ໂດຍ:ວັນໄຊ ຕະວິນຍານ
ດ້ວຍຄວາມເປັນຫ່ວງເປັນໃຍຂອງພັກ-ລັດຖະບານ, ພາຍຫຼັງເກີດໄພພິບັດຢູ່ຫຼາຍແຂວງໃນປີ 2024 ຜ່ານມາລັດຖະບານໄດ້ສຸມງົບປະມານຟື້ນຟູຜົນກະທົບຈາກໄພພິບັດນໍ້າຖ້ວມຢ່າງຮີບດ່ວນ ຢູ່ ແຂວງຫຼວງພະບາງ, ຫົວພັນ, ຊຽງຂວາງ,ໄຊຍະບູລີ ແລະ ເຂດພັດທະນາຊົນນະບົດຮອບດ້ານ ຂອງ ກະຊວງປ້ອງກັນປະເທດ ຈໍານວນທັງໝົດ 85 ໂຄງການເປັນມູນຄ່າ 82,213,278,530 ກີບ.ສະໜອງວັດຖຸສົມທົບປຸກສ້າງ,ຟື້ນຟູ-ສ້ອມແປງເຮືອນໄດ້ 367 ຫຼັງ, ເຄື່ອນຍ້າຍວັດຖຸ ແລະ ສິ່ງຂອງຈາກສູນພັກ ຊົ່ວຄາວກັບຄືນບ້ານປະຊາຊົນໄດ້ 72,3 ໂຕນ.
ລັດຖະບານໄດ້ປະສານສົມທົບກັບຄູ່ຮ່ວມພັດທະນາລະດົມການຊ່ວຍເຫຼືອຈາກອົງການອາຫານໂລກໄດ້ໃຫ້ການຊ່ວຍເຫຼືອເຂົ້າສານ ຈໍານວນ 3.85 ໂຕນ ແກ່ໂຮງຮຽນກິນນອນຊົນເຜົ່າແຂວງຫຼວງນໍ້າທາ ພ້ອມທັງໄດ້ສ້ອມແປງເຮືອນຄົວ, ສະໜອງອຸປະກອນເຄື່ອງຄົວ ແລະ ສ້ອມແປງລະບົບນໍ້າ ໃຫ້ແກ່ໂຮງຮຽນຊັ້ນປະຖົມສຶກສາ ພາຍໃຕ້ໂຄງການອາຫານທ່ຽງໃນໂຮງຮຽນທີ່ແຂວງຫຼວງນໍ້າທາ ແລະ ແຂວງຫຼວງພະບາງ; ໄດ້ຮັບການຊ່ວຍເຫຼືອຈາກອົງການອຸຍນີເຊັບປະຈໍາ ສປປ ລາວ ໄດ້ມອບຖົງເປ້ໃຫ້ ແກ່ນັກຮຽນຊັ້ນອະນຸບານ ແລະ ປະຖົມສຶກສາ ຈໍານວນ 1,653 ໜ່ວຍ ປະກອບມີອຸປະກອນການຮຽນ ແລະ ເຄື່ອງໃຊ້ໃນການຮັກສາອະນາໄມພື້ນຖານ ທີ່ເມືອງຫຼວງນໍ້າທາ ແຂວງຫຼວງນໍ້າທາ; ອົງການຊ່ວຍເຫຼືອເດັກສາກົນ ປະຈໍາ ສປປ ລາວ ໄດ້ໃຫ້ການຊ່ວຍເຫຼືອໃນການອະນາໄມ, ສ້ອມແປງອາຄານຮຽນ ຂະໜາດນ້ອຍ, ແຈກຢາຍຊຸດນັກຮຽນ, ແຈກເຄື່ອງອະນາໄມ ແລະ ເຄື່ອງທີ່ຈໍາເປັນສໍາລັບໂຮງຮຽນ ລວມມູນຄ່າທັງໝົດ 23,735 ໂດລາ; ໄດ້ຮັບການຊ່ວຍເຫຼືອປຶ້ມແບບຮຽນ ແລະ ຄູ່ມືຄູ ຊັ້ນປະຖົມ ແລະ ມັດທະຍົມສຶກສາ ຈາກສະຖານທູດອົສຕຣາລີ ແລະ ອົງການໄຈກາ ປະຈໍາລາວ ໃຫ້ແກ່ໂຮງຮຽນປະຖົມມັດທະຍົມຕອນຕົ້ນທີ່ເມືອງຫຼວງນໍ້າທາແຂວງຫຼວງນໍ້າທາ ລວມມູນຄ່າທັງໝົດ 446,037,200 ກີບ ແລະ ສະໜອງເຄື່ອງອຸປະໂພກ-ບໍລິໂພກໃຫ້ປະຊາຊົນເປັນຈໍານວນຫຼວງຫຼາຍ.
ເຖິງຢ່າງໃດກໍຕາມ ປັດຈຸບັນ,ລັດຖະບານ ສປປ ລາວ ຍັງພວມດໍາເນີນການຟື້ນຟູປົວແປງເສັ້ນທາງ,ລະບົບນໍ້າປະປາ, ຂົງເຂດວຽກງານການບິນໃນຂອບເຂດທົ່ວປະເທດ ຊຶ່ງມີທັງໝົດ 133 ໂຄງການ ມູນຄ່າ 392,522,685,279 ກີບ ໃນນັ້ນ: ທາງຫຼວງແຫ່ງຊາດ 22 ໂຄງການ ມູນຄ່າ 19,125,544,218 ກີບ; ທາງຫຼວງແຂວງ 97 ໂຄງການ ມູນຄ່າ 246,427,796,368 ກີບ; ວຽກຂົວ 2 ໂຄງການ ມູນຄ່າ 9,751,624,353 ກີບ; ວຽກນ້ຳປະປາ 3 ໂຄງການ ມູນຄ່າ 4,723,178,140 ກີບ; ວຽກງານການບິນ 9 ໂຄງການ ມູນຄ່າ 112,494,542,200 ກີບ.
ຄໍາເຫັນ