ດ້ານການປູກຝັງແມ່ນສືບຕໍ່ສູ້ຊົນຜະລິດ ພືດສິນຄ້າ ທີ່ມີທ່າແຮງ ແລະ ເປັນບຸລິມະສິດ ໃຫ້ໄດ້ທັງໝົດ 736,010 ເຮັກຕາ ຜົນຜະລິດ 11.27 ລ້ານໂຕນ ເປັນຕົ້ນແມ່ນ ກາເຟ 179,000 ໂຕນ, ສາລີແຂງ 547,300 ໂຕນ, ອ້ອຍ 1.72 ລ້ານ ໂຕນ, ມັນຕົ້ນ 7.48 ລ້ານໂຕນ, ກ້ວຍ 756,000 ໂຕນ, ໝາກໂມ 159,990 ໂຕນ, ພືດປະເພດຖົ່ວ 162,250 ໂຕນ ແລະ ພືດອື່ນໆ; ນອກຈາກນັ້ນ, ກໍສົ່ງເສີມການຜະລິດພືດອື່ນໆຕາມເງື່ອນໄຂຕາມທ່າແຮງ.ຂະນະທີ່ການລ້ຽງສັດ, ສູ້ຊົນຜະລິດ ແລະ ສະໜອງງົວເປັນ ສຳລັບການສົ່ງອອກໃຫ້ບັນລຸ 50,000 ໂຕຕໍ່ປີ ຈະຕ້ອງຮັບປະກັນໃຫ້ມີຝູງແມ່ພັນງົວພັນດີຢ່າງໜ້ອຍ 62,500 ແມ່; ສ້າງໃຫ້ມີສູນຜະລິດນໍ້າເຊື້ອ ແລະ ຂະຫຍາຍແນວພັນງົວຢ່າງໜ້ອຍ 1 ແຫ່ງ; ສົ່ງເສີມການປູກຫຍ້າພັນປັບປຸງ ໃຫ້ບັນລຸ 90,000 ເຮັກຕາ; ຜະລິດ ແລະ ສະໜອງຢາກັນພະຍາດສັດ ໃຫ້ໄດ້ 10 ລ້ານເຂັມ, ຕ້ອງຮັກສາ ສະຖານະພາບເປັນປະເທດປອດພະຍາດ ອະທິວາ ງົວ-ຄວາຍ; ສໍາລັບແນວພັນໝູ ເພື່ອຜະລິດລູກ ສູ້ຊົນໃຫ້ເພີ່ມຈາກ 33,100 ແມ່ ເປັນ 42,800 ແມ່ ເພື່ອຜະລິດໝູຊີ້ນໃຫ້ໄດ້ 941,600 ໂຕ ແມ່ນພຽງພໍຕໍ່ການສະໜອງ ການບໍລິໂພກພາຍໃນ; ສ້າງໃຫ້ມີລະບົບສະໜອງແນວພັນສັດປີກ 20% ຂອງຄວາມຕ້ອງການ; ເພີ່ມການຜະລິດອາຫານສັດຈາກ 60% ໃນປັດຈຸບັນ ໃຫ້ເປັນ 70% ແລະ ໃຫ້ມີການຜະລິດອາຫານປາ ພາຍໃນໃຫ້ກຸ້ມ 25% ຂອງຄວາມຕ້ອງການ, ສູ້ຊົນສະໜອງລູກປາໃຫ້ບັນລຸ 75% ຂຶ້ນໄປຂອງຄວາມຕ້ອງການ.
ເພື່ອໃຫ້ບັນລຸຄາດໝາຍດັ່ງກ່າວ ຕ້ອງໄດ້ມີແຜນການ ແລະ ມາດຕະການ ດຸ່ນດ່ຽງການຜະລິດ ແລະ ການບໍລິໂພກ, ມີການຈັດຕັ້ງການຜະລິດ ເປັນກຸ່ມສະຫະກອນ, ເປັນຟາມແບບຫົວໜ່ວຍຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ (MSMEs)ມີນະໂຍບາຍສົ່ງເສີມການຜະລິດການປຸງແຕ່ງເພີ່ມມູນຄ່າ ແລະ ຄຸນນະພາບ ຂອງຜະລິດຕະພັນ, ການເຂົ້າເຖິງສິນເຊື່ອ ແລະ ຕະຫຼາດ, ການຂົນສົ່ງຈໍລະຈອນ ພ້ອມທັງມີມາດຕະການຊ່ວຍໜູນ ເພື່ອຫຼຸດຜ່ອນຜົນກະທົບຈາກໄພພິບັດ. ພ້ອມກັນນັ້ນ, ກໍມີແຜນການ ແລະ ມາດຕະການ ຄຸ້ມຄອງພັດທະນາທີ່ດິນກະສິກໍາ, ການພັດທະນາຊົນລະກະເສດ, ມີການຄົ້ນຄວ້າທົດລອງທາງວິທະຍາສາດດ້ານກະສິກໍາ, ປ່າໄມ້ ແລະ ພັດທະນາຊົນນະບົດ, ພ້ອມທັງ ມີກົນໄກປະສານສົມທົບ ກັບກະຊວງທີ່ກ່ຽວຂ້ອງຢ່າງໜັກແໜ້ນ ແລະ ມີປະສິດທິຜົນ.
ເພື່ອສ້າງມູນຄ່າສິນຄ້ານັ້ນ, ການຜະລິດກໍຕ້ອງຕິດພັນກັບການປຸງແຕ່ງ ຊຶ່ງກະຊວງກະສິກຳ ແລະ ປ່າໄມ້ ກໍໄດ້ເອົາໃຈໃສ່ໃນການສືບຕໍ່ຊຸກຍູ້ການສົ່ງເສີມຊາວກະສິກອນນໍາໃຊ້ກົນຈັກກະສິກໍາ ເຂົ້າໃນການປູກເຂົ້າ ໃຫ້ໄດ້ 95%; ໃນນັ້ນ, ການປູກສາລີ ໃຫ້ໄດ້ 92%, ປູກມັນຕົ້ນ 92%, ປູກອ້ອຍ 97%, ປູກພືດຜັກ ໃຫ້ໄດ້ 30%;ສືບຕໍ່ຊຸກຍູ້ ແລະ ສົ່ງເສີມ ການຜະລິດແນວພັນເຂົ້າລຸ້ນ3 ໃຫ້ໄດ້ ບໍ່ຫຼຸດ 10,000 ໂຕນ/ປີ ແລະ ຜະລິດແນວ ພັນດີ 30,000 ໂຕນ/ປີ;ສືບຕໍ່ຊຸກຍູ້ສົ່ງເສີມ ຊາວກະສິກອນໃຫ້ນໍາໃຊ້ແນວພັນລຸ້ນ 3 ແລະ ແນວພັນປັບປຸງທີ່ດີ ໃຫ້ໄດ້ 60% ໃນ ຂອບເຂດທົ່ວປະເທດ ໃນນັ້ນການນໍາໃຊ້ແນວພັນລຸ້ນ3 ໃຫ້ເພີ່ມຂຶ້ນ 35%;ສືບຕໍ່ຈັດຝຶກອົບຮົມເຕັກນິກການຜະລິດ ແລະ ການກວດສອບຄຸນນະພາບແນວພັນເຂົ້າລຸ້ນ3 ແລະ ແນວພັນເຂົ້າທີ່ດີ ໃຫ້ແກ່ບັນດາກຸ່ມ ແລະ ພະນັກງານທ້ອງຖິ່ນ ຈໍານວນ 18 ຄັ້ງ ແລະ ຝຶກອົບຮົມການຜະລິດແນວພັນ ພືດຜັກໃຫ້ແກ່ພະນັກງານທ້ອງຖິ່ນ ແລະ ຜູ້ປະກອບການ 6 ຄັ້ງ.
ພ້ອມນີ້, ການຜະລິດເປັນສິນຄ້າ ນອກຈາກຕິດພັນກັບການປຸງແຕ່ງ ກໍຍັງຕ້ອງຕິດພັນກັບການສົ່ງອອກ ຜະລິດສິນຄ້າກະສິກຳ ໃຫ້ຢູ່ໃນມາດຕະຖານຂອງຄູ່ຄ້າທັງພາຍໃນ ແລະ ຕ່າງປະເທດ ຊຶ່ງກະຊວງກະສິກຳ ແລະ ປ່າໄມ້ ກໍໄດ້ສຸມໃສ່ຊຸກຍູ້ການຜະລິດ ຄຽງຄູ່ກັບການເຈລະຈາເຕັກນິກເປີດຕະຫຼາດ ແລະ ການສົ່ງອອກ ຊຶ່ງໃນປີນີ້ ກໍໄດ້ວາງຄາດໝາຍສູ້ຊົນ ເຮັດໃຫ້ມູນຄ່າການສົ່ງອອກຜະລິດຕະພັນດ້ານກະສິກໍາ ແລະ ປ່າໄມ້ ໃຫ້ໄດ້ 1,500 ລ້ານໂດລາ;ໃນນັ້ນ, ພືດ ແລະ ຜະລິດຕະພັນພືດ 1,100 ລ້ານໂດລາ, ສັດ ແລະ ຜະລິດຕະພັນສັດ 100 ລ້ານໂດລາ ແລະ ໄມ້, ຜະລິດຕະພັນໄມ້, ຢາງພາລາ ແລະ ເຄື່ອງປ່າຂອງດົງ 300 ລ້ານໂດລາ, ໂດຍການກໍານົດໂຄງປະກອບການຜະລິດກະສິກໍາ ໃນດ້ານການປູກຝັງ ແລະ ລ້ຽງສັດ ເປັນຕົ້ນບັນດາລາຍການສິນຄ້າ ທີ່ໄດ້ເຊັນສັນຍາກັບປະເທດຄູ່ຄ້າ ເພື່ອສົ່ງອອກແລ້ວ; ຮັບປະກັນມີສິນຄ້າ ກະສິກໍາ ທີ່ສະອາດ, ປອດໄພ ຈໍລະຈອນພາຍໃນ ແລະ ມີສ່ວນສົ່ງອອກຕ່າງປະເທດ, ໂດຍແຕ່ລະແຂວງ ມີໂຄງປະກອບການຜະລິດກະສິກໍາ ຕາມສະພາບທ່າແຮງຂອງທ້ອງຖິ່ນ, ມີການກໍານົດຈຸດສຸມເຂດຜະລິດສະເພາະຈະແຈ້ງ.
ພ້ອມດຽວກັນນັ້ນ, ກໍຈະສຸມໃສ່ ສືບຕໍ່ເຈລະຈາດ້ານສຸຂານາໄມ ພືດ ແລະ ສັດ (SPS) ກັບປະເທດຄູ່ຄ້າເຊັ່ນ: ສປ ຈີນ 21 ລາຍການ (ພືດ 19 ແລະ ສັດ 2 ລາຍການ) ເປັນຕົ້ນແມ່ນ ຖົ່ວລຽນ, ໝາກລໍາໄຍ, ໝາກມີ້, ໝາກມັງກອນ ແລະ ອື່ນໆ; ສສຫວຽດນາມ 4 ລາຍການ (ກາເຟ, ຢາງພາລາ, ຖົ່ວດິນ, ໃບຢາສູບ) ແລະ ປະເທດໄທ 5 ລາຍການ (ໝາກມັງກອນ, ໝາກນັດ, ເປືອກຕົ້ນຢາສູບ, ໝາກສະຕໍເບີລີ້ ແລະ ແກ່ນຖົ່ວດິນ); ສືບຕໍ່ເຈລະຈາດ້ານສຸຂານາໄມ ເພື່ອສົ່ງອອກຜະລິດຕະພັນຊີ້ນ ແລະ ປາ ກັບ ສປ ຈີນ ແລະ ສສ ຫວຽດນາມ.ສໍາລັບການສົ່ງອອກສັດໃຫຍ່ ສູ້ຊົນສົ່ງອອກໃຫ້ບັນລຸ 50,000 ໂຕຕໍ່ປີ, ຜະລິດນໍ້ານົມງົວ ໃຫ້ໄດ້ 50,000 ໂຕນແລະ ຈະສືບຕໍ່ເຈລະຈາເປີດຕະຫຼາດຜະລິດຕະພັນຊີ້ນ ໃຫ້ສໍາເລັດ; ຈະສຸມໃສ່ຈັດຕັ້ງປະຕິບັດໃນເຂດຈຸດສຸມບຸລິມະສິດ ໂດຍສະເພາະແມ່ນເຂດຕາມແລວທາງລົດໄຟ ລາວ-ຈີນ ແລະ ບັນດາແຂວງ ທີ່ມີທ່າແຮງ ແລະ ມີຖານການຜະລິດ ພ້ອມທັງເລັ່ງສຸມໃສ່ ສືບຕໍ່ເຈລະຈາ ກ່ຽວກັບການສົ່ງອອກຜະລິດຕະພັນຊີ້ນ (ຊີ້ນແຫ້ງ, ຊີ້ນແຊ່ແຂງ....) ເພື່ອຮອງຮັບໃຫ້ແກ່ຜູ້ປະກອບການ ທີ່ໄດ້ເຊັນສັນຍາ ກ່ຽວກັບ ໂຄຕ້າ ກັບ ຄູ່ຄ້າ ຝ່າຍຈີນແລ້ວນັ້ນ.
(ພາບປະກອບໂຫຼດຈາກອອນລາຍ)
ຄໍາເຫັນ