ສູນວັດທະນະທະຈີນ ປະຈໍາລາວ ຮ່ວມກັບ ຄະນະຮ້ອງປະສານສຽງໂຮງລະຄອນເສິນເຈິ້ນ ໄດ້ຈັດງານປາຖະກະຖາ ເລືອງລາວປະເທດຈີນ ຫົວຂໍ້: ພາບສະທ້ອນສິລະປະການຮ້ອງປະສານສຽງຂອງຈີນໃນປັດຈຸບັນ ວິເຄາະການພັດທະນາ ແລະ ຜົນງານດີເດັ່ນຂອງອຸດສາຫະກໍາການຮ້ອງເພງປະສານສຽງເສິນເຈີ້ນ ຂຶ້ນໃນວັນທີ 24 ກັນຍາ ຜ່ານມານີ້ ທີ່ສູນວັດທະນະທໍາດັ່ງກ່າວ ໂດຍໃຫ້ກຽດປາຖະກະຖາ ແລະ ມາບອກເລົ່າເລື່ອງລາວຂອງ ທ່ານ ໂມເຫວິນຮ້າວ ວາທະຍາກອນ ຄະນະຮ້ອງປະສານສຽງໂຮງລະຄອນເສິນເຈິ້ນ ປະລິນຍາເອກພາກວິຊາ ວາທະຍາກອນ ວິທະຍາໄລ Eastman ປະເທດອາເມຣິກາ, ໂດຍມີ ທ່ານນາງ ຫຼີຢີ່ຜິງ ຫົວໜ້າສູນວັດທະນະທໍາຈີນ ປະຈໍາ ສປປ ລາວ, ທ່ານ ຫຼິວທົ້ວ ຫົວໜ້າຄະນະນັກສະແດງນະຄອນເສິນເຈິ້ນ ພ້ອມດ້ວຍນັກສຶກສາຈາກມະຫາວິທະຍາໄລແຫ່ງຊາດ ພາກວິຊາພາສາຈີນ ຄະນະອັກສອນສາດເຂົ້າຮ່ວມ.
ປາຖາກະຖາໃນຄັ້ງນີ້ຈັດຂຶ້ນ ເພື່ອບອກເລົ່າເລື່ອງລາວປະເທດຈີນໃຫ້ໄດ້ດີ ແລະ ລົງເລິກການແລກປ່ຽນຮຽນຮູ້ອະລິຍະທໍາ ຊຶ່ງກັນ ແລະ ກັນ, ກະຊວງວັດທະນະທຳ ແລະ ທ່ອງທ່ຽວຈີນ ຈຶ່ງໄດ້ນໍາໃຊ້ສູນວັດທະນະທຳຈີນ 45 ແຫ່ງ ແລະ ຫ້ອງການທ່ອງທ່ຽວຈີນ 23 ແຫ່ງຢູ່ທົ່ວໂລກເປັນເວທີ, ຈັດກິດຈະ ກຳ ເລື່ອງລາວປະເທດຈີນ ທີ່ເປັນໂຄງການຫຼັກປະຈຳປີ 2023, ໂດຍຈະປິ່ນອ້ອມ 3 ຫົວຂໍ້ຫຼັກຄື: ຄວາມທັນສະໄໝໃນຮູບແບບປະເທດຈີນ; ການແລກປ່ຽນຮຽນຮູ້ອະລິຍະທໍາ ຊຶ່ງກັນ ແລະ ກັນ ແລະ ວັດທະນະທໍາດັ່ງເດີມທີ່ດີເລີດຂອງຈີນ. ໃນການປາຖະກະຖາຄັ້ງນີ້, ນອກຈາກ ທ່ານ ໂມເຫວິນຮ້າວ ມາບອກເລົ່າເລື່ອງລາວ ການພັດທະນາຂອງອຸດສະຫະກໍາການຮ້ອງປະສານສຽງຂອງເສິນເຈິ້ນແລ້ວ, ຍັງໄດ້ແບ່ງປັນປະສົບການ ການຮ່ວມມືຢູ່ຕ່າງປະເທດ, ພ້ອມຮັບຊົມຜົນງານຕົວຢ່າງຕ່າງໆທີ່ຂຶ້ນຊື່ຂອງນະຄອນເສິນເຈິ້ນ. ນອກນີ້, ຍັງໄດ້ສາທິດການບັນຊາຮ້ອງເພງ ໃຫ້ນັກສຶກສາໄດ້ເຂົ້າໃຈວິທີຮ້ອງເພງໃຫ້ພ້ອມພຽງດ້ວຍການບັນຊາຂອງວາທະຍາກອນ.
(ຂ່າວ-ພາບ: ວັນເພັງ)
ຄໍາເຫັນ