ອົງການການເງິນສິງກະໂປ ໄດ້ລິເລີ່ມໂຄງການພິສູດມູນຄ່າ (POV) ເພື່ອທົດສອບເຕັກນິກ AI/ML ໃນການກວດຫາການສໍ້ໂກງໃນໄລຍະເລີ່ມຕົ້ນ. ໂດຍຂໍ້ມູນໄດ້ຖືກເກັບກຳຈາກ 5 ທະນາຄານ ເພື່ອພັດທະນາຮູບແບບທີ່ມີຈຸດປະສົງລະບຸທຸລະກຳ ແລະ ບັນຊີທະນາຄານທີ່ມີຄວາມສ່ຽງສູງ. ໂດຍການລະບຸກິດຈະກຳທີ່ໜ້າສົງໄສໃນໄລຍະເລີ່ມຕົ້ນຊ່ວຍໃຫ້ການປະເມີນ ແລະ ການແຊກແຊງໄດ້ໄວຂຶ້ນ ຊຶ່ງຫຼຸດຜ່ອນການສູນເສຍຈາກການສໍ້ໂກງ.
ອົງການການເງິນສິງກະໂປ ໄດ້ສ້າງຕັ້ງລະບົບການແບ່ງປັນຂໍ້ມູນທີ່ປອດໄພ ຊຶ່ງຖືກຄວບຄຸມຕາມມາດຕະຖານອຸດສາຫະກຳ ເພື່ອປົກປ້ອງຂໍ້ມູນຂອງລູກຄ້າ ແລະ ຂໍ້ມູນທີ່ໃຊ້ໃນໂຄງການນີ້ຍັງຄົງເປັນຄວາມລັບ ແລະ ໄດ້ຮັບການປົກປ້ອງພາຍໃຕ້ເຕັກນິກການເຂົ້າລະຫັດລັບ. ໂດຍໂຄງການນີ້ຈະວາງພື້ນຖານສຳລັບການປະສານງານທາງດ້ານເຕັກນິກ AI/ML ທົ່ວອຸດສາຫະກຳຢ່າງເລິກເຊິ່ງຍິ່ງຂຶ້ນ.
ໃນເວລາດຽວກັນ, ເລກບັນຊີທະນາຄານຈະຖືກເຂົ້າລະຫັດເພື່ອໃຫ້ມີພຽງແຕ່ທະນາຄານທີ່ເປັນເຈົ້າຂອງຂໍ້ມູນເທົ່ານັ້ນທີ່ສາມາດລະບຸລາຍລະອຽດທີ່ແທ້ຈິງຂອງບັນຊີທະນາຄານໄດ້ ແລະ ການເຂົ້າເຖິງຂໍ້ມູນແມ່ນຖືກຈຳກັດສະເພາະບຸກຄົນທີ່ໄດ້ຮັບອະນຸຍາດພາຍໃນສະພາບແວດລ້ອມທີ່ມີການຕິດຕາມກວດກາ ແລະ ຄວບຄຸມຢ່າງຕໍ່ເນື່ອງ. ໂດຍຂໍ້ມູນທັງໝົດຈະຖືກລຶບເມື່ອສຳເລັດໂຄງການ.
ອົງການການເງິນສິງກະໂປ ອາດຈະຂະຫຍາຍຂອບເຂດ ແລະ ຄວາມສັບຊ້ອນຂອງຮູບແບບ AI/ML ທີ່ໃຊ້ໃນໂຄງການນີ້ ຫຼັງຈາກການປະເມີນປະສິດທິພາບຂອງການພິສູດມູນຄ່າ ແລະ ການຮຽນຮູ້ຈາກມັນແລ້ວ. ໂດຍອາດຈະ ເຊື່ອມໂຍງຊຸດຂໍ້ມູນ ແລະ ຕົວຢ່າງການນຳໃຊ້ທີ່ຫຼາກຫຼາຍຂຶ້ນ ເພື່ອເສີມສ້າງຄວາມສາມາດຂອງລະບົບການເງິນໃນການຕໍ່ສູ້ກັບອາຊະຍາກຳໃຫ້ດີຂຶ້ນ.
ຄໍາເຫັນ