ສົມເດັດ ເຈົ້າຍິງ ໄອໂກະ ແຫ່ງ ປະເທດຍີ່ປຸ່ນ ຢ້ຽມຢາມໂຮງຮຽນ ມສ ວຽງຈັນ

ໂອກາດນີ້ ທ່ານ ສຸກັນດາ ສາລິນທະວົງ ຮອງຜູ້ອໍານວຍການໂຮງຮຽນ ມສ ວຽງຈັນ ໄດ້ຕາງໜ້າໃຫ້ຄະນະອໍານວຍການໂຮງຮຽນ ຂໍສະແດງຄວາມຂອບໃຈຢ່າງສຸດໃຈມາຍັງລັດຖະບານຍີ່ປຸ່ນ ສະຖານທູດຍີ່ປຸ່ນ ອົງການ Japan Foundation ທີ່ໄດ້ໃຫ້ການອູ້ມຊູຊ່ວຍເຫຼືອໃຫ້ມີການຈັດການຮຽນ-ການສອນພາ ສາຍີ່ປຸ່ນໃນໂຮງຮຽນຂອງພວກເຮົາ ນັບແຕ່ປີ 2015 ໂຮງຮຽນໄດ້ເລີ່ມການຈັດການຮຽນ-ການສອນພາສາຍີ່ປຸ່ນ ແລະ ເລີ່ມແຕ່ປີ 2016 ຈົນຮອດປັດຈຸບັນ ໂຮງຮຽນໄດ້ຕ້ອນຮັບຄູສອນຊ່ວຍພາສາຍີ່ປຸ່ນ(Nihongo partner) ລວມທັງໝົດ 9 ທ່ານ ປັດຈຸບັນ ໂຮງຮຽນພວກເຮົາມີນັກຮຽນທີ່ຮຽນພາສາຍີ່ປຸ່ນປະມານ 24%.

ຄູສອນຊ່ວຍພາສາຍີ່ປຸ່ນ(Nihongo partner)ເຮັດໃຫ້ການຮຽນ-ການສອນມີຊີວິດຊີວາຫຼາຍຂື້ນ ໂຮງຮຽນສາມາດເພີ່ມຫ້ອງຮຽນພາສາຍີ່ປຸ່ນ ພ້ອມກັນນັ້ນ ນັກຮຽນຍັງສາມາດຮຽນກັບເຈົ້າຂອງພາສາໄດ້ທຸກຫ້ອງຮຽນ.

ພ້ອມກັນນີ້ ນັກຮຽນຍັງມີໂອກາດທີ່ດີທີ່ສຸດ ໃນການແລກປ່ຽນຮີດຄອງປະເພນີ ວັດທະນະທໍາ ອັນດີງາມ ແລະ ຍາວນານຂອງປະເທດຍີ່ປຸ່ນໂດຍຜ່ານກິດຈະກໍາອາຫານ ສຽງເພງ ການນຸ່ງຖື ເປັນຕົ້ນ ແຕ່ລະປີໂຮງຮຽນໄດ້ຈັດງານສັບປະດາພາສາສາດ ເພື່ອສ້າງຄວາມເຂັ້ມແຂງໃນ 4 ທັກສະ ການໃຊ້ພາສາ ເຊິ່ງພາສາຍີ່ປຸ່ນກໍໄດ້ຮັບຄວາມສົນໃຈສູງ ນອກນັ້ນ ນັກຮຽນຍັງໄດ້ເຂົ້າຮ່ວມກິດຈະກໍາແຂ່ງເວົ້າພາສາຍີ່ປຸ່ນຈັດຂຶ້ນໂດຍສະຖານທູດຍີ່ປຸ່ນ ນັກຮຽນໄດ້ຮັບທຶນການສຶກສາເພື່ອໄປຮຽນຕໍ່ທີ່ປະເທດຍີ່ປຸ່ນປະມານ 2-3 ຄົນຕໍ່ປີ ແລະ ໄດ້ມີໂອກາດໄປທັດສະນະສຶກສາທີ່ປະເທດຍີ່ປຸ່ນປະມານ 10ຄົນຕໍ່ປີ ພາສາຍີ່ປຸ່ນເປັນທາງເລືອກທີ່ດີໃຫ້ນັກຮຽນໃນການປະກອບອາຊີບ ຫຼື ໄປຮຽນຕໍ່ທີ່ປະເທດຍີ່ປຸ່ນໃນອະນາຄົດ.