ສົນທິສັນຍາ ຮ່າໂນ້ຍ ໄດ້ສົ່ງສານ 3 ຂໍ້ຢ່າງຈະແຈ້ງ ຊຶ່ງມີຄວາມໝາຍເລິກເຊິ່ງ ແລະ ຍາວນານຕໍ່ກັບໂລກ ຄື: ໜຶ່ງ, ຢືນຢັນຄຳໝັ້ນສັນຍາກຳນົດຮູບແບບຄວາມເປັນລະບຽບຮຽບຮ້ອຍ, ຄວາມປອດໄພທາງໄຊເບີບົນພື້ນຖານກົດໝາຍສາກົນ. ສອງ, ຖືຈິດໃຈແບ່ງປັນ, ຮ່ວມເດີນທາງ ແລະ ໜູນຊ່ວຍຊຶ່ງກັນ ແລະ ກັນ. ສາມ, ເນັ້ນໜັກເຖິງເປົ້າໝາຍສູງສຸດຂອງຄວາມມານະພະຍາຍາມແມ່ນເພື່ອປະຊາຊົນ, ເພື່ອໃຫ້ເຕັກໂນໂລຊີຮັບໃຊ້ການດຳລົງຊີວິດ, ການພັດທະນາ ນຳມາຊຶ່ງໂອກາດໃຫ້ທຸກສິ່ງທຸກຢ່າງ ແລະ ບໍ່ປະໃຫ້ຜູ້ໃດຖືກຕົກຢູ່ເບື້ອງຫຼັງໃນວິວັດການຫັນໂລກເປັນດີຈີຕອນ.

ທ່ານປະທານປະເທດຫວຽດນາມ ຢືນຢັນວ່າ: ສານດັ່ງກ່າວ, ສະແດງໃຫ້ເຫັນຢ່າງຈະແຈ້ງເຖິງຈິດໃຈແກ່ນສານຂອງສົນທິສັນຍາຮ່າໂນ້ຍ, ເປັນສົນທິສັນຍາຂອງການເຄົາລົບກົດໝາຍ, ຂອງການຮ່ວມມື ແລະ ຂອງປະຊາຊົນ. ນັ້ນແມ່ນທິດທາງທີ່ຫວຽດນາມຢຶດໝັ້ນເດີນຕາມ ໃນວິວັດທະນາການເຊື່ອມໂຍງເຂົ້າກັບສາກົນ. ຫວຽດນາມ ເປັນເຈົ້າພາບຈັດພິທີລົງນາມ ແລະ ແມ່ນປະເທດທຳອິດລົງນາມສົນທິສັນຍາຮ່າໂນ້ຍ ໄດ້ເປັນສິ່ງພິສູດໃຫ້ເຫັນຄຳໝັ້ນສັນຍາຂອງພວກຂ້າພະເຈົ້າຕໍ່ການເຄົາລົບກົດໝາຍ, ປະຕິບັດພັນທະສາກົນຢ່າງຄົບຖ້ວນ ແລະ ປະກອບສ່ວນປັບປຸງຄວາມເປັນລະບຽບຮຽບຮ້ອຍດ້ານນິຕິກຳທົ່ວໂລກໃນທາງໄຊເບີ.

ທ່ານ ອັນໂຕນີໂອ ກູເຕີເຣັສ ເລຂາທິການໃຫຍ່ສະຫະປະຊາຊາດ ຢືນຢັນວ່າ: ສົນທິສັນຍາດັ່ງກ່າວແມ່ນຄຳໝັ້ນສັນຍາປົກປ້ອງບັນດາສິດພື້ນຖານຂອງມະນຸດ, ລວມມີສິດສ່ວນຕົວ, ກຽດສັກສີ ແລະ ຄວາມປອດໄພ, ທັງໃນໂລກຕົວຈິງ ແລະ ພື້ນທີ່ດີຈີຕອນ. ແມ່ນສິ່ງພິສູດໃຫ້ເຫັນກຳລັງແຮງຂອງລັດທິຫຼາຍຝ່າຍ, ສະແດງໃຫ້ເຫັນເມື່ອບັນດາປະເທດຮ່ວມມືກັນ, ພວກເຮົາຈະສາມາດຊອກຫາມາດຕະການແກ້ໄຂບັນດາສິ່ງທ້າທາຍທົ່ວໂລກໄດ້.

ຕາມແຜນການ, ບັນດາສະມາຊິກສົນທິສັນຍາຈະຈັດກອງປະຊຸມໃນເດືອນມັງກອນ ປີ 2026 ຢູ່ ນະຄອນຫຼວງວຽນ ປະເທດໂອຕຣິດ ເພື່ອປຶກສາຫາລືຫຼັກເກນລະບຽບການໃຫ້ແກ່ບັນດາປະເທດທີ່ເຂົ້າຮ່ວມກອງປະຊຸມໃນອະນາຄົດ.