ສນຂ6 ແຂວງພາກເໜືອສຳເລັດບັ້ນຝຶກອົບຮົມວຽກງານໂຄສະນາ-ສື່ມວນຊົນ ຊຸດທີ III

ສະຫະພັນນັກຮົບເກົ່າແຫ່ງຊາດລາວ (ສນຫລ)ໄດ້ສຳເລັດບັ້ນຝຶກອົບຮົມວຽກງານໂຄສະນາ-ສື່ມວນຊົນ ຊຸດທີ IIIໃຫ້ສະຫະພັນນັກຮົບເກົ່າ (ສນຂ)6 ແຂວງພາກເໜືອຂຶ້ນຫວ່າງບໍ່ດົນມານີ້ທີ່ສະໂມສອນໂຮງແຮມອຸດົມສິນເມືອງ ແລະ ແຂວງຫຼວງນໍ້າທາໃຫ້ກຽດເຂົ້າຮ່ວມຂອງທ່ານ ພົນໂທ ແສງນວນ ໄຊຍະລາດ ປະທານສະຫະພັນນັກຮົບເກົ່າແຫ່ງຊາດລາວ, ມີທ່ານ ພັນເອກ ບົວຄໍາ ແກ້ວມະຫາວົງ ຫົວໜ້າກົມໂຄສະນາ-ອົບຮົມ ສນຫລ, ທ່ານ ພັນໂທແສງວັນດີ ວາໄຊຢີ ປະທານສະຫະພັນນັກຮົບເກົ່າ (ສນຂ)ແຂວງຫຼວງນໍ້າທາ, ຕາງໜ້າຫົວໜ້າກອງບັນຊາການ ປກຊ-ປກສ, ໂຄສະນາ-ອົບຮົມແຂວງ, ນັກວິທະຍາກອນຈາກ ສນຫລ ພ້ອມດ້ວຍສໍາມະນາກອນ 6 ແຂວງພາກເໜືອຄື: ສນຂ ຫຼວງນໍ້າທາ, ອຸດົມໄຊ, ຜົ້ງສາລີ, ບໍ່ແກ້ວ, ຫຼວງພະບາງ ແລະ ໄຊຍະບູລີເຂົ້າຮ່ວມ.
ທ່ານ ບຸນຊະນະ ຈະເລີນທັດ ຮອງຫົວໜ້າກົມໂຄສະນາ-ອົບຮົມ ສນຫລ ກ່າວວ່າ: ບັ້ນຝຶກອົບຮົມຄັ້ງນີ້ໄດ້ດຳເນີນມາເປັນເວລາ 5 ວັນ ຊຶ່ງເລີ່ມແຕ່ວັນທີ 6-10 /11/2023 ໄດ້ສໍາເລັດຜົນຢ່າງຈົບງາມ, ການຝຶກອົບຮົມໃນຄັ້ງນີ້ມີທັງພາກທິດສະດີ ແລະ ພາກປະຕິບັດຕົວຈິງ, ເນື້ອໃນທີ່ນຳມາຝຶກປະກອບມີ ພື້ນຖານວຽກງານໂຄສະນາ-ອົບຮົມ, ທີ່ຕັ້ງພາລະບົດບາດ, ໜ້າທີ່, ຂອບເຂດສິດ ແລະ ການເຄື່ອນໄຫວວຽກງານໂຄສະນາ-ອົບຮົມ ສນຫລ, ກົດໝາຍສື່ມວນຊົນ, ຄວາມສາມາດການຂຽນເອກະສານທາງລັດຖະການ, ບັນດານິຕິກໍາ ແລະບາງບົດຮຽນໃນການເຄື່ອນໄຫວປາຖະກະຖາ, ຄຸນລັກສະນະໃນການປາກເວົ້າຂອງນັກປາຖະກະຖາ,ຈັນຍາບັນຂອງນັກຂ່າວ, ການຂຽນຂ່າວ, ຂຽນບົດອອກທາງສື່, ເຕັກນິກການຖ່າຍພາບ-ວີດີໂອ, ການນໍາໃຊ້ກ້ອງຖ່າຍພາບ-ວີດີໂອ, ເຕັກນິກການສົ່ງຂ່າວທາງອິນເຕີເນັດອອກສື່ອອນລາຍ. ມີສໍາມະນາກອນມາຈາກ 6 ແຂວງພາກເໜືອ ແລະ ຈາກສະຫະພັນນັກຮົບເກົ່າເມືອງ ທີ່ຢູ່ອ້ອມຂ້າງແຂວງ, ຈາກກອງບັນຊາການທະຫານແຂວງ ແລະ ກອງບັນຊາການ ປກສ ແຂວງລວມ 26 ທ່ານ ຍິງ 6 ທ່ານ.
ຊຸດອົບຮົມຄັ້ງນີ້ຈັດຂຶ້ນເພື່ອຍົກລະດັບຄວາມຮູ້, ຄວາມສາມາດໃຫ້ຜູ້ຊີ້ນໍາວຽກງານໂຄສະນາ-ອົບຮົມ ແລະ ພະນັກງານທີ່ເຮັດວຽກງານຂ່າວສານຂອງນັກຮົບເກົ່າລາວ, 6 ແຂວງພາກເໜືອໃຫ້ສູງຂຶ້ນເປັນກ້າວໆ. ຜ່ານການຝຶກອົບຮົມຕົວຈິງວຽກງານໂຄສະນາ-ປາຖະກະຖາສາມາດປະເມີນຜົນໄດ້ 90%, ການຂຽນຂ່າວໄດ້ 100% ແລະ ຂຽນບົດອອກທາງສື່ໄດ້ 85%. ໃຫ້ກຽດມອບໃບຢັ້ງຢືນຂອງທ່ານ ພົນໂທ ແສງນວນ ໄຊຍະລາດ ພ້ອມທັງມອບໃບຍ້ອງຍໍໃຫ້ທ່ານ ຄຳຊາວ ກອງຈຳປາ ເຈົ້າຂອງໂຮງແຮມອຸດົມສິນ ທີ່ໄດ້ອຸປະຖຳບັ້ນຝຶກອົບຮົມໃນຄັ້ງນີ້.
    ໂອກາດນີ້, ທ່ານພົນໂທແສງນວນໄຊຍະລາດໄດ້ໃຫ້ກຽດໂອ້ລົມ ພ້ອມທັງເນັ້ນໜັກໃຫ້ສື່ມວນຊົນຕ້ອງກຳແໜ້ນທີ່ຕັ້ງ, ພາລະບົດບາດ ແລະ ໜ້າທີ່ອັນແທ້ຈິງຂອງຕົນເພື່ອໂຄສະນາເຜີຍແຜ່ໃຫ້ສັງຄົມ ແລະ ທຸກຊັ້ນຄົນໄດ້ຮັບຮູ້ ແລະ ເຂົ້າໃຈພ້ອມທັງເຂົ້າຮ່ວມສະໜັບສະໜູນດ້ວຍຄວາມເປັນເອກະພາບສູງ, ນັກໂຄສະນາແມ່ນຜູ້ປະຈັນບານຢູ່ແຖວໜ້າສະເໝີ ດັ່ງທີ່ແນວທາງຂອງພັກໄດ້ກ່າວໄວ້ວ່າ: “ຖືເອົາວຽກງານການເມືອງແນວຄິດເປັນກົກ”ຈົ່ງພາກັນນຳເອົາບົດຮຽນຄັ້ງນີ້ໄປນໍາໃຊ້ເຂົ້າໃນໜ້າທີ່ວຽກງານວິຊາສະເພາະແຕ່ລະຄົນ ໂດຍສະເພາະຜູ້ຊີ້ນຳວຽກງານໂຄສະນາ-ອົບຮົມ ສນຂ 6 ແຂວງພາກເໜືອນຳພາຊີ້ນຳວິຊາການວຽກງານສື່ມວນຊົນຂອງຕົນໃຫ້ສໍາເລັດຢ່າງມີຄຸນນະພາບ.
ຂ່າວ-ພາບ: ສນຫລ