 |
ທ່ານ ອາລຸນໄຊ ສູນນະລາດ ໄດ້ປະກອບຄຳເຫັນຕໍ່ວຽກງານຂອງອົງການກວດກາແຫ່ງລັດ ແລະ ອົງການກວດສອບແຫ່ງລັດ ໂດຍພື້ນຖານແມ່ນເຫັນດີເປັນເອກະພາບ ສະແດງຄວາມຊົມເຊີຍທັງສອງອົງການ ທີ່ສາມາດແກ້ໄຂໄດ້ຫຼາຍບັນຫາ, ການສ້າງຄູ່ມືກໍຫຼາຍ ໂດຍສະເພາະອົງການກວດສອບ ອັນສຳຄັນອີກອັນໜຶ່ງຂອງການກວດກາ ເຫັນວ່າມີອັນໃໝ່ ມີກົນໄກປະສານສົມທົບ ໂດຍສະເພາະວຽກງານກວດກາແຕ່ຫົວທີ ຄຶດວ່າຄວາມຈິງແລ້ວມີຜົນສຳເລັດຫຼາຍອັນ ການຍົກຂຶ້ນມານີ້ເພື່ອໃຫ້ຫຼາຍພາກສ່ວນເຫັນເຖິງຜົນສຳເລັດຂອງການກວດກາ-ກວດສອບ ແຕ່ບັນຫາທີ່ເຫັນວ່າຍັງຄ້າງທີ່ເປັນພື້ນຖານ ຈຸດທີໜຶ່ງ ແມ່ນການກວດສອບ-ກວດກາຍັງບໍ່ທັນທົ່ວເຖິງ ຍັງບໍ່ທັນຄົບໃນແຕ່ລະເປົ້າໝາຍ ຊຶ່ງສະແດງອອກຢູ່ໃນການຂຶ້ນແຜນເປົ້າໝາຍກວດສອບ-ກວດການີ້ ບໍ່ພຽງແຕ່ຂຶ້ນແຜນກວດສອບ-ກວດກາສິ່ງເກົ່າ ແຕ່ຍັງຂຶ້ນແຜນກວດກາໃນຈຸດທີ່ສ່ຽງ ປະກົດວ່າຍັງບໍ່ທັນໄດ້ທົ່ວເຖິງ ຢາກໃຫ້ທັງສອງອົງການລົງເລິກຕື່ມ, ປັດໃຈທີ່ສາມາດມີຄວາມສ່ຽງພວກເຮົາສາມາດເບິ່ງເຫັນ ໂດຍສະເພາະແມ່ນກວດກາການປະຕິບັດສັນຍາບັນດາໂຄງການເງິນກູ້ຈາກສາກົນ ການຊ່ວຍເຫຼືອລ້າ ໂຕນີ້ເຫັນວ່າມີຫຼາຍ ເປັນລັກສະນະຫຼໍ່ແຫຼມອັນນີ້ສຳຄັນທີ່ສຸດ, ຈຸດທີ່ສອງ ແມ່ນການແກ້ໄຂຜົນການກວດກາ-ກວດສອບໂຕນີ້ຍັງເຮັດໄດ້ໜ້ອຍ ເຮົາກວດສອບພົບເຫັນ 36 ພັນກວ່າຕື້ ເຮົາສາມາດເກັບກູ້ໄດ້ 7 ພັນກວ່າຕື້ ເຫັນວ່າເກັບກູ້ຄືນໄດ້ໜ້ອຍ ແລະ ມີຫຼາຍສາເຫດທີ່ພວກເຮົາຈະແກ້ໄຂໄດ້, ຈຸດທີສາມ ກົນໄກການປະສານງານລະຫວ່າງສອງອົງການບໍ່ທັນຊັດເຈນ ເຫັນວ່າມີ 2 ຈຸດ, ອັນທີໜຶ່ງ ໂດຍສະເພາະຖານຂໍ້ມູນຂອງຜູ້ທີ່ກວດສອບ ຖ້າກວດສອບດີຊັດເຈນ ການກວດກາກໍໄດ້ດີແກ້ໄຂກໍໄດ້ດີ, ອັນທີສອງ ກົນໄກທີ່ສຳຄັນທີ່ສຸດ ແມ່ນນິຕິກຳບາງມາດຕາ ທີ່ຍັງມີລັກສະນະຊັບຊ້ອນ ແລະ ການຜັນຂະຫຍາຍກົດໝາຍບາງມາດຕາຍັງໜ້ອຍຫຼາຍ ໂດຍສະເພາະອົງການກວດກາ ການຜັນຂະຫຍາຍມາດຕາ 29 ໂຕນີ້ສຳຄັນທີ່ສຸດ ແມ່ນການແກ້ໄຂຜົນຂອງການກວດກາ ລະຫວ່າງມອບໃຫ້ຄະນະພັກ-ຄະນະນຳເປັນຜູ້ແກ້ໄຂ ແຕ່ວ່ານິຕິກຳທີ່ຜັນຂະຫຍາຍຍັງບໍ່ແຈ້ງ. ອີກບັນຫາໜຶ່ງທີ່ຍັງຄ້າງ ແມ່ນການສ້າງນັກກວດສອບ-ນັກກວດກາ ທີ່ເປັນມືອາຊີບ, ມີຈັນຍາບັນ-ຈັນຍາທຳມີຄວາມສຳຄັນຫຼາຍຄວນເອົາເຂົ້າຢູ່ໃນແຜນການແກ້ໄຂ, ບັນຫາທີ່ສາມ ໃນຕໍ່ໜ້າເປັນໄປໄດ້ໃຫ້ເອົາເຂົ້າຢູ່ໃນແຜນບໍ່ວ່າກວດສອບ ແລະ ກວດກາ ກໍຄືການປູກຈິດສຳນຶກໃຫ້ພະນັກງານ ແລະ ປະຊາຊົນບໍ່ກ້າເຮັດຜິດ ເຮົາຈະເຮັດແນວໃດ ເພື່ອເຮັດໃຫ້ປະເທດຊາດຂອງພວກເຮົາເປັນປະເທດທີ່ບໍລິສຸດ. ສະນັ້ນ, ຄວນເອົາໃຈໃສ່ການສຶກສາອົບຮົມຕັ້ງແຕ່ຍັງນ້ອຍ, ອີກບັນຫາໜຶ່ງທີ່ສຳຄັນຕ້ອງກຳນົດທີ່ຕັ້ງໃຫ້ມັນແຈ້ງ, ກຳນົດສິດໜ້າທີ່ໃຫ້ມັນຊັດເຈນ ແລະ ບັນດານິຕິກຳຕ່າງໆ ໃຫ້ຮີບຮ້ອນຜັນຂະຫຍາຍເປັນຄູ່ມືອັນລະອຽດ ເພື່ອເປັນບ່ອນອີງໃນການສ້າງນັກກວດສອບ-ກວດກາທີ່ດີ ເພາະຈະເຮັດໃຫ້ການຄຸ້ມຄອງລັດ, ຄຸ້ມຄອງສັງຄົມຂອງພວກເຮົາມີຄວາມສັກສິດ ມີຜົນດີຕໍ່ປະເທດຊາດ.
ທ່ານນາງ ຫົງຄຳ ໄຊຍະຄົມ ສສຊ ເຂດເລືອກຕັ້ງທີ 13 ແຂວງສະຫວັນນະເຂດ ປະກອບຄຳເຫັນຕໍ່ອົງການກວດກາແຫ່ງລັດ ແລະ ອົງການກວດສອບແຫ່ງລັດ ຊຶ່ງທ່ານໄດ້ແລກປ່ຽນຕໍ່ອົງການກວດສອບແຫ່ງລັດ ຕໍ່ກັບກໍລະນີມີເຈົ້າໜ້າທີ່ຢູ່ໃນຂົງເຂດເສດຖະກິດບາງຂົງເຂດ ສວຍໃຊ້ໜ້າທີ່ເພື່ອສ້າງຜົນປະໂຫຍດໃຫ້ຕົນເອງ, ຂໍໃຫ້ອົງການກວດສອບຕິດຕາມ. ສະນັ້ນ, ໃນອີກ 5 ປີຕໍ່ໜ້າ ຂໍໃຫ້ອົງການກວດສອບມີຄວາມຮັບຜິດຊອບຕໍ່ກໍລະນີນີ້ເພື່ອເຮັດໃຫ້ການກະທຳຜິດດັ່ງກ່າວບໍ່ໃຫ້ເກີດຂຶ້ນອີກ, ຂໍໃຫ້ອົງການກວດສອບກຳນົດເຂົ້າໃນແຜນຕໍ່ໜ້າຈະແກ້ໄຂແນວໃດ, ຕໍ່ກັບອົງການກວດກາແຫ່ງລັດ ຢາກໃຫ້ເອົາໃຈໃສ່ປະຕິບັດໜ້າທີ່ຂອງຕົນໃຫ້ເຂັ້ມແຂງຕື່ມ.ຂ່າວ: ພູວັນ; ພາບ: ສຳນານ
ຄໍາເຫັນ