ສົງຄາມລະຫວ່າງ ອາເມ​ຣິກາ-ອິສຣາແອນ ​ກັບ ອີຣານ ເຮັດໃຫ້ເກີດວິກິດພະລັງງານ​ໜັກ​​ໜ່ວງທີ່ສຸດໃນປະຫວັດສາດ

ຂ່າວຕ່າງປະເທດລາຍງານ ໃນວັນທີ 20 ເມສາ ຜ່ານມາວ່າ: ຜູ້ບໍລິຫານທຸລະກິດໃນອັງກິດຄາດວ່າປັນຍາປະດິດ (AI) ຈະສົ່ງຜົນກະທົບຕໍ່ການຈ້າງງານໂດຍລວມຫຼຸດລົງໃນທົດສະວັດຕໍ່ໄປ, ໂດຍສະເພາະຕຳແໜ່ງງານລະດັບເລີ່ມຕົ້ນມີທ່າອ່ຽງທີ່ຈະໄດ້ຮັບຜົນກະທົບຫຼາຍທີ່ສຸດ.

ຂ່າວຕ່າງປະເທດລາຍງານ ໃນວັນທີ 21 ເມສາ ຜ່ານມາວ່າ: ອົງການສະຫະປະຊາຊາດ (UN) ໄດ້ເປີດເຜີຍບົດລາຍງານການສຳຫຼວດເສດຖະກິດ ແລະ ສັງຄົມ ຂອງອາຊີ-ປາຊີຟິກ ປະຈຳປີ 2026 ໂດຍລະບຸວ່າ, ຂໍ້ຂັດແຍ່ງທີ່ເກີດຂຶ້ນໃນຕາເວັນອອກກາງ ກຳລັງເພີ່ມຄວາມກົດດັນຄັ້ງໃໝ່ຕໍ່ທ່າອ່ຽງເສດຖະກິດຂອງອາຊີ-ປາຊີຟິກ, ໂດຍສົ່ງຜົນກະທົບຕໍ່ຕະຫຼາດພະລັງງານ ແລະ ສິນຄ້າ, ພ້ອມທັງເສັ້ນທາງການຄ້າ ແລະ ການເຊື່ອມຕໍ່, ໃນໄລຍະທີ່ເສດຖະກິດໂລກມີຄວາມບໍ່ແນ່ນອນສູງຢູ່ແລ້ວ.

ຂ່າວຕ່າງປະເທດລາຍງານ ໃນວັນທີ 20 ເມສາ ຜ່ານມາວ່າ: ຜົນການສຳຫຼວດຫຼ້າສຸດຂອງສະຖາບັນສົ່ງເສີມເສດຖະກິດ ແລະ ສັງຄົມດີຈີຕອນ ຂອງຍີ່ປຸ່ນ (JIPDEC) ຊີ້ໃຫ້ເຫັນວ່າ, ມີບໍລິສັດຍີ່ປຸ່ນຢ່າງໜ້ອຍ 222 ແຫ່ງ ທີ່ຍອມຈ່າຍເງິນຄ່າໄຖ່ໃຫ້ກັບແຮກເກີ ທີ່ໃຊ້ Ransomware (ຊັອຟແວຮຽກຮ້ອງຄ່າໄຖ່), ແຕ່ປະມານ 60% ຂອງບໍລິສັດເຫຼົ່ານັ້ນຍັງບໍ່ສາມາດກູ້ຄືນຂໍ້ມູນຂອງເຂົາເຈົ້າໄດ້.

ວິທະຍຸກະຈາຍສຽງຫວຽດນາມລາຍງານວ່າ: ໃນ​ວັນ​ທີ 20 ເມ​ສາ ຜ່ານມາ ຢູ່ນະຄອນຫຼວງ​ຮ່າ​ໂນ້ຍ, ທ່ານ ໂຕ​ເລິມ ເລ​ຂາ​ທິ​ການ​ໃຫຍ່ຄະ​ນະ​ບໍ​ລິ​ຫານ​ງານ​ສູນ​ກາງ​ພັກ​ກອມ​ມູນິດ ຫວຽດ​ນາມ ປະ​ເທດ​ປະ​ເທດ ຫວຽດ​ນາມ ໄດ້​ເຂົ້າ​ຮ່ວມ ແລະ ເປັນ​ປະ​ທານ​ການ​ພົບ​ປະ​ຄະ​ນະ​ສະ​ມາ​ຊິກ​ສະ​ພາ​ແຫ່ງ​ຊາດ​ຊຸດ​ທີ XVI ທີ່​ເປັນ​ຊາວ​ເຜົ່າ​ສ່ວນ​ໜ້ອຍ.

​ຂ່າວສານຊີອາໄອລາຍງານວ່າ: ຫວ່າງ​ມໍ່ໆ​ມາ​ນີ້, ທ່ານ​ ສີ​ຈິ້ນ​ຜິງ ປະ​ທານ​ປະ​ເທດ​ຈີນ ໄດ້​ພົບ​ປະ​ກັບມຸງ​ກຸດ​ຣາ​ຊະ​ກຸ​ມານ​ແຫ່ງ​ອາ​ບູ​ດາ​ບີ​ ສະ​ຫະ​ລັດ ​ອາ​ຣັບ ​ເອ​ມີ​ເຣດ, ທ່ານ​ ເປ​ໂດ​ຣ ຊານ​ເຊັ​ສ ນາ​ຍົກ​ລັດ​ຖະ​ມົນ​ຕີ​ແອັດ​ສະ​ປາຍ, ທ່ານ ​ເຊີ​ເກລັ​ຟ​ລົ​ຟ ລັດ​ຖະ​ມົນ​ຕີ​ກະ​ຊວງ​ການ​ຕ່າງ​ປະ​ເທດ​ຣັດ​ເຊຍ ແລະ ທ່ານ​ ໂຕ​ເລີມ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ປະທານປະເທດຫວຽດນາມ ຢູ່​ນະ​ຄອນຫຼວງ​ປັກ​ກິ່ງ ​ຕາມ​ລຳ​ດັບ.

ຂ່າວສານຊີອາໄອລາຍງານວ່າ: ຫວ່າງມໍ່ໆມານີ້, ຜູ້​ຊ່ຽວ​ຊາຍ​ດ້ານ​ອຸດ​ສາ​ຫະ​ກຳ​ການ​ບິນ​ກ່າວ​ວ່າ, ໃນຫຼາຍ​ເດືອນ​​ຂ້າງ​ໜ້າ, ນັກ​ທ່ອງ​ທ່ຽວ​ທົ່ວ​ໂລກ​ຕ້ອງ​ທຳ​ໃຈ​ກຽມ​ພ້ອມ​ຮັບ​ມື​ກັບ​ຖ້ຽວ​ບິນ​ຖືກ​ຍົກ​ເລີກ, ​ເສັ້ນ​ທາງ​ການ​ບິນຫຼຸດ​ໜ້ອຍ​ລົງ ແລະ​ ລາຄາ​​ປີ້​ເຮືອ​ບິນເພີ່ມ​ຂຶ້ນ, ເພາະ​ວ່າ​ບໍ​ລິ​ສັດ​ການ​ບິນຫຼາຍ​ແຫ່ງ​ພວມ​ເຂົ້າ​ສູ່​ໄລ​ຍະ​ປ້ອງ​ກັນ​ຕົນ​ເອງ​​ເພື່ອໃຫ້​ຢູ່​ລອດ ​ໂດຍ​ຜ່ານ​ການຫຼຸດ​ຖ້ຽວ​ບິນ​ໃຫ້​ໜ້ອຍ​ລົງ ແລະ ​ເພີ່ມ​ລາ​ຄາ​ປີ້​ເຮືອ​ບິນ ເພື່​ອ​ຮັບ​ມືກັບ​ສະ​ພາບ​ການ​​ບໍ່​ເອື້ອ​ອຳ​ນວຍຕ່າງໆ ຄື: ນ້ຳ​ມັນ​ເຊື້ອ​ໄຟ​ການ​ບິນ​ມີກ​ານ​ຕອບ​ສະ​ໜອງ​ບໍ່​ພຽງ​ພໍ ແລະ ​​ມີລາ​ຄາ​ເພີ່ມ​ຂຶ້ນ​ຢ່າງຫຼວງຫຼາຍເປັນ​ຕົ້ນ.

ຂ່າວສານຊີອາໄອລາຍງານວ່າ: ງານວາງສະແດງສິນຄ້າກວາງໂຈ່ວຄັ້ງທີ 139 ໄລຍະທີ 1 ໄດ້ສິ້ນສຸດລົງໃນວັນທີ 19 ເມສາ ຜ່ານມາ, ໂດຍໄດ້ສະແດງໃຫ້ເຫັນຜົນງານ​ດ້ານນະວັດຕະກຳຂອງລະບົບອຸດສາຫະກຳທີ່ກ້າວໜ້າຂອງຈີນຢ່າງຄົບຊຸດ.

ຂ່າວຕ່າງປະເທດລາຍງານວ່າ: ອົງການພະລັງງານສາກົນ (IEA) ໄດ້ອອກບົດລາຍງານການທົບທວນພະລັງງານໂລກໃນວັນທີ 20 ເມສາ ຜ່ານມາ ໂດຍລະບຸວ່າ, ປະລິມານການໃຊ້ໄຟຟ້າທົ່ວໂລກ ໃນປີ 2025 ເພີ່ມຂຶ້ນ 3%, ໂດຍສ່ວນໜຶ່ງແມ່ນຍ້ອນຄວາມຕ້ອງການລົດໄຟຟ້າ (EV) ແລະ ສູນຂໍ້ມູນ (Data Center) ທີ່ເພີ່ມຂຶ້ນຢ່າງໄວວາ. ເຖິງຢ່າງໃດກໍຕາມ, ຕົວຂັບເຄື່ອນຫຼັກຍັງຄົງເປັນຂະແໜງອຸດສາຫະກຳ, ເຄື່ອງໃຊ້ໄຟຟ້າໃນຄົວເຮືອນ ແລະ ອາຄານການຄ້າ.

ຂ່າວຕ່າງປະເທດລາຍງານວ່າ: ໃນຕອນບ່າຍຂອງວັນທີ 20 ເມສາ ຜ່ານມາ, ຍີ່ປຸ່ນໄດ້ລາຍງານພົບຄື້ນສຶນາມິຢູ່ບໍລິເວນນອກຊາຍຝັ່ງຂອງແຂວງອິວາເຕະ ແລະ ແຂວງອາໂອໂມຣິ ໃນມະຫາສະໝຸດປາຊີຟິກ ຫຼັງຈາກເກີດແຜ່ນດິນໄຫວຂະໜາດ 7.5 ຣິກເຕີ ຢູ່ນອກຊາຍຝັ່ງຂອງຊັນຣິກຸ ທາງພາກຕາເວັນອອກສ່ຽງເໜືອຂອງຍີ່ປຸ່ນ. ໂດຍທີ່ທ່າເຮືອຄູຈິ ໃນແຂວງອິວາເຕະ ວັດແທກຄື້ນໄດ້ສູງເຖິງ 80 ຊັງຕີແມັດ.

ວິທະຍຸກະຈາຍສຽງຫວຽດນາມລາຍງານວ່າ: ໃນ​ວັນ​ທີ 20 ເມ​ສາ ຜ່ານມາ ຢູ່ນະຄອນຫຼວງ​ຮ່າ​ໂນ້ຍ, ໂດຍ​ສືບ​ຕໍ່ວາ​ລະ​ດຳ​ເນີນກອງ​ປະ​ຊຸມ​ຄັ້ງ​ປະ​ຖົມ​ມະ​ລືກ ສະ​ພາ​ແຫ່ງ​ຊາດ​ຊຸດ​ທີ XVI, ພ​າຍ​ໃຕ້​ການ​ເປັນ​ປະ​ທານ​ຂອງ​ທ່ານ​ ເຈິ່ນ​ແທັງ​ເໝີ້ນ ປະ​ທານ​ສະ​ພາ​ແຫ່ງ​ຊາດ ຫວຽດ​ນາມ ແລະ ການ​ບໍ​ລິ​ຫານ​ຂອງ​ທ່ານ​ນາງ ຫງວຽນ​ທິ​ຮົ່ງ ຮອງ​ປະ​ທານ​ສະ​ພາ​ແຫ່ງ​ຊາດ, ສະ​ພາ​ແຫ່ງ​ຊາດ​ໄດ້​ສຸມ​ໃສ່​ປຶກ​ສາ​ຫາ​ລື​ກ່ຽວ​ກັບ​ການ​ພັດ​ທະ​ນາ​ເສດ​ຖະ​ກິດ​-ສັງ​ຄົມ, ໃນ​ນັ້ນ, ມີຫຼາຍ​ຄຳ​ເຫັນ​ຂອງ​ສະ​ມາ​ຊິກ​ສະ​ພາ​ແຫ່ງ​ຊາດ​ໄດ້​ປຶກ​ສາ​ຫາ​ລື​ກ່ຽວ​ກັບ​ແຜນ​ການ​ພັດ​ທະ​ນາ​ເສດ​ຖະ​ກິດ​-ສັງ​ຄົມ ໄລ​ຍະ 5 ປີ 2026 – 2030 ດ້ວຍຫຼາຍ​ມາດ​ຕະ​ການ​ລະອຽດ.