ສກລ ວາງຄາດໝາຍສູ້ຊົນຍົກລະດັບ ສ້າງພະນັກງານກໍາມະບານໃຫ້ມີຄຸນນະພາບ

ສະຫາຍ ພອນສານ ວິໄລເມັ້ງ ກ່າວຕື່ມວ່າ: ສຳລັບຄາດໝາຍສູ້ຊົນ 1) ຈະກໍ່ສ້າງຄະນະພັກ, ໜ່ວຍພັກໃຫ້ມີຄວາມໜັກແໜ້ນທາງດ້ານການເມືອງ-ແນວຄິດ, ມີຄວາມເຂັ້ມແຂງທາງດ້ານການຈັດຕັ້ງ ແລະ ມີແບບແຜນການນຳພາ-ຊີ້ນໍາໃຫ້ຖືກຕ້ອງຕາມກົດລະບຽບຂອງພັກ ແລະ ມີລັກສະນະວິທະຍາສາດ ແລະລັກສະນະຕົວຈິງ; 2) ເພີ່ມທະວີກໍ່ສ້າງສະມາຊິກພັກໃຫ້ມີຄຸນທາດການເມືອງໜັກແໜ້ນ, ມີຄຸນສົມບັດສິນທຳປະຕິວັດ ແລະ ຂະຫຍາຍສະມາຊິກພັກໃຫ້ໄດ້ທັງປະລິມານ ແລະ ຄຸນນະພາບ ໃນ 5 ປີຕໍ່ໜ້າໃຫ້ໄດ້ 16 ສະຫາຍ; 3) ກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ຕ້ອງໃຫ້ຮັບປະກັນທາງດ້ານປະລິມານ ແລະຄຸນນະພາບໃຫ້ໄດ້ 90% ຂຶ້ນໄປ; 4) ບໍາລຸງ-ກໍ່ສ້າງ ແລະ ຍົກລະດັບຄວາມຮູ້, ຄວາມສາມາດດ້ານທິດສະດີການເມືອງ, ວິຊາສະເພາະ, ພາສາຕ່າງປະເທດ, ໄອທີໃຫ້ສະມາຊິກພັກ, ພະນັກງານ-ລັດຖະກອນ; ສ້າງພະນັກງານສືບທອດປ່ຽນແທນຮັບປະກັນໃຫ້ມີ 3 ຮຸ່ນ, ເພດ, ເຜົ່າ ໂດຍສ້າງແຜນກໍານົດພະນັກງານນໍາພາ-ຄຸ້ມຄອງ ແລະ ປະເມີນໃນແຕ່ລະປີໃຫ້ເປັນປົກກະຕິ; 5) ເອົາໃຈໃສ່ນໍາພາ-ຊີ້ນໍາອົງການຈັດຕັ້ງມະຫາຊົນໃຫ້ເຄື່ອນໄຫວຕາມພາລະບົດບາດ, ສິດ, ໜ້າທີ່ຂອງຕົນ; ຊຸກຍູ້ຈັດຕັ້ງປະຕິບັດຂໍ້ແຂ່ງຂັນກໍາມະບານ 5 ເປັນເຈົ້າ, ແມ່ຍິງ 3 ດີ ແລະ ຊາວໜຸ່ມ 4 ບຸກ ຕິດພັນກັບການຈັດຕັ້ງປະຕິບັດວຽກງານວິຊາສະເພາະ ແລະ ຕິດພັນກັບຂະບວນການແຂ່ງຂັນຮັກຊາດ ແລະ ພັດທະນາໃຫ້ໄດ້ 85% ຂຶ້ນໄປ; 6) ເອົາໃຈໃສ່ຊີ້ນໍາການຂະ ຫຍາຍສະມາຊິກ ແລະ ການຈັດຕັ້ງກໍາມະບານເຂົ້າໃນການຈັດຕັ້ງພັກ, ລັດ; ການຈັດຕັ້ງສັງຄົມ ແລະ ບັນ ດາຫົວໜ່ວຍແຮງງານຢ່າງແຂງແຮງ ແລະ ເພີ່ມຂຶ້ນໃນແຕ່ລະປີ ເພື່ອປົກປ້ອງສິດ ແລະ ຜົນປະໂຫຍດອັນຊອບທໍາຂອງສະມາຊິກກໍາມະບານ, ກໍາມະກອນ ແລະ ຊາວຜູ້ອອກແຮງງານໃຫ້ມີຄວາມເປັນທໍາ ແລະຖືກຕ້ອງຕາມລະບຽບກົດໝາຍ ແລະ 7) ສູ້ຊົນສ້າງເສດຖະກິດເອກະລາດເປັນເຈົ້າຕົນເອງຕາມມະຕິ, ຄໍາສັ່ງ ແລະ ລະບຽບກົດໝາຍ ເພື່ອເພີ່ມລາຍຮັບໃຫ້ ສກລ ໃນແຕ່ລະປີ.

ສະຫາຍ ພອນສານ ວິໄລເມັ້ງ ຍັງໄດ້ລາຍງານໃຫ້ຮູ້ວ່າ: ວຽກງານປົກປ້ອງແຮງງານແມ່ນສ້າງ ແລະ ປັບປຸງນິຕິກຳກ່ຽວກັບຍຸດທະສາດການປົກປ້ອງທາງສັງຄົມ; ເຂົ້າຮ່ວມປະກອບຄໍາເຫັນໃນການສ້າງແລະ ປັບປຸງນິຕິກຳທີ່ພົວພັນເຖິງການປົກປ້ອງສິດ ແລະ ຜົນປະໂຫຍດຂອງສະມາຊິກພັກ, ພະນັກງານ; ຊຸກຍູ້, ສ້າງ ແລະ ຕິດຕາມການປະຕິບັດສັນຍາແຮງງານບຸກຄົນ ແລະ ລວມໝູ່; ຄົ້ນຄວ້າ, ສະເໜີໃຫ້ລັດ ຖະບານປັບຂຶ້ນຄ່າແຮງງານຂັ້ນຕໍ່າສຸດໃຫ້ຜູ້ອອກແຮງງານພາກວິສາຫະກິດ ແລະ ພະນັກງານ-ລັດຖະ ກອນ; ຊຸກຍູ້ໃຫ້ສະຫະພັນກໍາມະບານນະຄອນຫຼວງວຽງຈັນ ແລະ ແຂວງສ້າງເບີສາຍດ່ວນ 1512; ປູກຈິດສໍານຶກກ່ຽວກັບສິດທິແຮງງານ, ຄວາມປອດໄພ ແລະ ສຸຂະພາບແຮງງານ, ການເຄື່ອນຍ້າຍແຮງງານທີ່ປອດໄພ ຕິດພັນກັບຕ້ານການຄ້າມະນຸດ, ຄວາມປອດໄພທາງຫຼວງ, ການປັບຕົວເຂົ້າກັບການປ່ຽນແປງຂອງສະພາບດິນຟ້າອາກາດ ແລະ ວຽກງານສະກັດກັ້ນ-ຕ້ານຢາເສບຕິດ; ສ້າງຖານຂໍ້ມູນກ່ຽວກັບແຮງງານໃຫ້ເປັນລະບົບ, ເຂົ້າຮ່ວມການແກ້ໄຂຂໍ້ຂັດແຍ່ງແຮງງານ; ຊຸກຍູ້ໃຫ້ຜູ້ໃຊ້ແຮງງານຈັດຕັ້ງປະຕິບັດການກວດສຸຂະພາບປະຈໍາປີ ແລະ ຊຸກຍູ້ສົ່ງເສີມໃນການສ້າງຕັ້ງກຸ່ມວິຊາຊີບຜູ້ອອກແຮງງານນອກລະບົບ ແລະ ວຽກງານພັດທະນາກໍາມະບານລາວ ແມ່ນປັບປຸງກົງຈັກການຈັດຕັ້ງຂອງສະຖາບັນໃຫ້ສອດຄ່ອງກັບພາລະບົດບາດຂອງຕົນ; ປັບປຸງຫຼັກສູດການຮຽນ-ການສອນຄວາມປອດໄພ ແລະ ສຸຂະພາບແຮງງານລະບົບຊັ້ນສູງໃຫ້ມາເປັນລະບົບຝຶກອົບຮົມໄລຍະສັ້ນ; ສ້າງຫຼັກສູດວິຊາພາສາອັງກິດ, ຫວຽດນາມ, ໄອທີ ໃຫ້ເປັນລະບົບຊັ້ນສູງ;ສ້າງຫຼັກສູດທິດສະດີກໍາມະບານໄລຍະສັ້ນ 45 ວັນ; ຈັດຝຶກອົບຮົມທິດສະດີວຽກງານກໍາມະບານໄລຍະສັ້ນ,ວິຊາສະເພາະດ້ານຕ່າງໆ ເປັນຕົ້ນ: ພາສາຕ່າງປະເທດ, ວຽກງານໄອທີ, ຫົວຂໍ້ສະເພາະ ແລະ ອື່ນໆ; ສືບຕໍ່ເປີດການຮຽນ-ການສອນວິຊາຊີບໃຫ້ສະມາຊິກພັກ, ສະມາຊິກກໍາມະບານ, ກໍາມະກອນເພື່ອຕອບສະໜອງ ຄວາມຕ້ອງການໃນສະເພາະໜ້າ ແລະ ຍາວນານ. ປະສານສົມທົບກັບສະຖາບັນການເມືອງ-ການປົກຄອງແຫ່ງຊາດ ແລະ ມະຫາວິທະຍາໄລແຫ່ງຊາດ ຄົ້ນຄວ້າຫຼັກສູດການຮຽນ-ການສອນວຽກງານກໍາມະບານໃຫ້ເປັນລະບົບ ເພື່ອສ້າງພະນັກງານກໍາມະບານໃຫ້ມີຄຸນນະພາບ.