ສນຫລ ປາຖະກະຖາວັນຊາດ ແລະ ວັນເກີດປະທານໄກສອນ ພົມວິຫານ 

ສະຫະພັນນັກຮົບເກົ່າແຫ່ງຊາດລາວ(ສນຫລ) ໄດ້ຈັດພິທີປາຖະກະຖາວັນຊາດທີ 2 ທັນວາ ຄົບຮອບ 48 ປີ (2 ທັນວາ 1975-2 ທັນວາ 2023) ແລະ ວັນເກີດປະທານ ໄກສອນ ພົມວິຫານ ຄົບຮອບ 103 ປີ (13 ທັນວາ 1920-13 ທັນວາ 2023) ຂຶ້ນໃນວັນທີ 8 ທັນວານີ້ ທີ່ ສນຫລ ໂດຍເປັນປະທານ ແລະ ໃຫ້ກຽດປາຖະກະຖາຂອງທ່ານ ພົນໂທ ແສງນວນ ໄຊຍະລາດ ເລຂາຄະນະບໍລິຫານງານພັກ ປະທານ ສນຫລ, ມີຮອງປະທານ, ມີບັດາຄະນະປະຈຳພັກ ພ້ອມດ້ວຍພະນັກງານ-ລັດຖະກອນເຂົ້າຮ່ວມ.
ທ່ານ ພົນໂທ ແສງນວນ ໄຊຍະລາດ ກ່າວວ່າ: ການປາຖະກະຖາໃນຄັ້ງນີ້ ຈັດຂຶ້ນເພື່ອໃຫ້ພະນັກງານ, ສະມາຊິກພັກມີຄວາມຮັບຮູ້-ເຂົ້າໃຈຢ່າງເລິກເຊິ່ງຕໍ່ຜົນງານແລະໄຊຊະນະອັນໃຫຍ່ຫຼວງຂອງປະຊາຊົນລາວບັນດາເຜົ່າພາຍໃຕ້ການນໍາພາຂອງພັກຕະຫຼອດໄລຍະ 48 ປີຜ່ານມາ, ເປັນການເພີ່ມທະວີຍົກສູງນໍ້າໃຈຮັກຊາດ, ເສີມຂະຫຍາຍຄວາມສາມັກຄີເປັນຈິດໜຶ່ງໃຈດຽວແລະຍູ້ແຮງບົດບາດການນໍາພາຂອງພັກໃນແຕ່ລະຂັ້ນໃຫ້ມີຄວາມເຂັ້ມແຂງຕໍ່ເນື່ອງ, ເສີມຂະຫຍາຍຜົນງານແລະສືບຕໍ່ຕັ້ງໜ້າຝຶກຝົນຫຼໍ່ຫຼອມຄຸນທາດການເມືອງຂອງສະມາຊິກພັກ, ພະນັກງານ-ລັດຖະກອນໃຫ້ມີຄວາມເຂັ້ມແຂງ, ອົດທົນຜ່ານຜ່າໃນສະພາບການທີ່ມີຄວາມຫຍຸ້ງຍາກທາງດ້ານເສດຖະກິດໃນປັດຈຸບັນແລະສືບຕໍ່ສ້າງໃຫ້ມີການຫັນປ່ຽນຢ່າງແຂງແຮງ, ເລິກເຊິ່ງແລະຮອບດ້ານ, ໃນທຸກວຽກງານທີ່ພັກ-ລັດແລະການຈັດຕັ້ງມອບໝາຍໃຫ້ຢ່າງມີຜົນສໍາເລັດໂດຍທ່ານໄດ້ຍົກໃຫ້ເຫັນມູນເຊື້ອ ແລະ ຄວາມໝາຍ-ຄວາມສຳຄັນຂອງວັນຊາດທີ 2 ທັນວາທີ່ມີມູນເຊື້ອອົງອາດແຫ່ງການຕໍ່ສູ້ຕ້ານການຮຸກຮານຂອງສັດຕູຈາກພາຍນອກ ແລະ ສ້າງສາພັດທະນາ; ສືບທອດມູນເຊື້ອອັນອົງອາດຂອງບັນພະບູລຸດລາວທີ່ໄດ້ສ້າງປະຫວັດສາດປະໄວ້; ປະຊາຊົນບັນດາເຜົ່າພາຍໃຕ້ການນຳພາຂອງພັກປະຊາຊົນ ປະຕິວັດລາວ ໄດ້ສາມັກຄີກັນຕໍ່ສູ້ຢ່າງພິລະອາດຫານຕ້ານການຮຸກຮານ ແລະ ການຄອບຄອງຂອງພວກລ່າເມືອງຂຶ້ນແບບເກົ່າ ແລະ ໃໝ່ຈົນສາມາດປົດປ່ອຍປະເທດຊາດໄດ້ຢ່າງມີໄຊ ແລະ ສາຖາປະນາ ສປປ ລາວຂຶ້ນຢ່າງສະຫງ່າຜ່າເຜີຍໃນວັນທີ 2 ທັນວາ 1975. ພ້ອມນັ້ນຍັງຍົກໃຫ້ເຫັນບັນດາເຫດການ ແລະ ໄຊຊະນະອັນຍິ່ງໃຫຍ່ຂອງກອງທັບ ແລະ ປະຊາຊົນລາວໃນຂະບວນການຕໍ່ສູ້ກູ້ຊາດ; ຜົນສຳເລັດຂອງການປະຕິບັດ 2 ໜ້າທີ່ຍຸດທະສາດ ແຕ່ໄລຍະ 10 ປີ ແຫ່ງການຟື້ນຟູເສດຖະກິດ, ວັດທະນະທຳ-ສັງຄົມ(1975-1985) ແລະ ພາຍຫຼັງປ່ຽນແປງໃໝ່ຈົນເຖິງປັດຈຸບັນ. ໃນນັ້ນຍັງຍົກໃຫ້ເຫັນການສືບຕໍ່ເສີມຂະຫຍາຍມູນເຊື້ອວັນຊາດ ທີ 2 ທັນວາ ເຂົ້າໃນການພັດທະນາປະເທດຊາດ.
ຫຼັງຈາກນັ້ນ ທ່ານ ພົນຈັດຕະວາ ຄຳໝັ້ນ ວັນນະວົງ ຮອງປະທານ ສນຫລ ຍັງໄດ້ປະຖາກະຖາວັນເກີດປະທານໄກສອນ ພົມວິຫານ ໂດຍຍົກໃຫ້ເຫັນແບບຢ່າງອັນດີເລີດຂອງປະທານ ໄກສອນ ພົມວິຫານ ໃນພາລະກິດປະຕິວັດປະເທດເຮົາ; ຊີວິດ ແລະ ການເຄື່ອນໄຫວປະຕິວັດ, ຜົນງານອັນໃຫຍ່ຫຼວງ, ການເປັນແບບຢ່າງອັນດີເລີດ ແລະ ອື່ນໆ ຂອງປະທານໄກສອນພົມວິຫານ.ການປາຖະກະຖາວັນດັ່ງກ່າວເພື່ອໃຫ້ຜູ້ເຂົ້າຮ່ວມໄດ້ທົບທວນຄືນມູນເຊື້ອແລະໄຊຊະນະປະຫວັດສາດຂອງພາລະກິດແຫ່ງການປົດປ່ອຍຊາດໃນເມື່ອກ່ອນກໍຄືພາລະກິດປົກປັກຮັກສາແລະພັດທະນາປະເທດຊາດພາຍໃຕ້ການຊີ້ນໍາ-ນໍາພາຂອງພັກປະຊາຊົນປະຕິວັດລາວ, ເພື່ອເປັນການລະນຶກເຖິງຄຸນງາມຄວາມດີຂອງປະທານໄກສອນພົມວິຫານທີ່ມີຕໍ່ປະເທດຊາດແລະຮໍ່າຮຽນເອົາມູນເຊື້ອປະຕິວັດ, ຄຸນທາດການເມືອງ, ຄຸນສົມບັດ, ສິນທໍາປະຕິວັດ, ແບບແຜນວິທີການເຮັດວຽກແລະການດໍາລົງຊີວິດຂອງປະທານໄກສອນພົມວິຫານໂດຍໃຫ້ຖືເອົາແນວຄິດໄກສອນພົມວິຫານເປັນທິດນໍາໃນການຈັດຕັ້ງປັບປຸງໜ້າທີ່ວຽກງານໃຫ້ບັນລຸເປົ້າໝາຍແລະມີປະສິດທິຜົນສູງ. 
                       (ຂ່າວ-ພາບ: ວັນເພັງ)