ການນໍາຂັ້ນສູງຂອງພວກເຮົາ ກໍໄດ້ວາງເປັນຄຳຂວັນທີ່ມີຄວາມໝາຍທາງດ້ານທິດສະດີ ແລະ ພຶດຕິກໍາ ວ່າ: “ສື່່ມວນຊົນ ເປັນຜູ້ທີ່ປາກອອກແສງ, ຜູ້ຮູ້ແທງເຖິງໃຈ, ຜູ້ສະດຸ້ງໄວເມື່ອອ່ານ, ຜູ້ທີ່ກ້າຜ່ານອຸປະສັກ, ຜູ້ທີ່ຮັກຄວາມຈິງ, ຜູ້ທີ່ຍິງຖືກເປົ້າ”. ພວກເຮົາຖັນແຖວສື່ມວນຊົນໄດ້ຖືເອົາທັດ ສະນະຊີ້ນໍາດັ່ງກ່າວນີ້ ເປັນເຂັມທິດຊີ້ບອກທາງ ໃນການຈັດຕັ້ງປະຕິບັດໜ້າທີ່ການເມືອງຂອງຕົນຢ່າງມີຄວາມຮັບຜິດຊອບສູງ. ຄວາມໝາຍທີ່ສະແດງອອກແຈ້ງເຖິງທັດສະນະຊີ້ນຳແມ່ນເຂົ້າໃຈແຈ້ງດັ່ງນີ້: 1). ສື່ມວນຊົນ ເປັນຜູ້ທີ່ປາກອອກແສງ ແມ່ແສງ” ໃນນີ້ໝາຍເຖິງ “ແສງສະຫວ່າງແຫ່ງຄວາມເປັນຈິງ, ແຫ່ງປັນຍາຄວາມຮູ້ ເຍືອງທາງ ກ້າວເດີນສູ່ຄວາມສີວິໄລ” ທີ່ຕ້ອງມີ “ລັກສະນະຂອງສື່ມວນຊົນ”. ຄໍາວ່າ “ປາກອອກແສງ” ບໍ່ໄດ້ເປັນພຽງຄໍາອຸປະມາ ເຊີງວັນນະກໍາ ເພື່ອຍົກຍ້ອງເທົ່ານັ້ນ, ແຕ່ເປັນຂໍ້ໂຕ້ແຍ້ງທາງວິທະຍາສາດ ທີ່ສ່ອງແສງເຖິງພາລະບົດບາດ ແລະ ຈັນຍາບັນດ້ານວິຊາຊີບຂອງສື່ມວນຊົນ ໃນການສ່ອງແສງໃຫ້ຄົນເຮົາໄດ້ຮັບຂໍ້ມູນຂ່າວສານ ທີ່ເປັນຄວາມຮູ້, ຊ່ວຍຊີ້ນໍາແນວຄິດ ແລະ ຊຸກຍູ້ຄວາມກ້າວໜ້າຂອງສັງຄົມ; “ປາກອອກແສງ” ໝາຍເຖິງການນໍາສະເໜີບົດ ແລະ ຂ່າວທີ່ຖືກຕ້ອງ, ສ້າງສັນ, ມີຄຸນຄ່າ ແລະ ກໍ່ໃຫ້ເກີດປະໂຫຍດ ເປັນແສງເຍືອງທາງຊ່ວຍໃຫ້ຄວາມຮູ້, ຄວາມເຂົ້າໃຈບັນຫາການເມືອງ, ເສດຖະກິດ, ວັດທະນະທໍາ, ສັງຄົມຢ່າງມີຈຸດປະສົງ ແລະ ທັນການ. ສື່ມວນຊົນ, ຍັງເປັນເວທີເພື່ອໃຫ້ມະຫາຊົນສະແດງຄວາມຄິດເຫັນ ແລະ ຄວາມມຸ່ງຫວັງຂອງປະຊາຊົນທີ່ສ່ອງແສງໃຫ້ພັກ-ລັດໄດ້ຮັບຮູ້ ເພື່ອນໍາມາຄົ້ນຄວ້າຊີ້ແຈງອະທິບາຍ ແລະ ປັບປຸງແກ້ໄຂ ໃຫ້ສອດຄ່ອງກັບຄວາມເປັນຈິງ. 2). ສື່ມວນຊົນ ເປັນຜູ້ຮູ້ແທງເຖິງໃຈ ແມ່ນໜຶ່ງໃນຄຸນລັກສະນະພື້ນຖານຂອງສື່ມວນຊົນ ແມ່ນ “ເປັນຜູ້ຮູ້ແທງເຖິງໃຈ” ໄດ້ເນັ້ນໜັກບົດບາດຄວາມແຫຼມຄົມ, ຄວາມວ່ອງໄວ ແລະ ພິກໄຫວຂອງສື່ມວນຊົນ ທີ່ສາມາດສ້າງຜະລິດຕະພັນສື່ມວນຊົນ ເປັນອາວຸດອັນແຫຼມຄົມທາງດ້ານການເມືອງ-ແນວຄິດ ເພື່ອຖະແຫຼງຂ່າວ ໂຄສະນາ ເຜີຍແຜ່ເຂົ້າເຖິງຈິດໃຈຂອງຜູ້ອ່ານ, ຜູ້ຟັງ, ຜູ້ຊົມ ກໍຄືປະຊາຊົນບັນດາເຜົ່າ ເພື່ອສ້າງຄວາມເປັນເອກະພາບ, ເຫັນດີເຫັນພ້ອມ ແລະ ພ້ອມກັນຈັດຕັ້ງປະຕິບັດຢ່າງຖືກຕ້ອງໃນການປົກປັກຮັກສາ ແລະ ສ້າງສາພັດທະນາປະເທດຊາດ ຕາມເສັ້ນທາງສັງຄົມນິຍົມ. ສະນັ້ນ, ພັກເຮົາ ຈຶ່ງເອົາໃຈໃສ່ປຸກລະດົມຂົນຂວາຍປະຊາຊົນ ໂດຍຜ່ານຜະ ລິດຕະພັນສື່ມວນຊົນທີ່ແຫຼມຄົມ ເພື່ອແທງເຂົ້າເຖິງແນວຄິດຈິດໃຈຂອງປະຊາຊົນ; “ຄົມແຫຼມ ໝາຍວ່າ ມີເນື້ອໃນທາງການເມືອງ-ແນວຄິດ ແລະ ທິດສະດີເລິກເຊິ່ງ, ທັງມີລັກສະນະຕໍ່ສູ້, ລັກສະນະປະຊາຊົນ; ມີການໃຫ້ຂ່າວຢ່າງກວ້າງຂວາງ, ຄົບຖ້ວນ ແລະ ແທດຕົວຈິງ; ວ່ອງໄວ ທັນການ, ຊັດເຈນ; ເຂົ້າໃຈງ່າຍ ແລະ ມີຫຼາຍຮູບຫຼາຍສີ. 3). ສື່ມວນຊົນ ເປັນຜູ້ສະດຸ້ງໄວເມື່ອໄດ້ອ່ານ, ຄວາມສະດຸ້ງໄວຂອງສື່ມວນຊົນ ແມ່ນຮັບປະກັນຄວາມທັນເຫດການ, ການຊີ້ນໍາທັດສະນະຂອງມະຫາຊົນ ແລະ ຕອບໂຕ້ຂ່າວປອມ, ຂໍ້ມູນບິດເບືອນ ຫຼື ທັບຖົມໂຈມຕີ ແນວທາງ-ອຸດົມການຂອງພວກເຮົາ ຄໍາວ່າ; “ສະດຸ້ງໄວເມື່ອໄດ້ອ່ານ” ໃນນີ້ ໝາຍເຖິງຄວາມສາມາດໃນການຮັບຮູ້, ຄົ້ນພົບ ແລະ ຕອບສະໜອງຢ່າງທັນການ ເມື່ອໄດ້ຮັບຮູ້ຂໍ້ມູນຂ່າວສານ, ຮັບຮູ້ບັນດາເຫດການ, ບັນຫາ, ປະ ກົດການ ຫຼື ຄວາມຜິດປົກກະຕິທີ່ເກີດຂຶ້ນໃນສັງຄົມ; ຄວາມ “ສະດຸ້ງ” ນີ້, ແມ່ນການຕື່ນຕົວ, ຄວາມໄວທາງການເມືອງ, ອຸດົມການ, ວິຊາຊີບ ແລະ ທາງສັງຄົມຂອງຜູ້ທີ່ເຮັດວຽກສື່ມວນຊົນ ໂດຍສະເພາະນັກຂ່າວ, ນັກບັນນາທິການໃນການຕື່ນຕົວເພື່ອເຂົ້າເຖິງຄວາມຈິງ, ກວດສອບຂໍ້ມູນ ແລະ ສ້າງຜະລິດຕະພັນສື່ມວນຊົນ ເພື່ອນໍາສະເໜີບົດ, ຂ່າວຢ່າງຖືກຕ້ອງ, ວ່ອງໄວ ແລະ ທັນກັບສະພາບການ. 4). ສື່ມວນຊົນ ເປັນຜູ້ທີ່ກ້າຜ່ານອຸປະສັກ,ຕະຫຼອດໄລຍະຂອງການປະຕິວັດ, ສື່ມວນຊົນໄດ້ຜ່ານຜ່າອຸປະສັກນາໆປະການ ຄໍາວ່າ; “ສື່ມວນຊົນ ເປັນຜູ້ທີ່ກ້າຜ່ານອຸປະສັກ” ແມ່ນໝາຍເຖິງຄວາມກ້າຫານ, ຄວາມເສຍສະຫຼະ ແລະ ອົດທົນຕໍ່ຄວາມຫຍຸ້ງຍາກ, ຄວາມກົດດັນ ໄພອັນຕະລາຍ ແລະ ອຸປະສັກຕ່າງໆ ຊຶ່ງເຫດການປະຫວັດສາດຜ່ານມາ, ໄດ້ສະແດງເຖິງການເປັນຜູ້ທີ່ກ້າຜ່ານອຸປະສັກຂອງສື່ມວນຊົນເຮົາ ນັບທັງໃນອາດີດ, ປັດຈຸບັນ, ນັບທັງສ່ຽງເປັນສ່ຽງຕາຍໃນສະພາບສົງຄາມ ແລະ ຕໍ່ສູ້ຕີຖອຍແນວຄິດໃນຍຸກສັນຕິພາບເພື່ອອຸດົມການ ແລະ ຈຸດໝາຍຂອງພັກເຮົາວາງໄວ້. 5). ສື່ມວນຊົນ ເປັນຜູ້ທີ່ຮັກຄວາມຈິງເພື່ອໃຫ້ມະຫາຊົນເຂົ້າໃຈ, ເຊື່ອໝັ້ນ ແລະ ປະຕິບັດຕາມ; ການໂຄສະນາຜ່ານພາຫະນະສື່ມວນຊົນ ຕ້ອງແມ່ນຄວາມເປັນຈິງ. ຄວາມເປັນຈິງ ແມ່ນສິ່ງທີ່ສໍາຄັນຂອງຜູ້ທີ່ເຮັດວຽກສື່ມວນຊົນ; “ເວົ້າຄວາມຈິງ, ຂຽນລັກສະນະຕົວຈິງ ແລະ ນັບຖືຕົວຈິງແມ່ນບົດຮຽນທໍາອິດໃນການຂຶ້ນຫ້ອງຮຽນວິຊາຂຽນຂ່າວ”. ນີ້ແມ່ນໜຶ່ງປັດໄຈ ທີ່ສ່ອງແສງວ່າ: ສື່ມວນຊົນ ເປັນຜູ້ທີ່ຮັກຄວາມຈິງ, ໃນຖານະເປັນເຄື່ອງມືດ້ານການເມືອງ-ແນວຄິດຂອງພັກ, ສື່ມວນຊົນ ຕ້ອງຕິດແທດກັບຄວາມຈິງ. 6). ສື່ມວນຊົນ ເປັນຜູ້ທີ່ຍິງຖືກເປົ້າ ໝາຍເຖິງການນໍາສະເໜີຂ່າວ-ບົດ ເພື່ອສ່ອງແສງເຫດການ, ບັນຫາຕ່າງໆ “ຕ້ອງຍິງຖືກເປົ້າ”, ສ່ອງແສງດ້ວຍຄວາມເປັນຈິງ, ຖືກປະເດັນຕໍ່ເປົ້າໝາຍທີ່ຈະຖະແຫຼງຂ່າວ, ໂຄສະນາເຜີຍແຜ່ຢ່າງຖືກເປົ້າ ຈະຊ່ວຍໃຫ້ການກະຈາຍຂໍ້ມູນຂ່າວສານ, ໂຄສະນາຊວນເຊື່ອ, ປຸກລະດົມຂົນຂວາຍເປົ້າໝາຍ ໄດ້ເຊື່ອມຊຶມ, ຮັບຮູ້ ແລະ ເຂົ້າໃຈ ຊຶ່ງຈະສົ່ງຜົນກະທົບທາງບວກ ເພື່ອນໍາໄປສູ່ການປ່ຽນແປງ ຫຼື ການມີສ່ວນຮ່ວມແກ້ໄຂບັນຫາໃນສັງຄົມຢ່າງແທ້ຈິງ.
ທ່ານ ຄຳເຮືອງ ຄຳປະສິດ ຍັງໄດ້ກ່າວອີກວ່າ: ສຳລັບຖັນແຖວສື່ມວນຊົນ ຈະຕ້ອງໄດ້ມຸ່ງໝັ້ນ ຕັ້ງໜ້າປັບປຸງຕົນເອງ, ພິສູດຕົນເອງ ເພື່ອເຮັດໃຫ້ທັດສະນະຊີ້ນໍາໄດ້ປະກົດຜົນເປັນຈິງ ໂດຍສຸມໃສ່ດັ່ງນີ້: ເພີ່ມທະວີການນໍາພາ-ຊີ້ນໍາຂອງພັກ ໂດຍກົງຮອບດ້ານຕໍ່ວຽກງານສື່ມວນຊົນ, ຕັ້ງໜ້າປະຕິບັດລະບຽບກົດໝາຍຂອງລັດ ແລະ ຈັນຍາບັນສື່ມວນຊົນ ເພື່ອດຳເນີນພາລະກິດການເມືອງຂອງພັກ-ລັດ ແລະ ຢຶດຖືປະຊາຊົນເປັນກົກ, ເປັນໃຈກາງຈະຊ່ວຍໃຫ້ສື່ມວນຊົນສາມາດເຮັດໜ້າທີ່ “ຜູ້ປາກອອກແສງ” ໄດ້ຢ່າງແທ້ຈິງ ເພື່ອເຮັດໃຫ້ “ແສງສະຫວ່າງແຫ່ງຄວາມເປັນຈິງ, ແຫ່ງປັນຍາຄວາມຮູ້ ເຍືອງທາງກ້າວເດີນສູ່ຄວາມສີວິໄລ; ສື່ມວນຊົນ ສຸມໃສ່ສ້າງຜະລິດຕະພັນທີ່ “ຄົມແຫຼມ” “ແທງເຖິງໃຈ” ຜູ້ອ່ານ, ຜູ້ຟັງ ແລະ ຜູ້ຊົມ ກໍຄືປະຊາຊົນ, ຕ້ອງໃກ້ຊິດກັບປະຊາຊົນ, ເຂົ້າໃຈຊີວິດຕົວຈິງຂອງປະຊາຊົນ ແລະ ສ່ອງແສງຄວາມຈິງຢ່າງຖືກຕ້ອງ ເພື່ອສ້າງຄວາມໜ້າເຊື່ອຖື, ດຶງດູດຜູ້ຕິດຕາມ ແລະ ປະຕິບັດໜ້າທີ່ເປັນສາຍໄຍຜູກພັນ ລະຫວ່າງ ມະຫາຊົນ ກັບພັກ-ລັດ ໄດ້ຢ່າງມີປະສິດທິຜົນ; ສື່ມວນຊົນ ສືບຕໍ່ ຢຶດໝັ້ນໃນຫຼັກການແຫ່ງຄວາມວ່ອງໄວ ແລະ ຄວາມຖືກຕ້ອງ, ຕ້ອງກໍາແໜ້ນແນວທາງນະໂຍບາຍຂອງພັກ, ລະບຽບກົດໝາຍຂອງລັດ ແລະ ກໍາໄດ້ສະພາບການຕົວຈິງ ເພື່ອຄົ້ນຄວ້າເຫັນບັນຫາ ຈຶ່ງຈະ “ສະດຸ້ງໄວ” ແລະ ສາມາດວາງແຜນການຂຽນບົດ-ຂຽນຂ່າວ ເພື່ອຊີ້ແຈງອະທິບາຍບັນຫານັ້ນໆຢ່າງທັນການ; ສ້າງຄວາມກ້າຫານໃຫ້ສື່ມວນຊົນ “ກ້າຜ່ານຜ່າອຸປະສັກ”, ຂໍ້ຫຍຸ້ງຍາກ ແລະ ຄວາມຢ້ານກົວທີ່ອາດຈະຖືກກົດດັນ ເມື່ອສະເໜີຂໍ້ມູນຂ່າວ ສານທີ່ກະທົບຕໍ່ບຸກຄົນ, ອົງການ ແລະ ອື່ນໆ. ຄຽງຄູ່ກັນນັ້ນ, ການບໍາລຸງສ້າງບຸກຄະລາກອນ ຜູ້ເຮັດວຽກງານສື່ມວນຊົນໃຫ້ມີຫຼັກໝັ້ນ, ມີຄຸນທາດການເມືອງ, ຄຸນສົມບັດສິນທໍາປະຕິວັດ, ຈໍາແນກໄດ້ມິດ ແລະ ສັດຕູ ຈະຊ່ວຍໃຫ້ສື່ມວນຊົນມີຄວາມກ້າຫານທາງວິຊາຊີບ, ມີຈັນຍາບັນ, ມີຄວາມຮັບຜິດຊອບ ແລະ ມີຈິດໃຈເສຍສະຫຼະ, ມີຄວາມອົດທົນບາກບັ່ນບຸກບືນ; ສ້າງຄວາມເຂັ້ມແຂງ ແລະ ສ້າງຄວາມເຂົ້າໃຈໃຫ້ສື່ມວນຊົນທຸກພາກສ່ວນຢ່າງຈະແຈ້ງວ່າ: ການສ່ອງແສງຄວາມເປັນຈິງ ທີ່ບໍ່ແມ່ນການເປີດເຜີຍຄວາມລັບຂອງຊາດ, ເຜີຍແຜ່ຄວາມຈິງ, ມີຫຼັກຖານ ແລະ ມີຈຸດປະສົງສ້າງສັນ ເປັນການຊ່ວຍໃຫ້ພັກ-ລັດເຫັນບັນຫາ ເພື່ອແກ້ໄຂໄດ້ທັນເວລາ; ສື່ມວນຊົນ ຕ້ອງເອົາໃຈໃສ່ສຶກສາຈິດຕະສາດ, ພຶດຕິກໍາ ແລະ ຄວາມຕ້ອງການຂອງແຕ່ລະກຸ່ມເປົ້າໝາຍ ເພື່ອວາງແຜນຂຽນບົດ-ຂຽນຂ່າວໃຫ້ມີເນື້ອໃນຄົບຖ້ວນ, ນຳໃຊ້ສັບພາສາ ຫຼື ສຳນວນທີ່ສອດຄ່ອງ ແລະ ເຜີຍແຜ່ທີ່ເໝາະສົມ ຈຶ່ງສາມາດ “ຍິງຖືກເປົ້າ” ເຮັດໃຫ້ການໂຄສະນາເຜີຍແຜ່ຂໍ້ມູນຂ່າວສານໄດ້ຢ່າງຖືກຕ້ອງ, ສ້າງຄວາມເຂົ້າໃຈ, ມີການຍອມຮັບ ແລະ ການປ່ຽນແປງພຶດຕິກໍາຂອງສັງຄົມໄດ້ຢ່າງມີປະສິດທິຜົນ.
ຂ່າວ: ບຸນຕອມ, ພາບ: ສຳນານ
ຄໍາເຫັນ