ໄດ້ຜະລິດວິດີໂອສຳລັບການພັດທະນາຄູຕອນໃໝ່ 2ຕອນກ່ຽວກັບການຄຸ້ມຄອງຫ້ອງຮຽນ; ເຕັກນິກການສອນບົດຮຽນຝຶກເວົ້າພາສາລາວສຳລັບນັກຮຽນຊົນເຜົ່າທີ່ບໍ່ເວົ້າພາສາລາວລຸ່ມເປັນພາສາຫຼັກໃນຄອບຄົວ. ວິດີໂອແມ່ນຜະລິດໂດຍສະຖາບັນຄົ້ນຄວ້າວິທະຍາສາດການສຶກສາ (ສວສ) ແລະ ສອດຄ່ອງກັບສື່ການຝຶກອົບຮົມທີ່ພັດທະນາໂດຍກົມສ້າງຄູ ເພື່ອສະໜັບສະໜູນການພັດທະນາວິຊາຊີບຄູແບບຕໍ່ເນື່ອງ.
ທ່ານ ອານຸລົມ ວິໄລພອນຜູ້ອໍານວຍການ ສວສ ກ່າວວ່າ: ຍັງມີຄູໃນ ສປປ ລາວ ຫຼາຍຄົນທີ່ສອນຢູ່ເຂດຫ່າງໄກ ແລະ ພົບຄວາມຫຍຸ້ງຍາກໃນການສອນ. ເຂົາເຈົ້າພົບກັບສິ່ງທ້າທາຍຫຼາຍຢ່າງເຊັ່ນ: ນັກຮຽນຍັງບໍ່ສາມາດເວົ້າພາສາລາວໄດ້ດີເທື່ອເມື່ອເຂົາເຈົ້າເລີ່ມເຂົ້າໂຮງຮຽນ, ຫ້ອງຮຽນທີ່ແອອັດ ແລະ ຫ້ອງຮຽນທີ່ເປັນຫ້ອງຄວບ. ນັບຕັ້ງແຕ່ປີ 2019 ເປັນຕົ້ນມາ ສວສ ໂດຍໄດ້ຮັບການສະໜັບສະໜູນຈາກລັດຖະບານອົສຕຣາລີໄດ້ຜະລິດວິດີໂອຫຼາກຫຼາຍຫົວຂໍ້ເພື່ອຊ່ວຍໃຫ້ຄູໄດ້ຮັບຄຳແນະນຳ ແລະ ໄດ້ສາທິດວິທີການສິດສອນທີ່ມີປະສິດທິພາບ ຊຶ່ງສາມາດຕອບສິ່ງທ້າທາຍຂອງເຂົາເຈົ້າທີ່ພົບຫຼາຍທີ່ສຸດ. ວິດີໂອໃໝ່ນີ້ໄດ້ຖ່າຍທຳຢູ່ໃນຫ້ອງຮຽນຢູ່ເຂດຫ່າງໄກໃນເມືອງຄໍາ ແຂວງຊຽງຂວາງ ແລະ ເມືອງໄຊທານີ ນະຄອນຫຼວງວຽງຈັນ ເພື່ອສະແດງຕົວຢ່າງຕົວຈິງຂອງເຕັກນິກໃນການສອນ. ວິດີໂອຍັງຖືກແປພາສາມືເພື່ອໃຫ້ສາມາດເຂົ້າເຖິງໄດ້ໂດຍຄູທຸກຄົນ.
ຫົວຂໍ້ວິດີໂອສຳລັບການພັດທະນາຄູໄດ້ຖືກເລືອກເພື່ອຕອບສະໜອງກັບສິ່ງທ້າທາຍທີ່ຄູປະເຊີນໜ້າຫຼາຍທີ່ສຸດໂດຍອີງໃສ່ຄໍາຄິດເຫັນຈາກຄູ. ຄູສາມາດນໍາໃຊ້ວິດີໂອດັ່ງກ່າວເພື່ອກະກຽມບົດຮຽນ, ປັບປຸງວິທີການສອນຂອງເຂົາເຈົ້າ ແລະ ຮຽນຮູ້ ຫຼືທົບທວນເຕັກນິກສະເພາະຕາມປຶ້ມຄູ່ມືຄູຂອງຫຼັກສູດສະບັບປັບປຸງໃໝ່. ຜູ້ເຮັດວຽກສຶກສານິເທດຂັ້ນເມືອງ ແລະ ຂັ້ນໂຮງຮຽນຍັງສາມາດນຳໃຊ້ວິດີໂອເຫຼົ່ານີ້ໃນເວລາໃຫ້ການຊ່ວຍເຫຼືອຄູ.
ທ່ານ ອານຸລົມ ວິໄລພອນ ກ່າວຕື່ມວ່າ: ການສອນຫຼັກສູດໃໝ່ແມ່ນຍັງມີຄວາມທ້າທາຍສຳລັບຄູ. ບົດຮຽນຝຶກເວົ້າພາສາລາວ ຈະຊ່ວຍໃຫ້ເຂົາເຈົ້າເຂົ້າໃຈວິທີການຈັດຕັ້ງປະຕິບັດກິດຈະກຳຫຼັກໃນແຕ່ລະບົດຮຽນຢ່າງມີປະສິດທິພາບ.
ທ່ານນາງ ວາເນັດຊ້າ ເຮັກກາທີ້ເລຂາເອກ ສະຖານທູດອົສຕຣາລີ ປະຈຳ ສປປ ລາວ ໄດ້ກ່າວວ່າ: ລັດຖະບານອົສຕຣາລີ ແລະ ກະຊວງ ສສກ ກຳລັງຮ່ວມມືກັນເພື່ອຮັບປະກັນໃຫ້ຄູໄດ້ຮັບການສະໜອງດ້ານຊັບພະຍາກອນ ແລະ ໄດ້ຮັບການສະໜັບສະໜູນໃຫ້ນຳໃຊ້ເຕັກນິກການສອນແບບໃໝ່. ລັດຖະບານອົສຕຣາລີເຊື່ອໝັ້ນເປັນຢ່າງຍິ່ງວ່າດ້ວຍສະຖານະການທີ່ຍັງຂາດແຄນຄູສອນໃນປັດຈຸບັນ, ມັນເປັນສິ່ງສຳຄັນທີ່ຄູຄວນໄດ້ປະກອບຄຳເຫັນ, ບອກຄວາມຮູ້ສຶກ, ໄດ້ຮັບຄວາມເຂົ້າໃຈ ແລະ ທີ່ສຳຄັນທີ່ສຸດແມ່ນການໄດ້ຮັບການສະໜັບສະໜູນ. ນີ້ແມ່ນກຸນແຈເພື່ອແກ້ໄຂສິ່ງທ້າທາຍທີ່ເຂົາເຈົ້າປະເຊີນໃນເວລາສອນ ໂດຍສະເພາະແມ່ນຜູ້ທີ່ຢູ່ເຂດຫ່າງໄກ. ພວກເຮົາຢາກໃຫ້ຄູມີແຮງບັນດານໃຈ ແລະ ສ້າງຄວາມເຂັ້ມແຂງເພື່ອໃຫ້ເຂົາເຈົ້າຢຶດໝັ້ນຕໍ່ບົດບາດອັນສຳຄັນຂອງເຂົາເຈົ້າໃນການສິດສອນຄົນຮຸ່ນໃໝ່, ຜູ້ທີ່ຈະເປັນຜູ້ນຳ ແລະ ນັກຄົ້ນຄວ້າໃນອະນາຄົດ.
ທ່ານ ນາງ ວາເນັດຊ້າ ເຮັກກາທີ້ ກ່າວຕື່ມວ່າ:ບົດຮຽນຝຶກເວົ້າພາສາລາວເປັນຕົວຢ່າງອັນດີທີ່ສະແດງໃຫ້ເຫັນວ່າບົດຮຽນທົດລອງຂະໜາດນ້ອຍ ແຕ່ປະສົບຜົນສຳເລັດ ກາຍເປັນບົດຮຽນທີ່ໄດ້ຮັບການອະນຸມັດໃຫ້ສິດສອນທົ່ວປະເທດ. ລັດຖະບານອົສຕຣາລີມີຄວາມພູມໃຈໃນການສົ່ງເສີມວິທີການສິດສອນທີ່ຈະຮັບປະກັນການສຶກສາຮຽນຮ່ວມ ແລະ ຜົນການຮຽນທີ່ດີຂຶ້ນສໍາລັບນັກຮຽນທຸກຄົນໂດຍສະເພາະນັກຮຽນທີ່ຕ້ອງການການສະໜັບສະໜູນເພີ່ມຕື່ມ ເພື່ອເສີມສ້າງທັກສະການສື່ສານພາສາລາວ. ຕ້ອງການໃຫ້ນັກສຶກສາທຸກຄົນຮູ້ວ່າເຂົາເຈົ້າສາມາດເຕີບໃຫຍ່ ແລະ ຮຽນຮູ້ຢູ່ໃນໂຮງຮຽນ. ການແກ້ໄຂຊ່ອງວ່າງທາງດ້ານພາສາແມ່ນກຸນແຈເພື່ອຊຸກຍູ້ໃຫ້ນັກຮຽນທີ່ບໍ່ເວົ້າພາສາລາວລຸ່ມເປັນພາສາຫຼັກໃນຄອບຄົວເຂົ້າໂຮງຮຽນ.
ຫົວຂໍ້ວິດີໂອສຳລັບການພັດທະນາຄູຕອນໃໝ່ທີ 24 ກ່ຽວກັບການຄຸ້ມຄອງຫ້ອງຮຽນ. ການຈັດການຫ້ອງຮຽນເປັນຍຸດທະສາດຫຼັກເພື່ອຮັບປະກັນໃຫ້ນັກຮຽນສາມາດເຮັດວຽກເປັນຢ່າງເອກະລາດແລະມີສ່ວນຮ່ວມຢ່າງຫ້າວຫັນໃນການຮຽນຮູ້. ນີ້ແມ່ນສິ່ງຈຳເປັນໃນ ສປປ ລາວຊຶ່ງຫຼັກສູດໄດ້ລວມມີເກມ, ກິດຈະກຳທີ່ປະຕິບັດຕົວຈິງ ແລະ ການເຮັດວຽກເປັນກຸ່ມ. ການຄຸ້ມຄອງຫ້ອງຮຽນທີ່ດີບໍ່ພຽງແຕ່ເຮັດໃຫ້ການສອນຂອງຄູງ່າຍຂຶ້ນເທົ່ານັ້ນ, ແຕ່ຍັງສາມາດມີຜົນສະທ້ອນທີ່ດີຕໍ່ການມີສ່ວນຮ່ວມທາງການຮຽນຂອງນັກຮຽນ ແລະ ຜົນການຮຽນຂອງນັກຮຽນ. ການຈັດສັນຫ້ອງຮຽນທີ່ດີໄດ້ສ້າງສະພາບແວດລ້ອມທີ່ກະຕຸ້ນການຮຽນຮູ້.ວິດີໂອໄດ້ສະແດງໃຫ້ເຫັນວິທີການຄຸ້ມຄອງຫ້ອງຮຽນຕາມ 6 ຄຳແນະນຳທີ່ສາມາດນຳໃຊ້ໄດ້ຢ່າງງ່າຍດາຍໂດຍຄູໃນທຸກຂັ້ນຮຽນຊັ້ນປະຖົມສຶກສາ ແລະ ໃນທຸກວິຊາ.
ວິດີໂອສຳລັບການພັດທະນາຄູຕອນໃໝ່ທີ 25 ສະແດງໃຫ້ເຫັນວິທີການສອນ 3 ກິດຈະກຳຫຼັກຂອງບົດຮຽນຝຶກເວົ້າພາສາລາວແລະ ໄດ້ນຳໃຊ້ໃນທົ່ວປະເທດໃນເດືອນກັນຍາ 2024 ນີ້. ວິດີໂອໄດ້ສະແດງໃຫ້ເຫັນເຕັກນິກທີ່ຄູສາມາດໃຊ້ເພື່ອຊ່ວຍນັກຮຽນຂັ້ນ ປ1 ທີ່ຍັງບໍ່ທັນເວົ້າພາສາລາວໄດ້ດີເທື່ອເມື່ອເລີ່ມເຂົ້າໂຮງຮຽນຊັ້ນປະຖົມສຶກສາ ເພື່ອພັດທະນາທັກສະພາສາລາວຂອງເຂົາເຈົ້າ. ວິດີໂອປະກອບມີພາກການສະທ້ອນຄືນໃຫ້ຄູຄິດເຖິງການປະຕິບັດຂອງຕົນເອງ ແລະ ວິທີການທີ່ເຂົາເຈົ້າຈະປັບປຸງການສອນເພື່ອຮັບປະກັນໃຫ້ນັກຮຽນເຂົ້າໃຈ ແລະ ພ້ອມກັນຮຽນຮູ້.
(ຂ່າວ: ວັນເພັງ, ພາບ: ບີຄວາ)
ຄໍາເຫັນ