ສເກົາຫຼີ ຊ່ວຍເຫຼືອ ວສລ ປັບປຸງລະບົບຫ້ອງອັດ ແລະ ລົດຖ່າຍທອດສຽງ-ພາບ ສູ່ຄວາມທັນສະໄໝ

ວິທະຍຸກະຈາຍສຽງແຫ່ງຊາດລາວ (ວສລ) ໄດ້ຈັດພິທີມອບ-ຮັບການຊ່ວຍເຫຼືອດ້ານເຕັກນິກເພື່ອການປັບປຸງລະບົບຫ້ອງອັດສຽງ-ພາບອອນລາຍ ແລະ ລົດຖ່າຍທອດສຽງ-ພາບ ຈາກສະມາຄົມເພື່ອການສົ່ງເສີມການພັດທະນາວິທະຍຸກະຈາຍສຽງແຫ່ງ ສເກົາຫຼີ (RAPA)ຂຶ້ນໃນວັນທີ 26 ທັນວານີ້ ທີ່ ວສລ, ໂດຍມີທ່ານ ໂພສີ ແກ້ວມະນີວົງ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ), ທ່ານ ວັນໄຊ ຕະວິນຍານຮອງຫົວໜ້າຄະນະໂຄສະນາອົບຮົມສູນກາງພັກ ແລະ ຫົວໜ້າບັນນາທິການໃຫຍ່ໜັງສືພິມປະຊາຊົນ, ທ່ານ ສຸວັນ ວິໄລແສງ ຜູ້ອໍານວຍການໃຫຍ່ ວສລ,  ທ່ານ  Dr. Jungsu Song ຮອງປະທານບໍລິຫານສະມາຄົມເພື່ອການສົ່ງເສີມການພັດທະນາວິທະຍຸກະຈາຍສຽງແຫ່ງສາທາລະນະລັດເກົາຫຼີ (RAPA) ຕາງໜ້າເອກອັກຄະລັດຖະທູດ ສເກົາຫຼີ ປະຈຳ ສປປ ລາວພ້ອມດ້ວຍແຂກຮັບເຊີນເຂົ້າຮ່ວມ.
ທ່ານ ວໍລະສັກ ປຣະວົງວຽງຄຳ ຮອງຜູ້ອຳນວຍການໃຫຍ່ ວສລ ໄດ້ຂຶ້ນລາຍງານຄວາມເປັນມາຂອງໂຄງການດັ່ງກ່າວ ເພື່ອແນໃສ່ຍົກລະດັບທາງດ້ານເຕັກນິກຂອງວິທະຍຸກະຈາຍສຽງແຫ່ງຊາດລາວ ໃຫ້ກາຍເປັນວິທະຍຸລະບົບດີຈີຕອນທີ່ທັນສະໄໝ ສາມາດກະຈາຍຂໍ້ມູນຂ່າວສານໄປສູ່ຜູ້ບໍລິໂພກທົ່ວປະເທດ ແລະ ທົ່ວໂລກຜ່ານຫຼາຍຊ່ອງທາງໄດ້ຢ່າງວ່ອງໄວທັນກັບເຫດການ, ແຫຼມຄົມ, ຖືກຕ້ອງຊັດເຈນ ແລະ ກວ້າງຂວາງກ່ວາເກົ່າ. ໃນປີ 2020 ວິທະຍຸກະຈາຍສຽງແຫ່ງຊາດລາວ ໄດ້ຂຽນບົດສະເໜີຂໍໂຄງການວ່າດ້ວຍການປັບປຸງລະບົບຫ້ອງອັດສຽງ-ພາບອອນລາຍ ແລະລົດຖ່າຍທອດສຽງ-ພາບພາຍໃຕ້ໂຄງການຊ່ວຍເຫຼືອ (ODA) ຈາກລັດຖະບານແຫ່ງ ສເກົາຫຼີ ໂດຍຜ່ານກະຊວງວິທະຍາສາດ ແລະ ຂໍ້ມູນຂ່າວສານແຫ່ງ ສເກົາຫຼີ.
ພາຍຫຼັງໄດ້ຮັບການເຫັນດີອະນຸມັດຈາກ ລັດຖະບານ ສເກົາຫຼີ, ສະມາຄົມເພື່ອການສົ່ງເສີມການພັດທະນາວິທະຍຸກະຈາຍສຽງແຫ່ງ ສເກົາຫຼີ (RAPA)ໄດ້ຮັບການມອບໝາຍໃຫ້ເປັນຜູ້ຕາງໜ້າລັດຖະບານ ສເກົາຫຼີ ຮ່ວມເຊັນບົດບັນທຶກຄວາມເຂົ້າໃຈ (MoU) ວ່າດ້ວຍການຮ່ວມມືກັບ ວສລ ເພື່ອຈັດຕັ້ງປະຕິບັດໂຄງການຊ່ວຍເຫຼືອດັ່ງກ່າວ, ລວມມູນຄ່າທັງໝົດ 309.076 ໂດລາ ພາຍໃຕ້ຊື່ເປັນພາສາອັງກິດSupport for the Improvement of the Broadcasting Environment, ໂຄງການຊ່ວຍເຫຼືອດັ່ງກ່າວ ໄດ້ແບ່ງອອກເປັນ 2 ໄລຍະ ຄື: ໄລຍະທີ 1 ປີ 2022 ປະກອບມີອຸປະກອນເຕັກນິກຄົບຊຸດສໍາລັບຫ້ອງສະຕູດີໂອໃຫ່ຍຊຶ່ງສາມາດບັນທຶກສຽງ-ພາບແບບປົກກະຕິ,ຈັດລາຍການສົດ,ຖ່າຍທອດສົດຜ່ານລະບົບອອນລາຍທີ່ທັນສະໄໝ ມາດຕະຖານສາກົນ ລວມທັງການຝຶກອົບຮົມເຕັກນິກວິທີການນໍາໃຊ້ໃຫ້ແກ່ວິຊາການ ມູນຄ່າ 79.385 ໂດລາ, ໄລຍະທີ 2 ປີ 2023, ລວມມີລົດຖ່າຍທອດສຽງ ແລະ ພາບ OB Van ຈໍານວນ 1 ຄັນ ໂດຍປະກອບອຸປະກອນເຕັກນິກທີ່ທັນສະໄໝຄົບຊຸດ, ອຸປະກອນເຄື່ອງສົ່ງສັນຍານ,ເຄື່ອງຮັບສັນຍານພາບ ແລະ ສຽງຜ່ານດາວທຽມ ລວມທັງການຝຶກອົບຮົມວິຊາການທາງດ້ານເຕັກນິກໃຫ້ແກ່ວິຊາການລາວເຮົາມູນຄ່າ 230.076 ໂດລາຊຶ່ງຖ້າລວມມູນຄ່າທັງໝົດການຊ່ວຍເຫຼືອຂອງRAPA ໃຫ້ແກ່ວິທະຍຸກະຈາຍສຽງແຫ່ງຊາດລາວ ລວມເປັນ 309.076 ໂດລາ ຫຼື ປະມານ 6,4 ຕື້ກວ່າກີບ.
ທ່ານ  Jungsu Song ຮອງປະທານບໍລິຫານ RAPA ໄດ້ຂຶ້ນ ກ່າວມອບການຊ່ວຍເຫຼືອໃນຄັ້ງນີ້ວ່າ: ປັດຈຸບັນ ແມ່ນຍຸກແຫ່ງດີຈີຕອນ, ຍຸກແຫ່ງເຕັກໂນໂລຊີຂໍ້ມູນຂ່າວສານທີ່ທັນສະໄໝ ແລະ ການຫັນໄປສູ່ຄວາມທັນສະໄໝໃນຍຸກດີຈີຕອນຂອງ ສປປ ລາວ ກໍນັບມື້ຂະຫຍາຍຕົວ. ການຮ່ວມມືລະຫວ່າງ ສເກົາຫຼີ ແລະ ສປປ ລາວ ໃນຂົງເຂດສື່ມວນຊົນຕ້ອງເພີ່ມທະວີການຮ່ວມມືໂດຍອີງຕາມການພັດທະນາເຕັກໂນໂລຊີທີ່ທັນສະໄໝ, ການສໍາເລັດໂຄງການຊ່ວຍເຫຼືອດ້ານເຕັກນິກເພື່ອການປັບປຸງລະບົບຫ້ອງອັດສຽງ-ພາບອອນລາຍ ແລະ ລົດຖ່າຍທອດສຽງ-ພາບ ໃຫ້ແກ່ ວສລ ແມ່ນມີຄວາມໝາຍສໍາຄັນ ແລະ ຈະປະກອບສ່ວນສໍາຄັນເຮັດໃຫ້ ວສລ ນັບມື້ກ້າວສູ່ຄວາມທັນສະໄໝຢ່າງບໍ່ຢຸດຢັ້ງ ແລະ  ໃນຕໍ່ໜ້ານີ້, ດ້ວຍການຊ່ວຍເຫຼືອຈາກ ສເກົາຫຼີ ຈະຊ່ວຍເຮັດໃຫ້ ວສລ ສາມາດຜະລິດເນື້ອໃນລາຍການຕ່າງໆ ທີ່ຫຼາກຫຼາຍ, ອຸດົມສົມບູນ ແລະ ສາມາດເຂົ້າເຖິງກຸ່ມເປົ້າໝາຍ ກໍຄື ຜູ້ຟັງ-ຜູ້ຊົມລາຍການຂອງ ວສລ ໄດ້ຢ່າງທົ່ວເຖິງ ແລະ ນັບມື້ກວ້າງຂວາງກວ່າເກົ່າ.
ທ່ານ ສຸວັນ ວິໄລແສງ ໄດ້ຕາງໜ້າຄະນະນໍາ ແລະ ພະນັກງານ ວສລ ຂຶ້ນກ່າວຮັບການຊ່ວຍເຫຼືອ ແລະ ສະແດງຄວາມຂອບໃຈຢ່າງສູງມາຍັງລັດຖະບານ ແລະ ປະຊາຊົນແຫ່ງ ສເກົາຫຼີ ກໍຄືສະມາຄົມເພຶ່ອການສົ່ງເສີມການພັດທະນາວິທະຍຸກະຈາຍສຽງ ແຫ່ງ ສເກົາຫຼີ ທີ່ໄດ້ໃຫ້ການສະໜັບສະໜູນຊ່ວຍເຫຼືອອັນມີຄຸນຄ່າສູງໃຫ້ແກ່ວິທະຍຸກະຈາຍສຽງແຫ່ງຊາດລາວ ຊຶ່ງເປັນການຊ່ວຍເຫຼືອທີ່ມີຄວານໝາຍສໍາຄັນ, ເປັນການປະກອບສ່ວນໃຫ້ແກ່ການປັບປຸງທາງດ້ານວິຊາສະເພາະ, ຍົກລະດັບທາງດ້ານອຸປະກອນເຕັກນິກສູ່ຄຸນນະພາບໃໝ່,ສ້າງຄວາມສາມາດໃໝ່ໃນການຜະລິດລາຍການ, ເຮັດໃຫ້ທຸກກຸ່ມເປົ້າສາມາດເຂົ້າຟັງ ແລະ ເຂົ້າຊົມວິທະຍຸທັງແບບເກົ່າ ແລະ ແບບໃໝ່ໄດ້ ເພາະການໄດ້ນໍາໃຊ້ລົດຖ່າຍທອດສົດ ຫຼື OB van ເຂົ້າໃນການລາຍງານຂ່າວກ່ຽວກັບເຫດການຕ່າງໆ ສາມາດເຂົ້າເຖີງຜູ້ຟັງ ແລະ ຜູ້ຊົມໃນທຸກພື້ນທີ່ທົ່ວປະເທດໄດ້ຢ່າງຊັດເຈນ, ວ່ອງໄວ ແລະ ທັນເຫດການກວ່າເກົ່າ ແລະ ຈະເອົາໃຈໃສ່ປົກປັກຮັກສາ ແລະ ຄຸ້ມຄອງເຄື່ອງຊ່ວຍເຫຼືອອັນລໍ້າຄ່າຂອງລັດຖະບານ ແລະ ປະຊາຊົນສເກົາຫຼີ ໃນຄັ້ງນີ້ໃຫ້ດີທີ່ສຸດ ແລະ ຈະນຳໃຊ້ໃຫ້ເກີດປະໂຫຍດສູງສຸດ. 
(ຂ່າວ-ພາບ:ບຸນອູ້ມ)