 |
ທ່ານ ສາຍສະໝອນ ກວານເມືອງຈັນ ໄດ້ໃຫ້ກຽດກ່າວຕ້ອນຮັບ ແລະ ເປີດພິທີຢ່າງເປັນທາງການ, ຈາກນັ້ນ ທ່ານນາງ ພູເງິນ ຈີນທະລາສີ ຜູ້ອຳນວຍການ ສກຈຮ ສາຍໃຍສຳພັນໄດ້ຂຶ້ນນຳສະເໜີປະຫວັດຄວາມເປັນມາຂອງ ສກຈຮ ສາຍໃຍສຳພັນ ພ້ອມທັງຍົກໃຫ້ເຫັນຄວາມໝາຍ ແລະ ເນື້ອໃນໂລໂກ້ ສກຈຮ ສາຍໃຍສຳພັນ ໃຫ້ຮູ້ວ່າ: ການຈົດທະບຽນເຄື່ອງໝາຍການຄ້າ ສກຈຮ ໃນຄັ້ງນີ້ ຖືເປັນບາດກ້າວໃໝ່ແຫ່ງການປ່ຽນແປງໃນວົງການສະຖາບັນການເງິນທີ່ບໍ່ແມ່ນທະນາຄານ ໂດຍ ສກຈຮ ສາຍໃຍສໍາພັນ ເປັນສະຖາບັນການເງິນທີ່ຮັບເງິນຝາກແຫ່ງທໍາອິດທີ່ຈົດທະບຽນເຄື່ອງໝາຍການຄ້າ. ຈຸດປະສົງໃນການຈົດທະບຽນເຄື່ອງໝາຍການຄ້າເພື່ອປົກປ້ອງສິດ ຜົນງານປະດິດຄິດແຕ່ງຂອງຜູ້ກໍ່ຕັ້ງສາຍໃຍສໍາພັນ ເພື່ອໃຫ້ໄດ້ຮັບການຄຸ້ມຄອງຕາມລະບຽບກົດໝາຍ.
ໃນໄລຍະຜ່ານມາ, ການດຳເນີນການຈົດທະບຽນເຄື່ອງໝາຍການຄ້າ ສກຈຮ ສາຍໃຍສໍາພັນ ໄດ້ດຳເນີນຕາມລະບຽບການ ແລະ ຂັ້ນຕອນຕ່າງໆ, ຜ່ານໄລຍະເວລາ 12 ເດືອນໃນການກວດສອບເນື້ອໃນ ແລະ ພິຈາລະນາຕາມຂັ້ນຕອນຂອງກົມຊັບສິນທາງປັນຍາ ກະຊວງອຸດສາຫະກຳ ແລະ ການຄ້າ. ດັ່ງນັ້ນ, ທາງກົມ ຈຶ່ງໄດ້ອະນຸມັດອອກໃບ ຢັ້ງຢືນການຈົດທະບຽນເຄື່ອງໝາຍການຄ້າໃຫ້ ສກຈຮ ສາຍໃຍສໍາພັນ ສະບັບເລກທີ 62315, ລົງວັນທີ 30/01/2025 ພ້ອມທັງໄດ້ເຜີຍແຜ່ຜົນການຈົດທະບຽນເຄື່ອງໝາຍການຄ້າລົງໃນຈົດໝາຍເຫດທາງລັດຖະການ ກ່ຽວກັບຊັບສິນທາງປັນຍາ ໂດຍເຄື່ອງໝາຍການຄ້າ ແລະ ຊື່ການຄ້າຂອງ ສກຈຮ ສາຍໃຍສໍາພັນແມ່ນໄດ້ຮັບການຄຸ້ມຄອງຕາມລະບຽບກົດໝາຍເປັນເວລາ 10 ປີ ນັບແຕ່ວັນທີ 19/2/2024 ໄປເຖິງວັນທີ 19/2/2034. ດ້ານການດຳເນີນທຸລະກິດຂອງ ສກຈຮ ສາຍໃຍສຳພັນປະກອບມີ 4 ສາຂາຄື: ຄຳມ່ວນ, ບໍລິຄຳໄຊ, ຊຽງຂວາງ, ໄຊສົມບູນ ແລະ ມີສຳນັກງານໃຫຍ່ຕັ້ງຢູ່ແຂວງສະຫວັນນະເຂດ, ມາຮອດເດືອນພຶດສະພາປີ 2025 ມີຍອດເຫຼືອເງິນກູ້ຈຳນວນທັງໝົດ 485 ຕື້ກວ່າກີບ, ມີຊັບສິນ 722 ຕື້ກວ່າກີບ.
ໃນພິທີ, ໄດ້ຜ່ານຂໍ້ຕົກລົງກ່ຽວກັບການມອບໃບຢັ້ງຢືນການຈົດທະບຽນເຄື່ອງໝາຍການຄ້າຂອງ ສກຈຮ ສາຍໃຍສຳພັນ ພ້ອມທັງມອບໃບຢັ້ງຢືນດັ່ງກ່າວຢ່າງເປັນທາງການ ໂດຍການໃຫ້ກຽດມອບຂອງທ່ານຮອງເຈົ້າແຂວງສະຫວັນນະເຂດ ແລະ ຕາງໜ້າຮັບໂດຍທ່ານນາງ ພູເງິນ ຈີນທະລາສີ, ໂອກາດດັ່ງກ່າວ, ສກຈຮ ສາຍໃຍສຳພັນ ໄດ້ມອບເງິນປະກອບສ່ວນຊ່ວຍເຫຼືອໃນການຈັດຊື້ແນວພັນເຂົ້າປູກໃຫ້ປະຊາຊົນທີ່ຖືກຜົນກະທົບຈາກໄພນ້ຳຖ້ວມຂອງເມືອງຊົນນະບູລີ ຈຳນວນ 30 ລ້ານກີບ ໂດຍການມອບຂອງທ່ານ ສາຍສະໝອນ ກວານເມືອງຈັນ ແລະ ຮັບໂດຍທ່ານ ສຸບິນ ຫຼວງດ້ວງ ຮັກສາການເຈົ້າເມືອງຊົນນະບູລີ ແລະ ໄດ້ມອບເງິນຊຸກຍູ້ກອງປະຊຸມໃຫຍ່ອົງຄະນະພັກນະຄອນໄກສອນພົມວິຫານ ຄັ້ງທີ IX ຈຳນວນ 20 ລ້ານກີບ ຕາງໜ້າມອບໂດຍທ່ານ ສຳພັນໂຊກ ຣາຊພົນ ປະທານສະພາບໍລິຫານ ສກຈຮ ສາຍໃຍສຳພັນ ແລະ ຮັບໂດຍທ່ານ ຄຳຜຸຍ ສີບຸນເຮືອງ ວ່າການເຈົ້ານະຄອນໄກສອນພົມວິຫານ. ແຫຼ່ງຂ່າວ: ສະຫວັນນະເຂດ
ຄໍາເຫັນ