ໂດຍ: ບິກໄຊ ສົມພູ
ກອງບັນຊາການທະຫານແຂວງວຽງຈັນ ແມ່ນກຳລັງປະກອບອາວຸດທ້ອງຖິ່ນໜຶ່ງທີ່ຢູ່ໃນລະບົບໂຄງປະກອບການຈັດຕັ້ງຂອງກອງທັບປະຊາຊົນລາວເຮັດໜ້າທີ່ເປັນເສນາທິການໃຫ້ແກ່ກະຊວງປ້ອງກັນປະເທດ ແລະ ຄະນະກຳມະການປ້ອງກັນຊາດ-ປ້ອງກັນຄວາມສະຫງົບແຂວງວຽງຈັນ, ມີຄວາມຮັບຜິດຊອບໃນການຈັດຕັ້ງຜັນຂະຫຍາຍແນວທາງປ້ອງກັນຊາດ-ປ້ອງກັນຄວາມສະຫງົບຮອບດ້ານ ແລະ ປັບປຸງກໍ່ສ້າງກຳລັງໃຫ້ມີຄວາມເຂັ້ມແຂງໜັກແໜ້ນ ທັງຮັບປະກັນເຮັດໃຫ້ທ້ອງຖິ່ນແຂວງມີຄວາມສະຫງົບຢ່າງໜັກແໜ້ນ.ດັ່ງນັ້ນ, ເພື່ອກະກຽມ ແລະ ຈັດຕັ້ງສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ໃຫ້ເປັນຂະບວນການຟົດຟື້ນກວ້າງຂວາງ ແລະ ມີຜົນສຳເລັດເປັນຢ່າງດີ, ພາຍຫຼັງໄດ້ຮັບຄຳສັ່ງແນະນຳຂອງຄະນະເລຂາທິການສູນກາງພັກ, ຄຳສັ່ງແນະນຳຂອງລັດຖະມົນຕີກະຊວງປ້ອງກັນປະເທດ, ຄະນະພັກ-ຄະນະບັນຊາກອງບັນຊາການທະຫານແຂວງວຽງຈັນໄດ້ຊຸກຍູ້ສ້າງຂະບວນການຫຼາຍດ້ານປິ່ນອ້ອມ 4 ໜ້າທີ່ໃຫຍ່ 26 ແຜນງານທີ່ຄະນະພັກກະຊວງປ້ອງກັນປະເທດວາງອອກ ເພື່ອຂໍ່ານັບຮັບຕ້ອນວັນທີ່ມີຄວາມໝາຍສຳຄັນທາງດ້ານປະຫວັດສາດຂອງກອງທັບເຮົາ.
ສະຫາຍ ພັນເອກ ບຸນຜອງ ບຸດທະວົງ ຫົວໜ້າການເມືອງກອງບັນຊາການທະຫານແຂວງວຽງຈັນໃຫ້ຮູ້ວ່າ: ໂດຍເຊື່ອມຊຶມບັນດາຄຳສັ່ງແນະນຳດັ່ງກ່າວຄະນະພັກ-ຄະນະບັນຊາ, ກອງບັນຊາການທະຫານແຂວງໄດ້ເປີດກອງປະຊຸມແຕ່ງຕັ້ງຄະນະຊີ້ນຳລວມ ແລະ ອະນຸກຳມະການດ້ານຕ່າງໆຢູ່ກອງບັນຊາການ ແລະ ໄດ້ມອບໝາຍໜ້າທີ່ໃຫ້ບັນດາອະນຸກຳມະການພາກສ່ວນຕ່າງໆສ້າງແຜນການເຄື່ອນໄຫວມາຮອດປັດຈຸບັນໄດ້ເປີດກອງປະຊຸມຈັບມືແຂ່ງຂັນສ້າງຂະບວນການໄລຍະສັ້ນພາຍໃຕ້ຄຳຂວັນຮັກຊາດ ແລະ ພັດທະນາ ເພື່ອຂໍ່ານັບຮັບຕ້ອນວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ໂດຍຕິດພັນກັບການຈັດຕັ້ງປະຕິບັດວຽກງານທີ່ປິ່ນອ້ອມ 4 ໜ້າທີ່ໃຫຍ່ 26 ແຜນງານຂອງຄະນະພັກກະຊວງວາງອອກ. ໃນນີ້ວຽກງານຂະບວນການທີ່ພົ້ນເດັ່ນແມ່ນໄດ້ສຸມໃສ່ເຮັດວຽກງານຮັບປະກັນໃຫ້ສະພາບມີຄວາມສະຫງົບໄດ້ຈັດຕັ້ງເອົາພະນັກງານລົງກໍ່ສ້າງຮາກຖານການເມືອງຢູ່ 7 ບ້ານເປົ້າໝາຍຂອງເມືອງກາສີ, 7 ບ້ານລຽບຕາມຊາຍແດນຂອງເມືອງໝື່ນ ເພື່ອປຸກລະດົມອົງການປົກຄອງທ້ອງຖິ່ນເຂົ້າຮ່ວມເຮັດວຽກງານປ້ອງກັນຊາດ, ຜ່ານການຈັດຕັ້ງປະຕິບັດເຫັນວ່າຢູ່ຮາກຖານມີຄວາມສະຫງົບໂດຍພື້ນຖານ ແລະ ສາມາດສ້າງບ້ານປ້ອມໝັ້ນ-ກຸ່ມບ້ານສູ້ຮົບຕິດລຽນໄດ້ 4 ກຸ່ມບ້ານ, ສ້າງຄອບຄົວ ແລະ ບ້ານປ້ອງກັນຊາດເຂັ້ມແຂງໄດ້ 76 ບ້ານ,21.776 ຄອບຄົວ, ສ້າງບ້ານແຮກສ່ຽວໄດ້ 8 ບ້ານມີ 7 ກົມກອງ; ຈັດຕັ້ງອົບຮົມຫັດແອບການເມືອງການທະຫານໃຫ້ກຳລັງກອງຫຼອນກອງປ້ອງກັນຕົວໄດ້ 32 ກອງຮ້ອຍ. ນອກນີ້ຍັງໄດ້ອົບຮົມວຽກງານສຶກສາປ້ອງກັນຊາດໃຫ້ບັນດາວິທະຍາໄລ, ບັນດາໂຮງຮຽນມັດທະຍົມຕົ້ນ-ມັດທະຍົມປາຍ 50 ຄັ້ງ, ມີຜູ້ເຂົ້າຮ່ວມ 9.472 ຄົນ; ຍິງ 4.358 ຄົນ, ໄປຄຽງຄູ່ກັນນີ້ວຽກງານກຽມພ້ອມສູ້ຮົບ ແລະ ກອບກູ້ໄພພິບັດກໍໄດ້ເອົາໃຈໃສຢ່າງໃກ້ຊິດຈັດຕັ້ງລະບົບປະຈຳການກຽມພ້ອມສູ້ຮົບມີສູນບັນຊາເປັນໃຈກາງ, ມີຄະນະປະຈຳການ, ສິດປະຈຳການແຕ່ລະຂັ້ນ, ມີກຳລັງປະຈຳການວັດຖຸ, ພາຫະນະ, ອາວຸດກະສຸນກຽມພ້ອມສູ້ຮົບ, ຈັດຕັ້ງຕາໜ່າງສືບຂ່າວຕິດຕາມກຳແໜ້ນສະພາບຮອບດ້ານ ແລະ ປະຕິບັດລະບອບສ່ອງແສງປະຈຳວັນໄດ້ປົກກະຕິຮັບປະກັນແກ້ໄຂສະພາບທີ່ເກີດຂຶ້ນທັນເວລາ.
ວຽກງານປັບປຸງກໍ່ສ້າງກຳລັງ ໄດ້ຖືສຳຄັນວຽກງານສຶກສາອົບຮົມການເມືອງນຳພາແນວຄິດໃຫ້ພະນັກງານ-ນັກຮົບຢ່າງທົ່ວເຖິງທຸກເປົ້າໝາຍ ໂດຍຈັດຕັ້ງເຊື່ອມຊຶມບັນດາມະຕິ, ຄຳສັ່ງ, ຂໍ້ກຳນົດ, ກົດລະບຽບຂອງພັກ, ກົດໝາຍຂອງລັດ ແລະ ນິຕິກຳຕ່າງໆໄປຄຽງຄູ່ກັບການຈັດຕັ້ງປາຖະກະຖາມູນເຊື້ອວັນສຳຄັນຂອງພັກ-ຂອງຊາດຂອງກອງທັບ ຕິດພັນກັບການຊຸກຍູ້ສ້າງກອງຕົວແບບ, ສ້າງນັກຮົບ-ກອງວັດທະນະທຳ ຊຶ່ງໄດ້ປະກາດຮັບຮອງກອງບັນຊາການທະຫານເມືອງແກ້ວອຸດົມເປັນສະໄໝທີ 2 ແລະ ກອງຮ້ອຍທະຫານຊາຍແດນ 232 ສະໄໝທີ 1; ວຽກງານກໍ່ສ້າງພັກ-ພະນັກງານ, ຄະນະພັກໄດ້ເອົາໃຈໃສ່ໃນການປັບປຸງກໍ່ສ້າງພັກຕາມ 5 ຫຼັກການ 3 ທິດນໍາ, ປັບປຸງການຈັດຕັ້ງພັກແຕ່ລະຂັ້ນໃຫ້ປອດໃສ, ເຂັ້ມແຂງ ໜັກແໜ້ນ, ປັດຈຸບັນທົ່ວກອງບັນຊາການທະຫານແຂວງມີ 22 ຄະນະພັກຮາກຖານ, ມີ 8 ໜ່ວຍພັກເອກະລາດ; ມີ 77 ໜ່ວຍພັກຂຶ້ນກັບຄະນະພັກຮາກຖານ; ໄດ້ຮັບຮອງໜ່ວຍພັກປອດໃສ,ເຂັ້ມແຂງ, ໜັກແໜ້ນ 43 ໜ່ວຍພັກ. ມີສະມາຊິກພັກແຂງ 1.450 ສະຫາຍ ຍິງ 209 ສະຫາຍ; ກາງ 38 ສະຫາຍ; ວຽກງານພະນັກງານ: ຄະນະພັກ-ຄະນະບັນຊາໄດ້ມີຄວາມພະຍາຍາມຍົກສູງຄຸນນະພາບຂອງພະນັກງານທີ່ຂຶ້ນກັບຄວາມຮັບຜິດຊອບຂອງຕົນໂດຍເອົາໃຈໃສ່ໃນການກໍ່ສ້າງ ແລະ ບຳລຸງທັງ 3 ລຸ້ນ 3 ປະເພດ ຕິດພັນກັບການສັບຊ້ອນມອບໝາຍໜ້າທີ່ ແລະ ປະຕິບັດນະໂຍບາຍຢ່າງສົມເຫດສົມຜົນດ້ວຍຫຼາຍຮູບ, ຫຼາຍວິທີ, ວຽກງານອົງການຈັດຕັ້ງມະຫາຊົນ ໄດ້ເອົາໃຈໃສ່ຊີ້ນຳແລະ ສ້າງເງື່ອນໄຂອຳນວຍຄວາມສະດວກ, ອົງການດັ່ງກ່າວໄດ້ເຄື່ອນໄຫວຕາມພາລະບົດບາດຂອງຕົນ, ວຽກງານອົບຮົມຫັດແອບ, ປັບປຸງລະບຽບແບບແຜນ: ໄລຍະຜ່ານມາໄດ້ເອົາໃຈໃສ່ຊີ້ນຳບັນດາກົມກອງຈັດຕັ້ງອົບຮົມການເມືອງ, ການທະຫານ ແລະ ວິຊາສະເພາະປະຈໍາປີ ຕາມຄຳສັ່ງແນະນຳຂອງກົມໃຫຍ່ເສນາທິການກອງທັບ ຜ່ານການຈັດຕັ້ງປະຕິບັດຕົວຈິງສາມາດບັນລຸໄດ້ 83,87%, ອົບຮົມກໍ່ສ້າງນາຍສິບ 2 ຊຸດຈຳນວນ 230 ສະຫາຍ, ອົບຮົມທະຫານໃໝ່ 4 ຊຸດຈຳນວນ 519 ສະຫາຍ. ວຽກງານພະລາທິການ ພື້ນຖານແມ່ນປະຕິບັດຕາມທິດຊີ້ນຳ ແລະ ການຕອບສະໜອງຈາກຂັ້ນເທິງ ໂດຍສະເພາະແມ່ນຮັບປະກັນເງິນເດືອນ, ເຂົ້າກິນ, ເຄື່ອງນຸ່ງຫົ່ມ ແລະ ນໍ້າມັນເຊື້ອໄຟ, ອັນພົ້ນເດັ່ນແມ່ນໄດ້ເອົາໃຈໃສ່ໃນການປັບປຸງພື້ນຖານໂຄງລ່າງ ໂດຍສຸມໃສ່ກໍ່ສ້າງ ແລະ ປັບປຸງສະຖານທີ່ຄ້າຍຄູ, ສໍານັກງານ, ອົງການ, ກົມກອງດ້ວຍການປະຢັດມັດທະຍັດ ແລະ ສົມທັບກັບທຶນຂອງຂັ້ນເທິງສະໜອງໃຫ້. ນອກນັ້ນ ບັນດາກົມກອງໄດ້ປັບປຸງກໍ່ສ້າງຄ້າຍຄູດ້ວຍທຶນຂອງຕົນ ແລະ ທຶນສົມທົບຈຳນວນໜຶ່ງ ພ້ອມທັງສຸມໃສ່ການຜະລິດ, ປູກຝັງລ້ຽງສັດ ແລະ ບໍລິການອື່ນໆຕາມເງື່ອນໄຂ ແລະ ທ່າແຮງຂອງກົມກອງ.ວຽກງານຮັບປະກັນເຕັກນິກໄດ້ເອົາໃຈໃສ່ຊີ້ນຳ-ນຳພາຢ່າງເປັນປົກກະຕິ ໂດຍສະເພາະແມ່ນການຟື້ນຟູ, ຄຸ້ມຄອງບົວລະບັດຜັດເຊັດ ສ້ອມແປງພາຫະນະ, ອາວຸດກະສຸນ ທີ່ຂັ້ນເທິງປະກອບໃຫ້ໆນຳໃຊ້ໄດ້ຍາວນານ ແລະ ຮັບປະກັນຄວາມປອດໄພ, ວຽກງານການພົວພັນຮ່ວມມືກັບສາກົນ ໂດຍພື້ນຖານແມ່ນໄດ້ເຊື່ອມຊຶມກຳແໜ້ນແນວທາງການຕ່າງປະເທດຂອງພັກຢ່າງຖືກຕ້ອງ ແລະ ປະຕິບັດຂຶ້ນແຜນການພົວພັນຮ່ວມມືກັບກອງທັບເພື່ອນມິດຍຸດທະສາດ ສສ ຫວຽດນາມ ຕາມແຜນການອະນຸສັນຍາແຕ່ລະປີ.
ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີທີ່ຈະມາເຖິງນີ້ ໃນນາມຕາງໜ້າຄະນະພັກ-ຄະນະບັນຊາ, ຂໍສະແດງຄວາມຮູ້ບຸນຄຸນ ແລະ ອວຍພອນໄຊອັນປະເສີດມາຍັງບັນດາທ່ານນາຍ ແລະພົນທະຫານທຸກທົ່ວໜ້າຈົ່ງມີສຸຂະພາບແຂງແຮງເຮັດສຳເລັດໜ້າທີ່ການເມືອງທີ່ການຈັດຕັ້ງມອບໝາຍໃຫ້ຢ່າງມີຜົນສຳເລັດ.
ຄໍາເຫັນ