 |
ການລົງເຄື່ອນໄຫວໃນຄັ້ງນີ້ມີ ທ່ານ ທິບພະສອນ ສະມາເລິກ ປະທານຄະນະກຳມະການ ປກຊ-ປກສ ແລະ ຍຸຕິທຳ ສະພາປະຊາຊົນແຂວງ, ສສຊ ປະຈຳເຂດເລືອກຕັ້ງທີ 15, ທ່ານ ສາທິດ ປັດສາພັນ ກຳມະການພັກແຂວງ, ເລຂາພັກເມືອງ, ຫົວໜ້າຄະນະ ສສຂ ປະຈຳເຂດເລືອກຕັ້ງເມືອງໂຂງ ພ້ອມຄະນະ.
ຈຸດປະສົງຫຼັກຂອງການລົງພື້ນທີ່ໃນຄັ້ງນີ້ ແມ່ນເພື່ອເຜີຍແຜ່ຜົນສຳເລັດກອງປະຊຸມຄັ້ງປະຖົມມະລຶກ ຂອງສະພາແຫ່ງຊາດ ຊຸດທີ X ແລະ ສະພາປະຊາຊົນແຂວງຈຳປາສັກ ຊຸດທີ V. ນອກຈາກນີ້, ຍັງໄດ້ຮັບຟັງ, ເກັບກຳຄຳຄິດຄຳເຫັນ ແລະ ຄຳສະເໜີຕ່າງໆ ຂອງປະຊາຊົນຜູ້ມີສິດເລືອກຕັ້ງໂດຍກົງ ເພື່ອນຳໄປພິຈາລະນາແກ້ໄຂຜ່ານກົນໄກຂອງສະພາ.
ໂອກາດນີ້ ທ່ານ ຈັນທະນົງສິນ ຈັນທະພິມ ຮອງເລຂາພັກເມືອງ ປະທານຄະນະກຳມະການປົກຄອງເມືອງ ໄດ້ລາຍງານໂດຍສັງເຂບກ່ຽວກັບວຽກງານຮອບດ້ານໃນໄລຍະ 3 ເດືອນຕົ້ນປີ 2026 ວ່າ: ຜົນສຳເລັດໃນຂົງເຂດເສດຖະກິດ ແລະ ພື້ນຖານໂຄງລ່າງ ໂຄງການລົງທຶນ ແລະ ງົບປະມານ: ມີໂຄງການລົງທຶນຂອງລັດ (ໂຄງການສືບຕໍ່) 8 ໂຄງການ ມູນຄ່າ 298.21 ຕື້ກີບ, ໂຄງການປະກອບສ່ວນຂອງສັງຄົມ 8 ໂຄງການ, ໂຄງການຊ່ວຍເຫຼືອ 1 ໂຄງການ, ໂຄງການລົງທຶນເອກະຊົນມີ 22 ໂຄງການ ແລະ ເຂດເສດຖະກິດພິເສດ 1 ແຫ່ງ.
ການເກັບລາຍຮັບເຂົ້າງົບປະມານປະຕິບັດໄດ້ 5.5 ຕື້ກີບ (ເທົ່າກັບ 31% ຂອງແຜນປີ) ແລະ ປະຕິບັດລາຍຈ່າຍໄດ້ 5,6 ຕື້ກີບ; ການຜະລິດກະສິກຳ: ເຂົ້ານາແຊງປະຕິບັດໄດ້ 2,356.14 ເຮັກຕາ ເທົ່າກັບ 93.23% ຂອງແຜນການ, ສະມັດຕະພາບ 5.26 ໂຕນ/ເຮັກຕາ, ເກັບກ່ຽວແລ້ວ 80%; ການປູກພືດລະດູແລ້ງບັນລຸໄດ້ 100% ຂອງແຜນການ (368 ເຮັກຕາ). ນອກນີ້ ໄດ້ມີການສັກຢາກັນພະຍາດສັດ (ຄວາຍ, ງົວ, ໝູ, ສັດປີກ) ແລະ ສ້າງມູນຄ່າການຈຳໜ່າຍຜະລິດຕະພັນພາຍໃນເມືອງໄດ້ 3.3 ຕື້ກີບ.
ພື້ນຖານໂຄງລ່າງ: ໂຄງການທີ່ມີຄວາມຄືບໜ້າດີເດັ່ນແມ່ນ ການຍົກລະດັບສ້ອມແປງທາງບ້ານນາເຊືອກ - ໂພນວິໄຊ ບັນລຸໄດ້ 100%, ເສັ້ນທາງເຂົ້າບ້ານພຽງດີ ຄືບໜ້າ 90%, ເສັ້ນທາງພຽງດີ-ນາກະສັງຄືບໜ້າ 85% ແລະ ທາງປູຢາງສອງຊັ້ນເຂົ້າບ້ານເສັດ-ນາປາກຽບ-ບ້ານໂສດ ຄືບໜ້າ 18.9%, ນອກຈາກນີ້ ວຽກງານວັດທະນະທຳ-ສັງຄົມ ກໍມີຜົນສຳເລັດເປັນກ້າວໆ.
ນອກຈາກນັ້ນ ຍັງມີຂໍ້ສະເໜີຈຳນວນໜຶ່ງເຊັ່ນ: ຂະແໜງການສຶກສາ: ສະເໜີເພີ່ມງົບປະມານ (ເງິນບໍລິຫານ ແລະ ເງິນດັດສົມສົ່ງເສີມ); ສະເໜີຂໍທຶນສ້ອມແປງອາຄານໂຮງຮຽນປະຖົມສົມບູນ 4 ແຫ່ງ (ບຶງງາມ, ນາແວງ, ໃຫມ່ສີວິໄລ, ຫໍ່ເຂົ້າ) ທີ່ເປເພ. ຂະແໜງການທ່ອງທ່ຽວ ສະເໜີໃຫ້ຂັ້ນແຂວງຊ່ວຍຕິດຕາມ ແລະ ຊຸກຍູ້ຜູ້ພັດທະນາໂຄງການຢູ່ແຫຼ່ງທ່ອງທ່ຽວຄອນພະເພັງ ແລະ ສົມພະມິດ ເພື່ອເລັ່ງປັບປຸງພື້ນຖານໂຄງລ່າງ ແລະ ການບໍລິການ. ຂະແໜງໂຍທາ ສະເໜີຂໍງົບປະມານກໍ່ສ້າງເສັ້ນທາງເບຕົງ ແຕ່ບ້ານກາງໂຂງ ຫາ ບ້ານເມືອງແສນ (ກວ້າງ 6 ແມັດ, ຍາວ 8,1 ກິໂລແມັດ) ມູນຄ່າ 31,4 ຕື້ກີບ. ວຽກງານກຳມະບານ: ສະເໜີປັບປຸງລະບຽບກອງທຶນທານຸເຄາະ ເພື່ອໃຫ້ຜູ້ເສຍຊີວິດໄດ້ຮັບນະໂຍບາຍສູງຂຶ້ນ.
ຂ່າວ-ພາບ: ເມືອງໂຂງ
ຄໍາເຫັນ