄດ້ຄົ້ນຄວ້າ ແລະນໍາໃຊ້ບັນດາເຄື່ອງມືນະໂຍບາຍເງິນຕາ ເພື່ອຄວບຄຸມປະລິມານເງິນM2ໃຫ້ຢູ່ໃນລະດັບທີ່ແທດເໝາະກັບສະພາບເສດຖະກິດ,ສະແດງອອກຄື:
1) ສືບຕໍ່ຮັກສາອັດຕາດອກເບ້ຍພື້ນຖານຂອງ ທຫລ ສະກຸນເງິນກີບ ໄລຍະບໍ່ເກີນ 07 ວັນ ໄວ້ໃນລະດັບເດີມຄື10% ຕໍ່ປີ,ຮັກສາອັດຕາສ່ວນເງິນແຮຝາກບັງຄັບໄວ້ໃນລະດັັບເດີມຄືສະກຸນເງິນກີບລະດັບ8% ແລະ ສະກຸນເງິນຕາຕ່າງປະເທດຢູ່ລະດັບ11%;ຮັກສາໂຄງປະກອບເງິນແຮຝາກບັງຄັບສະກຸນເງິນກີບ ທີ່ເປັນພັນທະບັດ ຢູ່ລະດັບເດີມຄື10%;
2) ໄດ້ຊຸກຍູ້ຕະຫຼາດເປີດໃຫ້ມີການເຄື່ອນໄຫວຫຼາຍຂຶ້ນໂດຍສືບຕໍ່ການອອກພັນທະບັດທຫລໄລຍະ07ວັນ, 03ເດືອນແລະ06ເດືອນເພື່ອດັດປັບສະພາບຄ່ອງສ່ວນເກີນຂອງ ທທກດ້ວຍກົນໄກປະມູນເຮັດໃຫ້ຍອດເຫຼືອປະຈຸບັນມີທັງໝົດ7,695.15ຕື້ກີບ;
3) ກະກຽມເງື່ອນໄຂໃນການອອກນະໂຍບາຍຍົກສູງບົດບາດຂອງເງິນກີບໃນລະບົບເສດຖະກິດ-ເງິນຕາ ຕາມທິດຊີ້ນຳຂອງຂັ້ນເທິງ.
ເພື່ອສືບຕໍ່ຈັດຕັ້ງປະຕິບັດໜ້າທີ່ການເມືອງຂອງ ທຫລ ໃນເດືອນພຶດສະພາ2025, ທຫລ ຈະສຸມໃສ່ບາງໜ້າວຽກຈຸດສຸມຂອງຕົນຄື:
1. ສືບຕໍ່ດໍາເນີນນະໂຍບາຍເງິນຕາແບບປະສົມປະສານ ໄປຄຽງຄູ່ກັບການປະເມີນການຈັດຕັ້ງບັນດາເຄື່ອງມືນະໂຍບາຍເງິນຕາ ເພື່ອກໍານົດທິດທາງການຈັດຕັ້ງປະຕິບັດນະໂຍບາຍເງິນຕາໃນແຕ່ລະໄລຍະໃຫ້ແທດເໝາະກັບສະພາບຕົວຈິງ; ສືບຕໍ່ອອກແລະຈໍາໜ່າຍພັນທະບັດທຫລໄລຍະສັ້ນ ສະກຸນເງິນກີບ ດ້ວຍກົນໄກການປະມູນ; ສືບຕໍ່ຈັດຕັ້ງປະຕິບັດການລວມສູນບັນຊີເງິນຝາກຂອງລັດຖະບານຢູ່ທຫລ ແລະກະກຽມຈັດຕັ້ງປະຕິບັດການຈ່າຍດອກເບ້ຍໃຫ້ລັດຖະບານບ້ວງລວມສູນບັນຊີເງິນຝາກ (TSA);
- ກະກຽມກອງປະຊຸມຄະນະກຳມະການນະໂຍບາຍເງິນຕາຂອງ ທຫລ ຄັ້ງທີII ປີ 2025,ໃນນີ້ ຈະທົບທວນຄືນການຈັດຕັ້ງນະໂຍບາຍເງິນຕາ ແລະ ທິດທາງການດຳເນີນໃນຕໍ່ໜ້າເຊັ່ນ: ອັດຕາດອກເບ້ຍພື້ນຖານຂອງ ທຫລ, ການກຳນົດໂຄງປະກອບຂອງເງິນແຮຝາກບັງຄັບ;
- ສືບຕໍ່ປະຕິບັດນະໂຍບາຍອັດຕາແລກປ່ຽນຕາມກົນໄກຕະຫຼາດ ທີ່ມີການຄຸ້ມຄອງຂອງລັດ ດ້ວຍການກຳນົດອັດຕາອ້າງອີງໃຫ້ມີຄວາມຍືດຍຸ່ນ,ພ້ອມທັງຄົ້ນຄວ້າອັດຕາແລກປ່ຽນສໍາລັບການບໍລິການອັດຕາແລກປ່ຽນຂອງ ທຫລ, ທທກ ແລະຕະຫຼາດແລກປ່ຽນເງິນຕາຕ່າງປະເທດ ແລະສືບຕໍ່ຕິດຕາມການຊື້-ຂາຍ ເງິນຕາຕ່າງປະເທດຜ່ານບົບຕະຫຼາດແລກປ່ຽນເງິນຕາຕ່າງປະເທດ (ຕລຕ) ສໍາລັບບຸກຄົນແລະສໍາລັບນິຕິບຸກຄົນ;
- ກະກຽມກວດກາກັບທີ່ກ່ຽວກັບການເປີດ/ຫັນບັນຊີສະເພາະກ່ຽວກັບການນໍາເຂົ້າ-ສົ່ງອອກແລະບັນຊີສະເພາະກ່ຽວກັບການລົງທຶນ, ພ້ອມທັງການເກັບຊື້ເງິນຕາຕ່າງປະເທດ ແລະອັດຕາແລກປ່ຽນຢູ່ ທທກ;
2. ການຈັດຕັ້ງປະຕິບັດ 2ນະໂຍບາຍສິນເຊື່ອ: ຄົ້ນຄວ້າການສະເໜີຂອງຫົວໜ່ວຍທຸລະກິດຈໍານວນໜຶ່ງ ເພື່ອເຂົ້າຮັບນະໂຍບາຍສິນເຊື່ອ ເພື່ອກະຕຸ້ນເສດຖະກິດ ແລະນະໂຍບາຍສິນເຊື່ອ ກະຈາຍແຫຼ່ງທຶນສູ່ທ້ອງຖິ່ນໃຫ້ບັນລຸຕາມຄາດໝາຍແຜນການ.
ທ່ານ ຫົວໜ້າຫ້ອງການ ທຫລ ພານຸສັກແກ່ນວົງພະຈັນ ຍັງຂໍຝາກເຖິງບັນດາທ່ານທີ່ນໍາໃຊ້ສື່ສັງຄົມອອນລາຍວ່າ:ການຕົວະຍົວະຫຼອກລວງເອົາເລກບັນຊີ ຫຼື QR ທີ່ເປັນບັນຊີແອບແຝງເພື່ອໃຫ້ໂອນເງິນຜິດ ແລະ ແອບອ້າງເປັນການຈັດຕັ້ງຊ່ວຍເຫຼືອສັງຄົມໃດໜຶ່ງ ດ້ວຍການເອົາເລກບັນຊີ ຫຼື QR ຕົນເອງຮັບເງິນດັ່ງກ່າວຈາກສັງຄົມ ເຮັດໃຫ້ສ້າງຄວາມເສຍຫາຍທາງດ້ານຊັບສິນເງິນຄໍາເປັນຈໍານວນຫຼວງຫຼາຍ. ນອກຈາກນີ້, ຍັງມີກຸ່ມຄົນທີ່ບໍ່ດີສ້າງຂ່າວປັ່ນປ່ວນ ແລະໄດ້ໂພສຮູບພາບດ້ວຍການຕັດຕໍ່ດັດແປງຮູບພາບທະນະບັດປະເພດໃບ 100,000ກີບມາເປັນທະນະບັດປະເພດໃບ 500,000 ກີບ ວ່າ ທຫລ ຈະພິມໃບເງິນດັ່ງກ່າວ ຊຶ່ງຂ່າວດັ່ງກ່າວແມ່ນບໍ່ມີຄວາມຈິງ;
# ໂດຍ: ຣັດສະໝີ ດວງສັດຈະ
ຄໍາເຫັນ