ຖະແຫຼງການຈາກອົງການວິສາຫະກິດ ສິງກະໂປ (Enterprise Singapore) ແລະ ສຳນັກງານພັດທະນາຂໍ້ມູນຂ່າວສານ, ການສື່ສານ ແລະ ການພັດທະນາສື່ມວນຊົນຂອງສິງກະໂປຊີ້ໃຫ້ເຫັນວ່າແຜນທີ່ໄດ້ຮັບການປັບປຸງຄາດວ່າຈະຊ່ວຍສະໜັບສະໜູນຜູ້ຂາຍຍ່ອຍ SME ຫຼາຍກວ່າ 2,000 ຄົນໃນການເສີມສ້າງຄວາມສາມາດໃນການແຂ່ງຂັນ ແລະ ຄວາມຍືດຍຸ່ນຂອງເຂົາເຈົ້າ.
ການປ່ຽນແປງທີ່ສຳຄັນອັນທຳອິດໃນແຜນການທີ່ໄດ້ຮັບການປັບປຸງແມ່ນການຈັດປະເພດວິທີແກ້ໄຂດີຈີຕອນໂດຍອີງຕາມໜ້າທີ່ການດຳເນີນງານທາງທຸລະກິດເຊັ່ນ: ຄຸ້ມຄອງດ້ານໜ້າ, ດ້ານຫຼັງ ແລະ ການຄຸ້ມຄອງອົງກອນ, ແທນການແບ່ງຕາມລະດັບຄວາມພ້ອມດ້ານດີຈີຕອນ ຊຶ່ງຈະຊ່ວຍໃຫ້ຜູ້ຂາຍຍ່ອຍສາມາດລະບຸສິ່ງທ້າທາຍດ້ານການດຳເນີນງານ ແລະ ເລືອກວິທີການທີ່ເໝາະສົມທີ່ສຸດໄດ້ງ່າຍຂຶ້ນ.
ອັນທີສອງ, ແຜນການດັ່ງກ່າວເນັ້ນໜັກໃສ່ເຕັກໂນໂລຊີທີ່ຂັບເຄື່ອນດ້ວຍ AI ແລະ ເຕັກໂນໂລຊີທີ່ປັບປຸງດ້ວຍ AI ໃນການດຳເນີນທຸລະກິດຂາຍຍ່ອຍ. ໂດຍອົງການທີ່ກ່ຽວຂ້ອງລະບຸວ່າ SMEs ຈຳນວນຫຼາຍຍັງຂາດຄວາມເຂົ້າໃຈຢ່າງຈະແຈ້ງກ່ຽວກັບວິທີການປະສົມປະສານ AI ເຂົ້າໃນທຸລະກິດຂອງຕົນນຢ່າງມີປະສິດທິພາບ.
ຖະແຫຼງການດັ່ງກ່າວລະບຸວ່າ: ຂະແໜງຂາຍຍ່ອຍຂອງສິງກະໂປກຳລັງປະເຊີນກັບຄວາມກົດດັນທີ່ເພີ່ມຂຶ້ນ ຊຶ່ງ ລວມທັງຄ່າໃຊ້ຈ່າຍໃນການດຳເນີນງານທີ່ສູງຂຶ້ນ, ຂໍ້ຈຳກັດດ້ານແຮງງານ ແລະ ການແຂ່ງຂັນອີຄອມເມີຊທົ່ວໂລກທີ່ຮຸນແຮງຂຶ້ນ. ຖະແຫຼງການລະບຸຕື່ມວ່າ: ຄວາມກ້າວໜ້າຢ່າງໄວວາໃນດ້ານປັນຍາປະດິດ ແລະ ເຕັກໂນໂລຊີການຂາຍຍ່ອຍ ເປັນໂອກາດໃຫ້ທຸລະກິດປັບປຸງປະສິດທິພາບ ແລະ ການແຂ່ງຂັນ.
ທັງນີ້, ນັບຕັ້ງແຕ່ແນະນຳແຜນດັ່ງກ່າວໃນປີ 2017, ແຜນ IDP ໄດ້ສະໜອງແຜນທີ່ດີຈີຕອນແບບເທື່ອລະຂັ້ນຕອນສຳລັບຜູ້ຂາຍຍ່ອຍ SME, ໂດຍເລີ່ມຕົ້ນດ້ວຍເຄື່ອງມືພື້ນຖານ ແລະ ກ້າວໄປສູ່ວິທີແກ້ໄຂທີ່ກ້າວໜ້າຍິ່ງຂຶ້ນ.
ຜົນການສຳຫຼວດຂະແໜງການຂາຍຍ່ອຍປີ 2025 ຂອງອົງການວິສາຫະກິດ ສິງກະໂປ ພົບວ່າ: SME ຫຼາຍກວ່າ 75% ໃຊ້ວິທີແກ້ໄຂລະດັບເລີ່ມຕົ້ນ, ໃນຂະນະທີ່ 45% ໃຊ້ວິທີແກ້ໄຂລະດັບກາງ, ແຕ່ການຮັບຮອງເອົາເຕັກໂນໂລຊີທີ່ກ້າວໜ້າຍັງຄົງຈຳກັດ.
ຄໍາເຫັນ