 |
ການພົບປະຄັ້ງນີ້ ເພື່ອແລກປ່ຽນຂໍ້ມູນ, ບົດຮຽນ ແລະ ປະສົບການໃນການດຳເນີວຽກນງານຂອງສະພາ, ຍົກສູງປະສິດທິພາບວຽກງານ ພ້ອມທັງສືບຕໍ່ຮັດແໜ້ນສາຍພົວພັນມິດຕະພາບ, ຄວາມສາມັກຄີ ແລະ ການຮ່ວມມືອັນດີງາມລະຫວ່າງສອງແຂວງ.
ໃນໂອກາດນີ້ ຝ່າຍແຂວງອັດຕະປື ໄດ້ນຳສະເໜີສະພາບລວມຂອງແຂວງ, ສະພາບພື້ນຖານດ້ານພູມສາດ, ເສດຖະກິດ, ສັງຄົມ, ທ່າແຮງດ້ານຊັບພະຍາກອນ ແລະ ທິດທາງການພັດທະນາແຂວງ, ພ້ອມກັນນີ້ ໄດ້ນຳສະເໜີບົດບາດ ແລະ ການດຳເນີນງານຂອງສະພາປະຊາຊົນ ແຂວງອັດຕະປື ໃນການພິຈາລະນາຮັບຮອງບັນຫາສຳຄັນຂອງທ້ອງຖິ່ນ, ການອອກມະຕິ, ການຕິດຕາມ ກວດກາ ການບັງຂັບໃຊ້ກົດໝາຍ, ແຜນພັດທະນາເສດຖະກິດ-ສັງຄົມ, ງົບປະມານ, ໂຄງການລົງທຶນ ແລະ ການແກ້ໄຂຄຳຮ້ອງທຸກ, ຄຳສະເໜີຂອງປະຊາຊົນ.
ທ່ານ ໂດ໊ ຖາຍ ຟອງ ໄດ້ກ່າວຈຸດປະສົງຂອງການນຳຄະນະມາພົບປະໃນຄັ້ງນີ້ ພ້ອມທັງນຳສະເໜີສະພາບລວມ, ຂໍ້ມູນພື້ນຖານ ແລະ ບົດຮຽນຈາກການດຳເນີນງານຂອງສະພາປະຊາຊົນ ແຂວງດັກລັກ. ພ້ອມກັນນັ້ນ ໄດ້ສະແດງຄວາມຂອບໃຈຕໍ່ຝ່າຍອັດຕະປື ໃນການຕ້ອນຮັບຢ່າງອົບອຸ່ນ ແລະ ການເປີດກວ້າງໃນການແລກປ່ຽນບົດຮຽນ.
ການພົບປະໄດ້ເນັ້ນໃສ່ການແລກປ່ຽນບົດຮຽນໃນຫຼາຍດ້ານ ເຊັ່ນ: ຮູບແບບການຈັດການປະຊຸມ, ຂັ້ນຕອນການອອກມະຕິ, ວຽກງານຕິດຕາມ ກວດກາ, ການຮັບ ແລະ ພິຈາລະນາຄຳຮ້ອງທຸກ, ການຮັບຟັງສຽງຂອງປະຊາຊົນ ຕະຫຼອດຮອດການກວດກາການຈັດຕັ້ງບັນດາໂຄງການລົງທຶນຂອງລັດ. ທັງສອງຝ່າຍໄດ້ຮ່ວມກັນສົນທະນາ, ແລກປ່ຽນວິທີການແກ້ໄຂບັນຫາຕ່າງໆ ຈາກປະສົບການຕົວຈິງ, ເຊິ່ງຈະເປັນບົດຮຽນອັນມີຄຸນຄ່າໃຫ້ແກ່ການປັບປຸງວຽກງານຂອງແຕ່ລະຝ່າຍ.
 |
ສຳລັບ ທິດທາງຕໍ່ໜ້າ, ສອງຝ່າຍເຫັນດີຈະສືບຕໍ່ຮັກສາ ແລະ ພັດທະນາກົນໄກການຮ່ວມມື, ສົ່ງເສີມການແລກປ່ຽນຄະນະຜູ້ແທນທັງລະດັບການນຳ ແລະ ລະດັບວິຊາການ, ສືບຕໍ່ແລກປ່ຽນບົດຮຽນດ້ານນິຕິກຳ, ການກວດກາ, ການພົວພັນກັບປະຊາຊົນ ແລະ ວຽກງານວິຊາການອື່ນໆ, ພ້ອມທັງວາງແຜນຈັດສຳມະນາ, ຝຶກອົບຮົມດ້ານພາສາ ແລະ ວິຊາສະເພາະໃນທ້າຍປີ 2026 ເພື່ອຍົກສູງຄວາມຮູ້, ທັກສະ ແລະ ຂີດຄວາມສາມາດໃຫ້ແກ່ບຸກຄະລາກອນ.
ການພົບປະໃນຄັ້ງນີ້ ເປັນອີກໜຶ່ງກ້າວສຳຄັນໃນການສືບຕໍ່ຮັດແໜ້ນສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ລາວ-ຫວຽດນາມ, ກໍຄື ສພຂ ອັດຕະປື ພ້ອມທັງສ້າງເງື່ອນໄຂໃຫ້ສາຍພົວພັນລະຫວ່າງ ແຂວງອັດຕະປື ແລະ ແຂວງດັກລັກ ກ້າວໄປສູ່ການຮ່ວມມືທີ່ເລິກເຊິ່ງ, ຮອບດ້ານ ແລະ ຍືນຍົງຍິ່ງຂຶ້ນ.
ຂ່າວ: ມະນີວອນ
ຄໍາເຫັນ