 |
ທ່ານນາງ ຈັນທະຄອນ ສີອຳພອນ ໄດ້ປະກອບຄຳເຫັນຢູ່ໃນພາກທິດທາງແຜນການ 5 ປີຕໍ່ໜ້າ ໂດຍສະເພາະລົງເລິກດ້ານນິຕິບັນຍັດ ສຳລັບດ້ານນີ້ ເຫັນວ່າແຜນ 5 ປີ (2026-2030) ຄາດໝາຍສູ້ຊົນຄົ້ນຄວ້າພິຈາລະນາ ແລະ ຮັບຮອງເອົາກົດໝາຍສ້າງໃໝ່ ແລະ ປັບປຸງຈຳນວນ 90 ສະບັບ ເຫັນວ່າມີຈຳນວນຫຼາຍສົມຄວນ, ຂໍສະເໜີຕໍ່ກຳມາທິການກົດໝາຍຂອງ ສພຊ ໃຫ້ພິຈາລະນາຕື່ມ ເປັນຕົ້ນ ແມ່ນກົດໝາຍສ້າງໃໝ່ ຊຶ່ງຕິດພັນກັບກົດໝາຍການປຸກລະດົມ ແລະ ການບໍລິຈາກເລືອດ ການໃຫ້ເລືອດປອດໄພ ແລະ ຮ່າງກົດໝາຍວ່າດ້ວຍບັດປະຈຳຕົວ. ສຳລັບ 2 ກົດໝາຍນີ້ ເຫັນວ່າກົດໝາຍວ່າດ້ວຍການປຸກລະດົມການບໍລິຈາກເລືອດ ຖ້າເປັນກົດໝາຍ ມັນຈະຕ້ອງມີການປະຕິບັດຢ່າງເຂັ້ມງວດ ມີຄວາມສັກສິດ, ເນື່ອງຈາກວ່າການປຸກລະດົມການບໍລິຈາກເລືອດນີ້ ແມ່ນພວກເຮົາເຮັດແບບສະໝັກໃຈ ຈະບໍ່ມີມາດຕະການບັງຄັບ ອັນນີ້ເຫັນວ່າມັນສອດຄ່ອງບໍ ສະເໜີໃຫ້ທາງຄະນະກຳມາທິການກົດໝາຍ ສົມທົບກັບກະຊວງຍຸຕິທຳວິເຄາະເຫດ ແລະ ຜົນ ວ່າມີຄວາມຈຳເປັນຄືແນວໃດ ແລະ ກົດໝາຍບັດປະຈຳຕົວ ຊຶ່ງບັດປະຈຳຕົວແມ່ນການຢັ້ງຢືນຖານະພົນລະເມືອງ ຊຶ່ງໄດ້ມີການຄົ້ນຄວ້າສ້າງໃໝ່, ສຳລັບກົດໝາຍສະບັບປັບປຸງ ໂດຍສະເພາະມີການປະເມີນ ບາງກົດໝາຍສະເໜີປັບປຸງຫຼາຍຄັ້ງ ສະເໜີໃຫ້ມີນິຕິກຳທີ່ຮັດກຸມ ວ່າຈະມີການປະເມີນກ່ອນທີ່ຈະນໍາມາປັບປຸງນີ້ ເຮົາຄວນມີການປະເມີນຈັກຄັ້ງ ຈະໃຫ້ມີຈັກມາດຕາ ຈຶ່ງຈະອະນຸມັດໃຫ້ມີການປັບປຸງ ຖ້າຈຳນວນມາດຕາມັນໜ້ອຍ 1 ຫາ 2 ມາດຕາ ເຮົາອາດຈະສະເໜີເປັນນິຕິກຳລຸ່ມກົດໝາຍໄດ້ບໍ. ເພາະວ່າມັນປັບປຸງເລື້ອຍໆ ເຮັດໃຫ້ບໍ່ມີຄວາມຄ່ອງຕົວໃນການປະຕິບັດ ໂດຍສະເພາະໃນການຄຸ້ມຄອງລັດ ຄຸ້ມຄອງສັງຄົມດ້ວຍກົດໝາຍ. ອີກບັນຫາໜຶ່ງ ການທີ່ຈະນໍາເອົາກົດໝາຍເຂົ້າໃນກອງປະຊຸມສະໃໝສາມັນຂອງ ສພຊ ແຕ່ລະຄັ້ງ ເຫັນວ່າຄວນມີການສຳມະນາ ແລະ ປະກອບຄຳເຫັນຂອງຄະນະກຳມາທິການກົດໝາຍກ່ອນ ເພື່ອເຮັດໃຫ້ເນື້ອໃນເລິກເຊິ່ງ ຮັບປະກັນການປະຕິບັດເວລາສັ້ນລົງ, ສຳລັບການນຳເອົາກົດໝາຍລົງໄປທາບທາມ ຫຼືປະກອບຄຳຄິດຄຳເຫັນຢູ່ໃນທ້ອງຖິ່ນ ຄວນນໍາໃຊ້ເວລາທີ່ເໝາະສົມ ແລະ ບໍ່ຄວນເອົາລົງໄປພ້ອມກັນຫຼາຍສະບັບ ເຮັດໃຫ້ເວລາໃນການຄົ້ນຄວ້າປະກອບຄໍາຄິດຄຳເຫັນບໍ່ເລິກເຊິ່ງ ແລ່ນນໍາເວລາ.
ທ່ານນາງ ກ້ອນແກ້ວ ຫຼວງໄຊມຸງຄຸນ ສສຊ ເຂດເລືອກຕັ້ງ 12 ແຂວງຄຳມ່ວນ ປະກອບຄຳເຫັນຕໍ່ການນໍາເອົາກົດໝາຍໄປທາບທາມ, ຊຶ່ງການນໍາເອົາກົດໝາຍໄປທາບທາມ ແລະ ປະເມີນກ່ອນນີ້ ເຫດຜົນຜູ້ຮັບຜິດຊອບ ຫຼືປະຊາຊົນຈະໄດ້ຄົ້ນຄວ້າອ່ານ ແລະ ທຳຄວາມເຂົ້າໃຈຢ່າງເລິກເຊິ່ງ, ສອງ ຄວນປະເມີນຄືນກ່ອນຈະນໍາມາຄົ້ນຄວ້າບາງເນື້ອໃນ, ບາງມາດຕາທີ່ຈະຕ້ອງໄດ້ປັບປຸງ; ກ່ຽວກັບແຜນການ 5 ປີໃນຕໍ່ໜ້າ ຂໍແລກປ່ຽນໃນແຜນງານທີໜຶ່ງ ຢູ່ໃນ 5 ແຜນງານ 25 ໂຄງການນີ້, ໃນໂຄງການຫັນ ແລະ ປັບປຸງກົດໝາຍໃຫ້ໄດ້ 80% ຢາກໃຫ້ເພີ່ມເປີເຊັນຂຶ້ນຕື່ມ, ຖ້າເຮົາຈະເຮັດເປົ້າໝາຍຫຼຸດ ເຮົາຕ້ອງໄດ້ແຍກເປັນກົດໝາຍໃຫ້ໄດ້ 90% ຂຶ້ນເມືອບໍ ແລະ ການສ້າງນິຕິກຳໃຕ້ກົດໝາຍ ເຮົາອາດຈະໃຫ້ໄດ້ຫຼາຍຂຶ້ນບໍ ຫຼືໜ້ອຍລົງ ອັນນີ້ຢາກໃຫ້ເພິ່ນແຍກລະອຽດ. ໂຄງການທີສີ່ ການປະເມີນຜົນ ແລະ ການຈັດຕັ້ງປະຕິບັດກົດໝາຍໃນແຕ່ລະຂົງເຂດ ຢາກໃຫ້ໃສ່ເປັນເປີເຊັນ, ສຳລັບແຜນງານທີ 5 ການສ້າງຄວາມເຂັ້ມແຂງແມ່ນເຫັນດີ ແຕ່ຢາກໃຫ້ສະມາຊິກສະພາປະຊາຊົນຂັ້ນແຂວງໄດ້ເຂົ້າຮ່ວມໃນແຜນ ຫຼືກິດຈະກຳຍ່ອຍໃດໜຶ່ງ ໃນການສ້າງຄວາມເຂັ້ມແຂງຂອງກຳມາທິການຕ່າງໆ ແລະ ໂຄງການທີ 5 ການສ້າງພື້ນຖານໂຄງລ່າງໃຫ້ ສສຊ ແລະ ສສຂ ຢາກໃຫ້ກຳນົດແຈ້ງລະອຽດ ເພີ່ນຈະສ້າງສະພາປະຊາຊົນແຂວງ ຈັກແຂວງ ແລະ ງົບປະມານຄືແນວໃດ ເພື່ອໃຫ້ແຜນດັ່ງກ່າວໄດ້ຮັບການຈັດຕັ້ງປະຕິບັດ ແລະ ຢາກໃຫ້ກຳນົດຢູ່ໃນກິດຈະກຳຕື່ມອີກ. ຂ່າວ: ພູວັນ; ພາບ: ສຳນານ
ຄໍາເຫັນ