 |
ທ່ານ ຄໍາຄູນ ຄູນທະວົງ ຮອງປະທານສະມາຄົມນັກທຸລະກິດໜຸ່ມລາວ ໄດ້ຂຶ້ນຜ່ານບົດສຫຼຸບການເຄື່ອນໄຫວໄລຍະຜ່ານມາ ແລະ ລາຍງານຜົນສໍາເລັດບັນດາໜ້າວຽກທີ່ໄດ້ຈັດຕັ້ງປະຕິບັດເປັນຕົ້ນ: ວຽກງານແນວຄິດ ໄດ້ເອົາໃຈໃສ່ຊີ້ນຳ-ນຳພາສະມາຊິກເຂົ້າຮ່ວມເຊື່ອມຊຶມ ແລະ ເຂົ້າຮ່ວມຂະບວນການຕາມວັນປະຫວັດສາດສຳຄັນຂອງຊາດ, ວຽກງານການຈັດຕັ້ງສາມາດຂະຫຍາຍສະມາຊິກກວມເອົາກິດຈະການເຖິງ 112 ບໍລິສັດ, ສ້າງວຽກເຮັດງານທຳໃຫ້ປະຊາຊົນໄດ້ 615 ຄົນ; ພ້ອມທັງໄດ້ຈັດຕັ້ງປະຕິບັດແຜນພັດທະນາ 5 ປີ ຢ່າງເປັນຮູບປະທຳ. ພ້ອມນີ້, ຜູ້ເຂົ້າຮ່ວມຍັງໄດ້ຮັບຟັງບັນດາຫົວຂໍ້ທີ່ສໍາຄັນຄື: ການຍົກລະດັບ ແລະ ສ້າງສັກກະຍະພາບຊາວໜຸ່ມ ດ້ວຍເຕັກໂນໂລຊີ ແລະ ນະວັດຕະກຳ ດີຈີຕອນ, ນະໂຍບາຍການສົ່ງເສີມ ແລະ ການເຂົ້າເຖິງແຫຼ່ງທຶນ ເພື່ອທຸລະກິດ SME ໃນການຂັບເຄື່ອນທຸລະກິດຊາວໜຸ່ມຢ່າງຍືນຍົງ ແລະ ການສະເໜີບົດໃນຫົວຂໍ້: ການສົ່ງເສີມການມີສ່ວນຮ່ວມໃນໂຄງການລົງທຶນຂອງລັດແກ່ພາກທຸລະກິດຄັ້ງນີ້ ແລະ ໄດ້ມີພິທີມອບ-ຮັບໃບຍ້ອງຍໍ ແລະ ໃບກຽດຕິຄຸນແກ່ຜູ້ສະໜັບສະໜູນ ແລະ ມອບຫຼຽນຊາວໜຸ່ມຕະລຸມບອນໃຫ້ແກ່ຜູ້ທີ່ມີຜົນງານດີເດັ່ນ.
ໂອກາດດັ່ງກ່າວ, ທ່ານ ທອງລີ ສີສຸລິດ ກໍໄດ້ມີຄໍາເຫັນຕໍ່ກອງປະຊຸມວ່າ: ກອງປະຊຸມຄັ້ງນີ້ ສຸດທີ່ມີຄວາມສໍາຄັນຍິ່ງ ໂດຍສະເພາະການຫັນເອົາເນື້ອໃນຈິດໃຈຂອງກອງປະຊຸມໄປຈັດຕັ້ງປະຕິບັດໃຫ້ເກີດດອກອອກຜົນຄື: ເພີ່ມທະວີການສຶກສາອົບຮົມການເມືອງ-ແນວຄິດຕິດພັນກັບການສ້າງເສດຖະກິດເອກະລາດ ເປັນເຈົ້າຕົນເອງ (ສອຈ), ເອົາໃຈໃສ່ສຶກສາອົບຮົມການເມືອງເເນວຄິດ, ນໍາພາ ແລະ ເຊື່ອມຊຶມນິຕິກຳ, ມະຕິ ແລະ ແນວ ທາງຂອງພັກ-ລັດ ໃຫ້ສະມາຊິກຢ່າງທົ່ວເຖິງ, ເລັ່ງໃສ່ການປັບປຸງກົງຈັກການຈັດຕັ້ງ, ສ້າງຖານຂໍ້ມູນ Digital Infrastructure ແລະ ກອງທຶນພັດທະນາ ສທໜລ ໃຫ້ມີຄວາມເຂັ້ມແຂງຮອບດ້ານ, ສືບຕໍ່ຜັນຂະຫຍາຍ MOU ເປັນໂຄງການຕົວຈິງ, ຍູ້ແຮງນະວັດຕະກໍາ AI ແລະ ສ້າງວຽກເຮັດງານທຳ ທີ່ສໍາຄັນຕ້ອງແນໃສ່ ການສ້າງວຽກເຮັດງານທຳ, ສ້າງອາຊີບໃຫ້ແກ່ຊາວໜຸ່ມ ແລະ ປະຊາຊົນລາວຢູ່ທ້ອງຖິ່ນ, ສືບຕໍ່ການສ້າງຂະບວນການ 25 ປີ ສທໜລ, ພ້ອມທັງເປັນເຈົ້າການປະກອບສ່ວນຢ່າງຕັ້ງໜ້າ ເຂົ້າໃນການຈັດຕັ້ງປະຕິບັດວາລະແຫ່ງຊາດ (ການແກ້ໄຂບັນຫາຢາເສບຕິດ ແລະ ການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ) ຢ່າງຕໍ່ເນື່ອງ, ເພີ່ມທະວີການຕິດຕາມ, ກວດກາ ແລະ ກົນໄກການປະສານງານ ຢ່າງມີລະບົບ ເພື່ອເຮັດໃຫ້ທຸກໆວຽກງານໄດ້ຈັດຕັ້ງປະຕິບັດໃຫ້ສໍາເລັດຕາມລະດັບຄາດໝາຍ.
ຂ່າວ-ພາບ: ຍຸພິນທອງ-ບຸນອູ້ມ
ຄໍາເຫັນ