ສສຍລ ເປີດຊຸດຝຶກອົບຮົມວຽກງານພັດທະນາແມ່ຍິງ

ຊຸດຝຶກອົບຮົມຄັ້ງນີ້, ຈັດຂຶ້ນເປັນເວລາ 5 ວັນ ເພື່ອຈັດຕັ້ງຜັນຂະຫຍາຍແຜນພັດແມ່ຍິງລາວ ໂດຍສະ ເພາະເປົ້າໝາຍທີ 3, ແຜນວຽກຈຸດສຸມທີ 1: ຝຶກອົບຮົມວຽກງານພັດທະນາແມ່ຍິງ ແລະ ວິຊາຊີບໃຫ້ແມ່ຍິງແຕ່ລະຂັ້ນ ເພື່ອສ້າງຄວາມເຂັ້ມແຂງໃນການນໍາພາ-ຄຸ້ມຄອງບໍລິຫານວຽກງານແມ່ຍິງຢ່າງເປັນລະບົບ ສາມາດນໍາໄປເຜີຍແຜ່ໃຫ້ສະມາຊິກສະຫະພັນແມ່ຍິງ ແລະ ແມ່ຍິງບັນດາເຜົ່າໃຫ້ຮັບຮູ້ ແລະ ເຂົ້າໃຈ.

ຊຸດອົບຮົມຄັ້ງນີ້, ສຳມະນາກອນຈະໄດ້ຮຽນຮູ້ຫຼາຍຫົວຂໍ້ສໍາຄັນ ເປັນຕົ້ນ: ການຄົ້ນຄວ້າຮໍ່າຮຽນ ແລະ ເຊື່ອມຊຶມພື້ນຖານທິດສະດີ ການປົດປ່ອຍແມ່ຍິງ ແລະ ທັດສະນະຂອງພັກຕໍ່ກັບວຽກແມ່ຍິງ, ແນວຄິດ ໄກສອນ ພົມວິຫານ ກ່ຽວກັບການປົດປ່ອຍແມ່ຍິງ; ພ້ອມນີ້, ຈະໄດ້ລົງເລິກຄົ້ນຄວ້າວຽກງານຫ້ອງການ; ວຽກງານຈັດຕັ້ງ; ວຽກງານໂຄສະນາ ແລະ ວັດທະນະທໍາ; ວຽກງານກວດກາ; ວຽກງານຂ່າວສານ; ວຽກງານພັດທະນາແມ່ຍິງ; ວຽກງານໃຫ້ຄໍາປຶກສາ ແລະ ປົກປ້ອງແມ່ຍິງ-ເດັກນ້ອຍ; ວຽກງານເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ ແລະ ວຽກງານສະຖາບັນການເງິນຈຸລະພາກທີ່ຮັບເງິນຝາກ ເພື່ອພັດທະນາແມ່ຍິງ, ຄອບຄົວ ແລະ ອື່ນໆ ໃຫ້ສາມາດນໍາໄປໝູນໃຊ້ເຂົ້າໃນການຈັດຕັ້ງປະຕິບັດວຽກງານ ແລະ ເຮັດໃຫ້ສຳມະນາກອນມີຄວາມຮູ້ໃນການບໍລິ ຫານວຽກງານຮອບດ້ານຂອງສະຫະພັນແມ່ຍິງໃຫ້ສອດຄ່ອງກັບເງື່ອນໄຂຂອງແຕ່ລະພາກສ່ວນ.

ໂອກາດນີ້, ຜູ້ເຂົ້າຮ່ວມຍັງຈະໄດ້ພ້ອມກັນຄົ້ນຄວ້າ, ປຶກສາຫາລື ແລະ ແລກປ່ຽນບົດຮຽນຊຶ່ງກັນ ແລະ ກັນ ກ່ຽວກັບການນໍາພາ-ຄຸ້ມຄອງວຽກງານຮອບດ້ານຂອງແມ່ຍິງ ແລະ ຍັງຈະໄດ້ລົງເລິກແຕ່ລະໜ້າວຽກທີ່ກ່ຽວ ຂ້ອງເພື່ອເປັນການປັບປຸງຄຸນນະພາບຂອງການນໍາພາ-ຄຸ້ມຄອງວຽກງານແມ່ຍິງ ແນໃສ່ເຮັດໃຫ້ສະຫະພັນແມ່ຍິງແຕ່ລະຂັ້ນມີຄວາມເຂັ້ມແຂງໃນທຸກດ້ານ, ເປັນກໍາລັງແຮງອັນໜັກແໜ້ນ ປະກອບສ່ວນໃນການປະຕິບັດແນວທາງນະໂຍບາຍຂອງພັກ, ແຜນພັດທະນາເສດຖະກິດ-ສັງຄົມຂອງລັດ ແລະ ແຜນພັດທະນາແມ່ຍິງລາວໃຫ້ປະກົດຜົນເປັນຈິງ.

ຂ່າວ: ສສຍລ