ອີງຕາມຂໍ້ມູນຈາກ ADB ໃຫ້ຮູ້ວ່າ: ຂໍ້ລິເລີ່ມການຫັນປ່ຽນນີ້ແມ່ນໄດ້ຮັບການສະໜັບສະໜູນຈາກທະນາຄານພັດທະນາອາຊີ (ADB) ແລະ ການສະໜອງທຶນຈາກກະຊວງການຕ່າງປະເທດ ແລະ ການຄ້າປະເທດອົສຕຣາລີ ຊຶ່ງໂຄງການໄດ້ຊ່ວຍໃນການເພີ່ມທະວີຄວາມພ້ອມຂອງຂໍ້ມູນ ແລະ ການນຳໃຊ້ຂໍ້ມູນສະຖິຕິກ່ຽວກັບຄວາມສະເໝີພາບບົດບາດຍິງ-ຊາຍ, ຄວາມພິການ ແລະ ການມີສ່ວນຮ່ວມທາງສັງຄົມ (Gender, Disability, and Social Inclusion ຫຼື ຂຽນຫຍໍ້ວ່າ GEDSI) ໃນ ສປປ ລາວ.
ໂຄງການນີ້ເປັນບາດກ້າວອັນສຳຄັນເພື່ອກ້າວໄປສູ່ສັງຄົມທີ່ມີຄວາມສະເໝີພາບ ແລະ ການມີສ່ວນຮ່ວມທາງສັງຄົມ ຊຶ່ງສອດຄ່ອງກັບວາລະເປົ້າໝາຍການພັດທະນາແບບຍືນຍົງ ຮອດປີ 2030 (SDGs). ໂດຍການຍົກລະດັບຄວາມສາມາດຂອງປະເທດໃນການເກັບກຳຂໍ້ມູນສະຖິຕິ, ການຕິດຕາມ, ການວິເຄາະ ແລະ ການລາຍງານຄວາມສະເໝີພາບບົດບາດລະຫວ່າງຍິງ-ຊາຍ, ຄວາມພິການ ແລະ ລວມທັງດ້ານສັງຄົມອື່ນໆ, ການມີຂໍ້ມູນສະຖິຕິ GEDSI ສໍາລັບການຕິດຕາມກວດກາບັນດາເປົ້າໝາຍ SDG ໄດ້ເພີ່ມຂຶ້ນຈາກ 37.7% ໃນປີ 2020 ເປັນ 56.1% ໃນປີ 2024.
ຜົນສຳເລັດອັນສຳຄັນທີ່ໄດ້ຮັບຂອງໂຄງລວມມີການສ້າງຕັ້ງໜ່ວຍງານເຮັດວຽກສະຖິຕິດ້ານບົດບາດຍິງ-ຊາຍພາຍໃນສູນສະຖິຕິແຫ່ງຊາດ, ການສ້າງບົດແນະນໍາ ແລະ ປຶ້ມຄູ່ມືການນໍາໃຊ້ GEDSI ຢ່າງຄົບຊຸດ ແລະ ການເຮັດບົດລາຍງານການວິເຄາະເປັນຕົ້ນ: ບົດລາຍງານສະຖິຕິແຍກເພດ: ແມ່ຍິງ ແລະ ຜູ້ຊາຍ ໃນ ສປປ ລາວ; ບົດລາຍງານສະຖິຕິການຕິດຕາມຄວາມຄືບໜ້າຂອງເປົ້າໝາຍການພັດທະນາແບບຍືນຍົງ (ປພຍ) ໃນ ສປປ ລາວ ປະຈຳປີ 2024; ຄູ່ມືກ່ຽວກັບການວິເຄາະ ແລະ ປັບປຸງຂໍ້ມູນ GEDSI ທີ່ຕິດພັັນຜົນໄດ້ຮັບຂອງການພັດທະນາ (ສໍາລັບເປົ້າໝາຍການພັດທະນາແບບຍືນຍົງ ແລະ ບົດລາຍງານແຫ່ງຊາດແບບສະໝັກໃຈ); ແລະ ບົດລາຍງານກ່ຽວກັບການວິໄຈໃນຫົວຂໍ້ ພວກເຮົາຍັງຫ່າງໄກປານໃດຈາກການປິດຊ່ອງຫວ່າງ? ການວິໄຈ GEDSI ຂອງການສຳຫຼວດດັດສະນີໝາຍສັງຄົມລາວ ຄັ້ງທີ III (ໂດຍສົບທຽບໃສ່ການສຳຫຼວດຄັ້ງທີ II). ນອກນັ້ນ, ຍັງມີເຈົ້າໜ້າທີ່ພາກລັດຫຼາຍກ່ວາ 270 ຄົນ ຈາກອົງການປົກຄອງຂັ້ນສູນກາງ ແລະ ຂັ້ນແຂວງ ໄດ້ຮັບການຝຶກອົບຮົມເພື່ອສ້າງຄວາມອາດສາມາດໃນການນໍາໃຊ້ບັນດາຂໍ້ມູນສະຖິຕິທີ່ມີເພີ່ມໃໝ່ນີ້ຢ່າງມີປະສິດທິພາບ.
ໂຄງການດັ່ງກ່າວຍັງໄດ້ເສີມຂະຫຍາຍລະບົບສະຖິຕິຂອງສູນສະຖິຕິແຫ່ງຊາດໂດຍການເຊື່ອມສານຂໍ້ມູນສະຖິຕິ GEDSI ເຂົ້າໃນການເກັບກໍາຂໍ້ມູນ, ການວິເຄາະ ແລະ ການສ້າງນະໂຍບາຍ ຊຶ່ງຈະຊ່ວຍເສີມສ້າງການກໍານົດນະໂຍບາຍໂດຍອີງຂໍ້ມູນຫຼັກຖານ ແລະ ຮັບປະກັນວ່າບັນດາໂຄງການມີສ່ວນຮ່ວມທາງສັງຄົມສາມາດແກ້ໄຂບັນຫາຂອງປະຊາກອນທີ່ມີຄວາມບອບບາງໄດ້. ໂດຍການນຳໃຊ້ຂໍ້ມູນສະຖິຕິເປັນຕົວກະຕຸ້ນເຮັດໃຫ້ ສປປ ລາວ ຢູ່ໃນທ່າດີຂຶ້ນສຳລັບຜົນໄດ້ຮັບການພັດທະນາແບບມີສ່ວນຮ່ວມ. ໃນການນໍາໃຊ້ຂໍ້ມູນສະຖິຕິ GEDSI ທີ່ເພີ່ມຂຶ້ນ ຊຶ່ງນໍາໂດຍສູນສະຖິຕິແຫ່ງຊາດ, ຈະຊ່ວຍປັບປຸງການປະເມີນດ້ານບົດບາດຍິງ-ຊາຍການວາງແຜນທີ່ຂັບເຄື່ອນດ້ວຍຂໍ້ມູນ ແລະ ການຕິດຕາມການປະຕິບັດງານດ້ານບົດບາດຍິງ-ຊາຍໃນທົ່ວທຸກຂະແໜງການ.
ຜົນສຳເລັດຂອງໂຄງການນີ້ຍັງເກີດຈາກການຮ່ວມມືກັນຢ່າງແໜ້ນແຟ້ນລະຫວ່າງບັນດາກະຊວງຕ່າງໆ, ຄູ່ຮ່ວມພັດທະນາ ແລະ ບັນດາອົງການຈັດຕັ້ງມະຫາຊົນ, ເພື່ອສົ່ງເສີມວິທີການທີ່ເປັນເອກະພາບກັນເພື່ອຄວາມສະເໝີພາບບົດບາດຍິງ-ຊາຍ ແລະ ການລວມກຸ່ມທາງສັງຄົມ.
ຂໍ້ມູນ: ADB-ຂ່າວ: ຄ. ຄຳປະສິດ
ຄໍາເຫັນ