 |
ໃນພິທີ, ທ່ານ ພົມມະຫາ ປັນຍານຸເດດ ໄດ້ກ່າວເປີດກອງປະຊຸມ.ຈາກນັ້ນ, ທ່ານ ພອນສະຫວັນ ພວງພິດົກ ຮອງເລຂາໜ່ວຍພັກ ໄດ້ຂຶ້ນຜ່ານບົດລາຍງານວຽກງານສະກັດກັ້ນ ແລະ ຕ້ານການສໍ້ລາດບັງຫຼວງ ຊຶ່ງມີບາງເນື້ອໃນສໍາຄັນວ່າ: ໃນໄລຍະ 1 ປີຜ່ານມາ, ຄະນະນໍາສານປະຊາຊົນໄດ້ເອົາໃຈໃສ່ສຶກສາອົບຮົມການເມືອງ-ແນວຄິດເພື່ອເປັນການຍົກສູງຄຸນທາດການເມືອງ-ຄຸນສົມບັດສິນທຳປະຕິວັດໃຫ້ສະມາຊິກພັກ, ຜູ້ພິພາກສາ, ພະນັກງານ-ລັດຖະກອນ ດ້ວຍການຈັດຕັ້ງເຜີຍແຜ່, ເຊື່ອມຊຶມເອກະສານຂອງພັກ-ລັດ ກໍຄືມະຕິຂອງສະພາແຫ່ງຊາດເຂົ້າສູ່ວຽກງານຕົວຈິງຂອງຕົນດ້ວຍຄວາມເປັນເຈົ້າການ,ເອົາໃຈໃສ່ປະສານສົມທົບກັບອົງການປົກຄອງທ້ອງຖິ່ນ, ສະພາປະຊາຊົນແຂວງ ໃນການຄົ້ນຄວ້າກ່ຽວກັບການຈັດຕັ້ງໃຫ້ມີຄວາມໜັກແໜ້ນ, ໄດ້ສຳເລັດການແຕ່ງຕັ້ງຜູ້ພິພາກສາຊັ້ນສີ່ ທີ່ໄດ້ຜ່ານການສອບເສັງຈໍານວນ 30 ທ່ານ ແລະ ໄດ້ສໍາເລັດການສອບເສັງຜູ້ພິພາກສາຊັ້ນໜຶ່ງປະຈຳປີ 2025 ຈໍານວນ 292 ທ່ານ ແລະ ໄດ້ເລື່ອນຊັ້ນຜູ້ພິພາກສາຂອງສານປະຊາຊົນແຕ່ລະຂັ້ນ ຈາກຊັ້ນໜຶ່ງຂຶ້ນຊັ້ນສອງຈຳນວນ 54 ທ່ານ, ຊັ້ນສອງຂຶ້ນຊັ້ນສາມຈໍານວນ 6 ທ່ານ, ທຽບຊັ້ນຜູ້ພິພາກສາຂອງສານທະຫານ 2 ທ່ານ, ແຕ່ງຕັ້ງຜູ້ຊ່ວຍຜູ້ພິພາກສາ 77 ທ່ານ. ຈ່າສານ 58 ທ່ານ, ຈັດຕັ້ງຝຶກອົບຮົມ ເພື່ອສົ່ງເສີມວຽກງານບໍລິຫານຄະດີໃນຫົວຂໍ້ຕ່າງໆ,ປະສານສົມທົບພາຍໃນ ແລະ ພາຍນອກ ໃນການດຳເນີນຄະດີເພື່ອແກ້ໄຂບັນຫາທີ່ມີຄວາມຫຍຸ້ງຍາກ, ບໍ່ເປັນເອກະພາບກັນ ເຮັດໃຫ້ການດໍາເນີນຄະດີມີຄວາມວ່ອງໄວ ແລະ ມີຄຸນນະພາບ, ຖືກຕ້ອງຕາມຄວາມເປັນຈິງ, ແກ້ໄຂ 7,604 ເລື່ອງ, ຍັງຄ້າງ 1,264 ເລື່ອງ ເທົ່າກັບ 85.74%, ຄະດີຂັ້ນຕົ້ນ (ສານປະຊາຊົນເຂດ, ສານປະຊາຊົນແຂວງ ແລະ ສານທະຫານ) ລວມທັງໝົດ7,284 ເລື່ອງ, ແກ້ໄຂ 6,360 ເລື່ອງ, ເທົ່າກັບ 87,31%, ຄະດີຂັ້ນອຸທອນ (ສານປະຊາຊົນ ແຂວງ, ພາກ ແລະ ສານທະຫານຂັ້ນສູງ) ລວມທັງໝົດມີ 1,046 ເລື່ອງ, ແກ້ໄຂ 791 ເລື່ອງ, ເທົ່າກັບ 75,62%, ຂັ້ນລົບລ້າງ (ສານປະຊາຊົນພາກ ແລະ ສານປະຊາຊົນສູງສຸດ) ລວມ 331 ເລື່ອງ, ແກ້ໄຂ 211 ເລື່ອງເທົ່າ 6.19%, ຄະດີເພິ່ມຂຶ້ນ ລວມທັງໝົດມີ 77 ເລື່ອງ, ແກ້ໄຂ 58 ເລື່ອງ, ເທົ່າກັບ 75.37%, ຄະດີອາຍາ 38 ເລື່ອງ, ແກ້ໄຂໄດ້ 27 ເລື່ອງ, ເທົ່າກັບ 71%, ຄະດີແພ່ງ 29 ເລື່ອງ, ແກ້ໄຂໄດ້ 22 ເລື່ອງ, ເທົ່າກັບ 76%, ຄະດີການຄ້າ 7 ເລື່ອງ, ແກ້ໄຂໄດ້ 6 ເລື່ອງ, ເທົ່າກັບ 86%, ຄະດີຄອບຄົວ 3 ເລື່ອງ, ແກ້ໄຂໄດ້ 3 ເລື່ອງ, ເທົ່າກັບ 100%.
ຄຽງຄູ່ກັນນັ້ນ, ຍັງໄດ້ເອົາໃຈໃສ່ດ້ານການສ້າງ ແລະ ປັບປຸງນິຕິກຳ: ໄດ້ປັບປຸງກົດໝາຍວ່າດ້ວຍສານປະຊາຊົນບາງມາດຕາ; ໄດ້ປັບປຸງມະຕິຕົກລົງຂອງຄະນະປະຈຳສະພາແຫ່ງຊາດ ເລກທີ 270/ຄປຈ, ລົງວັນທີ 10 ພະຈິກ 2022 ວ່າດ້ວຍການຈັດຕັ້ງ ແລະ ການເຄື່ອນໄຫວຂອງສານປະຊາຊົນສູງສຸດ; ໄດ້ປັບປຸງພາລະບົດບາດຂອງບັນດາກົມ, ຫ້ອງການ, ຄະນະສານອາຍາ ແລະ ສະຖາບັນຄົ້ນຄວ້າ ແລະ ຝຶກອົບຮົມ; ໄດ້ອອກນິຕິກຳໃຕ້ກົດໝາຍຈຳນວນໜຶ່ງເຊັ່ນ: ນິຕິກຳນໍາໃຊ້ກົດໝາຍວ່າດ້ວຍການດໍາເນີນຄະດີແພ່ງສະບັບປັບປຸງປີ 2024,ໄດ້ຄົ້ນຄວ້າບັນຫາທາງວິຊາການໃນການດໍາເນີນຄະດີທີ່ເຫັນວ່າເປັນບັນຫາຫຍຸ້ງຍາກ ແລະ ມີຄວາມບໍ່ເປັນເອກະພາບ ໃນຂອດຈັດຕັ້ງປະຕິບັດ ລວມມີ 111 ຄໍາຖາມ-ຄໍາຕອບ ໄດ້ນໍາເຂົ້າພິຈາລະນາຮັບຮອງເອົາຢູ່ໃນກອງປະຊຸມໃຫຍ່ຜູ້ພິພາກສາທົ່ວປະເທດຄັ້ງທີ XII ສຳເລັດ. ນອກນັ້ນ, ກໍຍັງແຕ່ງຕັ້ງຄະນະຮັບຜິດຊອບເຜີຍແຜ່ ເພື່ອຄົ້ນຄວ້າຈັດຕັ້ງຜັນຂະຫຍາຍກົດໝາຍວ່າດ້ວຍການດໍາເນີນຄະດີແພ່ງ ສະບັບປັບປຸງປີ 2024 ແລະ ເອົາໃຈໃສ່ວຽກງານອື່ນໆ.
(ຂ່າວ: ບຸນອູ້ມ)
ຄໍາເຫັນ