ເສດຖະກີດເມືອງພຽງ ດີຂຶ້ນເປັນລໍາດັບ

ໂດຍ:ວັນໄຊ ຕະວິນຍານ
ເມືອງພຽງ ແຂວງໄຊຍະບູລີ ຂຶ້ນຊື່ລືຊາເປັນເມືອງ ອູ່ເຂົ້າອູ່ປາທົ່ງນາກວ້າງ ຮວງເຂົ້າໃຫ່ຍ ປ່າໄມ້ດົກໜາແຕ້ຄ່າພັນປີ ວັດທະນະທໍາຫຼາຍສີສັນ ປະຊາຊົນດຸໜັ່ນ. ຍ້ອນພື້ນທີ່ສວນໃຫ່ຍເປັນທົ່ງພຽງ ເໜາະສົມກັບການຜະລິກະສິກໍາ ໂດຍສະເພາະ ເປັນທົ່ງນາປູກເຂົ້າ, ມັນຕົ້ນ, ສາລີ, ພືດລົ້ມລຸກປະເພດຕ່າງໆ ທີ່ມີເນື້ອທີ່ລຽບຕາມແຄມທາງ.ສະເພາະຜົນຜະລິດເຂົ້າໃນແຕ່ລະປີ ສາມາດສະໜອງຄວາມຕ້ອງການຢູ່ພາຍໃນແຂວງ, ຕ່າງແຂວງ ກວມອັດຕາສ່ວນປະມານ 30%. ນອກຈາກນັ້ນ, ຍັງເປັນເມືອງສະໜອງພືດພັກຕ່າງໆນາໆໃຫ້ເມືອງອອ້ມຂ້າງແຂວງ ແລະ ພືດຊະນິດຕ່າງໆສົ່ງອອກໄປຕ່າງປະເທດນໍາອີກ.
ສະຫາຍ ເສີດ ແສງສຸລີນ ເຈົ້າເມືອງໆພຽງ ກ່າວວ່າ: ໃນໄລຍະ ປີ 2023 ຜ່ານມາ, ຄະນະບໍລິຫານງານພັກເມືອງໄດ້ພະຍາຍາມສຸມທຸກສະຕິປັນຍາ ເພື່ອຜັນຂະຫຍາຍຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ VIII ຂອງອົງຄະນະພັກເມືອງໂດຍຫັນເປັນໂຄງການດໍາເນີນງານ, ແຜນການອັນລະອຽດສູ່ແຕ່ລະຂົງເຂດ, ຂະແໜງການ.ຜ່ານການຈັດຕັ້ງປະຕິບັດຕົວຈິງ ສາມາດສັງລວມໄດ້ຜົນສໍາເລັດທີ່ພົ້ນເດັ່ນ ເປັນຕົ້ນເສດຖະກິດໂດຍລວມຂອງເມືອງ ຂະຫຍາຍຕົວສະເລ່ຍ 6,7% ຕໍ່ປີ; ລວມຍອດລາຍຮັບພາຍໃນເມືອງທັງໝົດ 1.762,44 ຕື້ກີບ ສະເລ່ຍໃສ່ຫົວຄົນໜຶ່ງໄດ້ 26,73 ລ້ານກີບຕໍ່ຄົນຕໍ່ປີ. ໃນນັ້ນ, ດ້ານກະສິກໍາ-ປ່າໄມ້ເພີ່ມຂຶ້ນ 8% ເທົ່າກັບ 519,7 ຕື້ກີບ ກວມເອົາ 30%. ດ້ານອຸດສາຫະກໍາ-ຫັດຖະກໍາ ເພີ່ມຂຶ້ນ 18% ເທົ່າກັບ 414,31 ຕື້ກີບ ກວມເອົາ 25%. ດ້ານບໍລິການ-ການຄ້າ ເພີ່ມຂຶ້ນ 10% ເທົ່າກັບ 792,43 ຕື້ກີບ ກວມເອົາ 45%. ດ້ານກະສິກໍາ ແລະ ປ່າໄມ້ ໃນປີຜ່ານມາເມືອງ ສາມາດຜະລິດເຂົ້າໄດ້ທັງຫມົດ 40.339,08 ໂຕນ ສະເລ່ຍສະມັດຕະພາບ 4,91 ໂຕ່ນ/ເຮັກຕາ ທຽບໃສ່ປີຜ່ານມາຜະລິດເຂົ້າເພີ້ມຂຶ້ນ 739,42 ໂຕ່ນ ສະເລ່ຍໃສ່ຫົວຄົນໄດ້ 620 ກິໂລ/ຄົນ/ປີທຽບໃສ່ແຜນການ ປະຕິບັດໄດ້ 97.79% (ແຜນການແມ່ນ 634 ກິໂລ/ຄົນ/ປີ.) ເຫດຜົນຍ້ອນຜົນກະທົບຈາກໄພທໍາມະຊາດ. ໄດ້ຊຸກຍູ້ການຜະລິດພືດເປັນສີນຄ້າໄດ້ 19.538,55 ເຮັກຕາ, ຜົນຜະລິດໄດ້ 941.201 ໂຕ່ນ ທຽບໃສ່ແຜນການປີປະຕິບັດໄດ້ 114,86%, ໃນນີ້, ພືດເປັນສີນຄ້າລະດູແລ້ງ ເນື້ອທີ່ 700,15 ເຮັກຕາ ແລະ ພືດເປັນສີນຄ້າລະດູຝົນ ເນື້ອທີ່ 18.838,40 ເຮັກຕາ, ຊຸກຍູ້ສົ່ງເສີມການລ້ຽງສັດ ເຮັດໃຫ້ຝູງສັດຂະຫຍາຍຕົວເພີ່ມຂຶ້ນສະເລ່ຍ 13,14% ທົ່ວເມືອງມີສັດລ້ຽງທັງຫນົດ 1.651.196 ໂຕ, ທຽບໃສ່ປີຜ່ານມາເພີ່ມຂຶ້ນ 235.532 ໂຕ, ທຽບໃສ່ແຜນການປີເພີ້ມຂຶ້ນ 131,46%. ສາມາດຕອບສະໜອງຊີ້ນ, ໄຂ່ ແລະ ປາ ສະເລ່ຍໃສ່ຫົວຄົນໜຶ່ງ 57,81 ກິໂລກະລາມ/ຄົນ/ປີ, ທຽບໃສ່ແຜນປີ (57ກິໂລກະລາມຕໍ່ຄົນຕໍ່ປີ) ປະຕິບັດໄດ້ 101,4%, ປັບປຸງລະບົບຊົນລະປະທານ, ຄອງເໝືອງ ສາມາດສົ່ງນໍ້າໄດ້ສະດວກ; ໄດ້ຟື້ນຟູປ່າ, ປູກເຄື່ອງປ່າຂອງດົງ ແລະ ໄມ້ໃຫ້ໝາກໄດ້ທັງໝົດ 279.050 ເບ້ຍ ລວມ 796,81 ເຮັກຕາ ທຽບໃສ່ແຜນປີ ປະຕິບັດໄດ້ 75,17%; ຟື້ນຟູປ່າໄມ້ແບບທໍາມະຊາດ ແລະ ບົວລະບັດໄດ້ 362 ເຮັກຕາ.ໄປຄ່ຽງຄູ່ກັນນີ້, ເມືອງຍັງໄດ້ເອົາໃຈໃສ່ຄຸ້ມຄອງ, ຊຸກຍູ້ບັນດາໂຮງງານອຸດສາຫະກໍາ-ຫັດຖະກໍາຢູ່ພາຍໃນເມືອງໃຫ້ມີການຜະລິດທີ່ເພີ້ມຂຶ້ນເພື່ອຈໍລະຈອນຢູ່ພາຍໃນເມືອງ ແລະ ສົ່ງອອກ ຊຶ່ງລວມທັງສິນຄ້າດ້ານກະສິກໍາໃນ 1 ປີ ສາມາດສົ່ງສິນຄ້າອອກ ມີມູນຄ່າທັງໝົດ 233,85 ຕື້ກີບ. ທຽບໃສ່ແຜນການປີປະຕິບັດໄດ້ 106%, ຄຸ້ມຄອງການນໍາເຂົ້າສິນຄ້າ ມູນຄ່າ 314,24 ຕື້ກີບ ທຽບໃສ່ແຜນການປີປະຕິບັດໄດ້ 149% (ຍ້ອນລາຄາສິນຄ້າເພີ່ມຂຶ້ນ); ອອກທະບຽນວິສາຫາກິດໄດ້ 32 ທະບຽນ ມີທືນຈົດທະບຽນທັງໝົດ 7.1 ຕື້ກີບ. ກ່ຽວກັບການລົງທຶນ ໃນປີ 2023 ຜ່ານມາ ເມືອງສາມາດດຶງດູດການລົງທຶນຂອງລັດ, ທຶນຊ່ວຍເຫຼືອລ້າຈາກອົງການຈັດຕັ້ງສາກົນ, ພາກເອກະຊົນ, ລັດວິສາຫະກິດ ແລະ ການລົງທຶນຂອງປະຊາຊົນເຂົ້າໃນການກໍ່ສ້າງປັບປຸງພື້ນຖານໂຄງລ່າງຈໍານວນໜຶ່ງ ເປັນຕົ້ນ: ໂຄງການກໍ່ສ້າງໂຮງຮຽນປະຖົມບ້ານກາງ, ກໍ່ສ້າງນ້ໍາລິນບ້ານນໍ້າຍາບ, ດ້ວຍທຶນຊ່ວຍເຫຼືອຂອງລັດຖະບານຍີ່ປຸ່ນ, ກໍ່ສ້າງໂຮງຮຽນປະຖົມໂພນສະອາດ, ມສ ໄຊສະຫວາດ ດ້ວຍທຶນຊ່ວຍເຫຼືອຂອງມູນລະນິທິເກື້ອຝັນເດັກ, ກໍ່ສ້າງໂຮງຮຽນປະຖົມ ພູຟ້າມີໄຊດ້ວຍທຶນຊ່ວຍເຫຼືອຈາກຄະນະສັນຕິພາບ ແລະ ສະມາຄົມຈີນ, ໂຄງການກໍ່ສ້າງຕະຫຼາດ ປັດຈຸບັນ, ກໍາລັງລົງມືຈັດຕັ້ງປະຕິບັດ. ອັນພົ້ນເດັ່ນແມ່ນຊຸກຍູ້ປະຊາຊົນກໍ່ສ້າງທາງເບຕົ້ງເຂົ້າບ້ານໄດ້ 2 ເສັ້ນ ຄື: ບ້ານແສງຈະເລີນ ແລະ ບ້ານໜອງບົວ ດ້ວຍທຶນສົມທົບຂອງເມືອງ ແລະ ປະຊາຊົນປະກອບສ່ວນ. ນອກຈາກນີ້, ຍັງມີໂຄງການຊ່ວຍເຫຼືອສົ່ງເສີມດ້ານວິຊາການໃນແຕ່ລະຂົງເຂດເຊັ່ນ: ໂຄງການຮ່ວມມືລາວ-ເຢຍລະມັນ (GIZ). ວຽກງານສົ່ງເສີມໂຄງການການລົງທຶນຂອງເອກະຊົນພາຍໃນ ແລະ ຕ່າງປະເທດ, ວຽກງານໂຄງການອອກໃບຕາດິນຖາວອນ, ໂຄງການວາງແຜນນໍາໃຊ້ທີ່ດິນກະສິກໍາ ແລະ ການຄຸ້ມຄອງທີ່ດິນກະສິກໍາແບບມີສ່ວນຮ່ວມ, ໂຄງການປ່າໄມ້ບ້ານ, ໂຄງການຜະລິດກະສິກໍາ ເປັນສິນຄ້າ, ໂຄງການໂຮງຮຽນຊາວນາ, ໂຄງການພັດທະນາໂຄງລ່າງຊົນນະບົດ-ໂຄງການຊົນລະກະເສດ ແລະ ຜະລິດເປັນສິນຄ້າຂະໜາດນ້ອຍ (ໄດ້ສ້ອມແປງເສັ້ນທາງໄປສູ່ເຂດທໍາການຜະລິດ 1 ເສັ້ນ ຢູ່ບ້ານແສງຈະເລີນ) ສໍາລັບວຽກໂຍທາທິການ ແລະ ຂົນສົ່ງ ເມືອງ ໄດ້ກໍ່ສ້າງພື້ນຖານໂຄງລ່າງຈໍານວນໜຶ່ງ ເຊັ່ນ: ໂຄງການກໍ່ສ້າງເສັ້ນທາງເບີ 3609 ບ້ານນໍ້າປຸຍ ຫາ ບ້ານປາກຊອງ ລວງຍາວ 10,5 ກິໂລແມັດ ສໍາເລັດແລ້ວ 90%, ແຕ່ບ້ານປາກຊ່ອງ ຫາ ບ້ານນາແວ່ນສໍາເລັດແລ້ວ 70%; ຟື້ນຟູເສັ້ນທາງສຸກເສີນຫຼັງລະດູຝົນ 5 ເສັ້ນ ທຽບໃສ່ແຜນການປີປະຕິບັດໄດ້ 100%, ກໍ່ສ້າງເສັ້ນທາງຊອຍປູເບຕົງທຶນສົມທົບລະຫວ່າງລັດ ກັບ ປະຊາຊົນໄດ້ 2 ເສັ້ນທຽບໃສ່ແຜນການປີປະຕິບັດໄດ້ 50%. ສໍາລັບວຽກງານຊັບພະຍາກອນທໍາມະຊາດ ແລະ ສິ່ງແວດລ້ອມໄດ້ສໍາເລັດການເກັບກໍາຂໍ້ມູນການພິສູດຫຼັກຖານ, ການຂຶ້ນທະບຽນທີ່ດິນອອກໃບຕາດິນຖາວອນແບບເປັນລະບົບໄດ້ 1.697 ຕອນ ທຽບໃສ່ແຜນການປີ ປະຕິບັດໄດ້ 25,63%, ຈັດສັນວາງແຜນນໍາໃຊ້ທີ່ດິນກະສິກໍາແບບມີສ່ວນຮ່ວມຂັ້ນບ້ານ ຕິດພັນກັບການກວດກາດິນ 8 ປະເພດໄດ້ 8 ບ້ານ ທຽບໃສ່ແຜນການປີປະຕິບັດໄດ້ 100%, ສໍາຫຼວດວັດແທກການຮັບຮູ້ສິດນໍາໃຊ້ທີ່ດິນຂອງປະຊາຊົນໃນ 3 ປະເພດປ່າ ໄດ້ 1 ບ້ານ ມີ່ 650 ຕອນ ທຽບໃສ່ແຜນການປີ ປະຕິບັດໄດ້ 55,93%; ແກ້ໄຂຂໍ້ຂັດແຍ່ງກ່ຽວກັບທີ່ດິນສໍາເລັດ 10 ເລື່ອງ, ອອກໃບຢັ້ງຢືນສິ່ງແວດລ້ອມໄດ້ 72 ຫົວໜ່ວຍ ທຽບໃສ່ແຜນການປີ ປະຕິບັດໄດ້ 205%.
 ຈາກຜົນສໍາເລັດຂອງທຸກຂະແໜງການໃນ ປີ 2023 ຜ່ານມາ, ໄດ້ເປັນການປະກອບສວ່ນຢ່າງຕັ້ງໜ້າ ເຮັດໃຫ້ເສດຖະກິດພາຍໃນເມືອງພຽງດີຂຶ້ນເປັນລໍາດັບ.