ໂອກາດດັ່ງກ່າວ ທ່ານ ພູວັນ ພົມມະຈັນ ໄດ້ລາຍງານພາບລວມ ແລະ ຂໍ້ມູນພື້ນຖານຂອງແຂວງ ໂດຍແຂວງອັດຕະປືມີເນື້ອທີ່ 10.230 ກິໂລຕາແມັດ, ປະກອບມີ 5 ເມືອງ ແລະ ມີປະຊາກອນປະມານ 150,000 ຄົນ. ເສດຖະກິດມີທ່າອ່ຽງຂະຫຍາຍຕົວຕໍ່ເນື່ອງ, ໂດຍ GDP ສະເລ່ຍຕໍ່ຄົນບັນລຸປະມານ 2,240 ໂດລາ.
 |
ໃນ 6 ເດືອນຕົ້ນປີ 2026, ສະພາປະຊາຊົນແຂວງອັດຕະປື ຊຸດທີ V ໄດ້ສຸມໃສ່ການປະຕິບັດພາລະບົດບາດຕາມອຳນາດ ໜ້າທີ່ຢ່າງເຕັມສ່ວນ; ດ້ານນິຕິກຳ ແລະ ການຕົກລົງບັນຫາສຳຄັນ ໄດ້ພິຈາລະນາ ແລະ ຮັບຮອງເອົາມະຕິກອງປະຊຸມຈຳນວນ 11 ສະບັບ; ດ້ານງົບປະມານ ສາມາດເກັບລາຍຮັບໄດ້ກວ່າ 1,100 ຕື້ກີບ, ເທົ່າກັບ 62.35% ຂອງແຜນການປີ; ດ້ານການລົງທຶນ ໄດ້ຕິດຕາມ ແລະ ກວດກາໂຄງການລົງທຶນຂອງລັດຈຳນວນ 197 ໂຄງການ, ໃນນັ້ນສຳເລັດແລ້ວ 95 ໂຄງການ. ພ້ອມນີ້ ຍັງໄດ້ສຸມໃສ່ການຕິດຕາມກວດກາ ການປະຕິບັດກົດໝາຍ, ການແກ້ໄຂຄຳຮ້ອງທຸກ ແລະ ການສະທ້ອນບັນຫາຈາກປະຊາຊົນ ເພື່ອໃຫ້ສິດ ແລະ ຜົນປະໂຫຍດອັນຊອບທຳຂອງປະຊາຊົນໄດ້ຮັບການຄຸ້ມຄອງ.
ທ່ານນາງ ຮວິ້ງ ຖຸຍເລີນ ໄດ້ກ່າວຈຸດປະສົງຂອງການມາພົບປະ ພ້ອມທັງນຳສະເໜີຂໍ້ມູນພື້ນຖານ ແລະ ພາບລວມການດຳເນີນງານຂອງສະພາປະຊາຊົນແຂວງຢາລາຍ. ພ້ອມນັ້ນ ໄດ້ສະແດງຄວາມຂອບໃຈຕໍ່ຝ່າຍແຂວງອັດຕະປື ສຳລັບການຕ້ອນຮັບ ແລະ ການແລກປ່ຽນບົດຮຽນຢ່າງອົບອຸ່ນ.
 |
ໃນກອງປະຊຸມສອງຝ່າຍໄດ້ແລກປ່ຽນຄວາມຄິດເຫັນ ແລະ ບົດຮຽນກ່ຽວກັບການຈັດຕັ້ງການປະຊຸມ, ການອອກມະຕິ, ການຕິດຕາມກວດກາ, ການພິຈາລະນາຄຳຮ້ອງທຸກຂອງປະຊາຊົນ ຕະຫຼອດຮອດການກວດກາ ການດຳເນີນໂຄງການລົງທຶນຂອງລັດ, ການແລກປ່ຽນດັ່ງກ່າວ ຈະເປັນບົດຮຽນສຳຄັນໃຫ້ແກ່ສອງຝ່າຍໃນການນຳໄປປະຍຸກໃຊ້ ແລະ ປັບປຸງວຽກງານໃນຕໍ່ໜ້າ.
ພ້ອມກັນນີ້ ສອງຝ່າຍໄດ້ຕົກລົງວາງທິດທາງຮ່ວມມືໃນຕໍ່ໜ້າ ໂດຍຈະສືບຕໍ່ແລກປ່ຽນຄະນະຜູ້ແທນທັງໃນລະດັບການນຳ ແລະ ລະດັບວິຊາການ, ສົ່ງເສີມການແລກປ່ຽນບົດຮຽນດ້ານນິຕິກຳ, ການກວດກາ, ການພົວພັນກັບປະຊາຊົນ ແລະ ວຽກງານວິຊາການອື່ນໆ. ພ້ອມທັງມີແຜນຈັດສຳມະນາ ແລະ ຝຶກອົບຮົມດ້ານພາສາ ແລະ ວິຊາສະເພາະໃນທ້າຍປີ 2026 ເພື່ອຍົກສູງທັກສະ ແລະ ຂີດຄວາມສາມາດຂອງບຸກຄະລາກອນ.
ການພົບປະ ແລະ ແລກປ່ຽນບົດຮຽນໃນຄັ້ງນີ້ ຖືເປັນອີກໜຶ່ງກິດຈະກຳສຳຄັນ ທີ່ຊ່ວຍເສີມສ້າງສາຍພົວພັນມິດຕະພາບ, ຄວາມສາມັກຄີ ແລະ ການຮ່ວມມືອັນແໜ້ນແຟ້ນລະຫວ່າງແຂວງອັດຕະປື ແລະ ແຂວງຢາລາຍ ກ້າວໄປສູ່ການຮ່ວມມືທີ່ເລິກເຊິ່ງ, ຮອບດ້ານ ແລະ ຍືນຍົງຍິ່ງຂຶ້ນ ອັນເປັນການປະກອບສ່ວນຮັດແໜ້ນສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ, ຫວຽດນາມ-ລາວ ໝັ້ນຄົງຕະຫຼອດໄປ.
ຂ່າວ: ມະນີວອນ
ຄໍາເຫັນ