 |
ທ່ານ ຈັນທະນົງສິນ ຈັນທະພິມ ໄດ້ລາຍງານສະພາບການພັດທະນາເສດຖະກິດ-ສັງຄົມ ຂອງເມືອງໂຂງ ໂດຍຫຍໍ້ ເຊິ່ງເມືອງໂຂງ ມີ 05 ຕາແສງ, 114 ບ້ານ, ພົນລະເມືອງ 104,789 ຄົນ, ໃນໄລຍະ 09 ເດືອນ ປີ 2026, ເມືອງໂຂງ ໄດ້ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ X (2025-2029) ເຂົ້າສູ່ປີທີສອງ ໂດຍມີຜົນສໍາເລັດທີ່ພົ້ນເດັ່ນຫຼາຍດ້ານ.
ເສດຖະກິດຂະຫຍາຍຕົວຢ່າງຕໍ່ເນື່ອງ, ລວມຍອດຜະລິດຕະພັນພາຍໃນບັນລຸ4,582.30 ຕື້ກີບ (ເທົ່າກັບ75% ຂອງແຜນປີ), ສະເລ່ຍໃສ່ຫົວຄົນໄດ້ 1,905 ໂດລາ, ລາຍຮັບງົບປະມານປະຕິບັດໄດ້ 11.41 ຕື້ກີບ (ເທົ່າກັບ64% ຂອງແຜນປີ); ໄດ້ປະຕິບັດວຽກງານການສໍາຫຼວດພົນລະເມືອງ ແລະ ທີ່ຢູ່ອາໄສທົ່ວປະເທດ ຄັ້ງທີ V ປີ 2025 ຢູ່ເມືອງໂຂງ ບັນລຸຕາມລະດັບຄາດໝາຍ, ມີເຂດສໍາຫຼວດ 115 ເຂດ, ໃຊ້ນັກເດີນສໍາຫຼວດ ແລະ ນັກກວດກາ ທັງໝົດ 176 ທ່ານ; ການຜະລິດເຂົ້ານາປີປະຕິບັດໄດ້ 15,370.59 ເຮັກຕາ (97.94% ຂອງແຜນ); ສາມາດສົ່ງອອກສິນຄ້າກະສິກຳ (ປານໍ້າຂອງ, ປາສະຫວາຍ, ມັນຕົ້ນ, ຢາສູບ ແລະ ອື່ນໆ) ມູນຄ່າ 64.36 ຕື້ກີບ; ເມືອງໂຂງມີເຂື່ອນໄຟຟ້າ 1 ແຫ່ງ (ເຂື່ອນໄຟຟ້າດອນສະໂຮງ), ໂຄງການໄຟຟ້າແສງຕາເວັນ 02 ໂຄງການ ທີ່ກໍາລັງດໍາເນີນການກໍ່ສ້າງ; ທົ່ວເມືອງມີແຫຼ່ງທ່ອງທ່ຽວ 41 ແຫ່ງ (ທຳມະຊາດ 20 ແຫ່ງ, ວັດທະນະທຳ 14 ແຫ່ງ, ປະຫວັດສາດ 07 ແຫ່ງ), ໃນໄລຍະ 09 ເດືອນ ປີ 2026 ມີນັກທ່ອງທ່ຽວເຂົ້າມາທ່ຽວຊົມ 114,556ເທື່ອຄົນ. ນອກນີ້, ຄະນະກຳມະການປົກຄອງເມືອງໂຂງ ໄດ້ເຂົ້າຄຸ້ມຄອງບໍລິຫານແຫຼ່ງທ່ອງທ່ຽວນໍ້າຕົກຕາດຄອນພະເພັງ ແລະ ສົມພະມິດ ຊົ່ວຄາວ ນັບແຕ່ວັນທີ 04 ກັນຍາ 2026 ເປັນຕົ້ນມາ.
 |
ການລົງເຄື່ອນໄຫວຂອງຄະນະນໍາສູນສະຖິຕິແຫ່ງຊາດ ແລະ ທະນາຄານໂລກ ແມ່ນເພື່ອທົບທວນ, ລົງຊຸກຍູ້ ແລະ ຕິດຕາມວຽກງານການເງິນ; ໃນນັ້ນ ໄດ້ສຸມໃສ່ທົບທວນການປະຕິບັດ, ຫຼັກການ, ບັນດາເອກະສານການເງິນ, ຂັ້ນຕອນການອະນຸມັດ, ການເບີກຈ່າຍ ແລະ ການສະຫຼຸບລາຍງານການເງິນຂອງກິດຈະກໍາຢູ່ຂັ້ນເມືອງ. ໂອກາດນີ້ການນຳເມືອງໂຂງໄດ້ນຳພາຄະນະເຄື່ອນໄຫວຢ້ຽມຢາມເບິ່ງການດຳເນີນທຸລະກິດໂຮງສີເຂົ້າ IDP ຢູ່ບ້ານທ່າໂພ ແລະ ຢ້ຽມຊົມນ້ຳຕົກຕາດຄອນພະເພັງຕື່ມອີກ.
ຂ່າວ-ພາບ: ເມືອງໂຂງ
ຄໍາເຫັນ