ເນື່ອງໃນໂອກາດ ວັນສື່ມວນຊົນ ແລະ ພິມຈໍາໜ່າຍຄົບຮອບ 74 ປີ (13 ສິງຫາ 1950-13 ສິງຫາ 2024) ໄດ້ໝູນວຽນມາບັນຈົບຄົບຮອບອີກວາລະໜຶ່ງ, ທ່ານ ບົວພັນ ພົມມະຈັນ ປະຊາຊົນ ບ້ານສົມໂຮງ ເມືອງຫາດຊາຍຟອງ ນະຄອນຫຼວງວຽງຈັນ ໄດ້ໃຫ້ສຳພາດຕໍ່ກັບນັກຂ່າວໜັງສືພິມປະຊາຊົນ ຫວ່າງບໍ່ດົນມານີ້ວ່າ: ຂ້າພະເຈົ້າຮູ້ສຶກດີອົກດີໃຈ ແລະ ພາກພູມໃຈ ເປັນຢ່າງສູງ ຕໍ່ກັບວັນສື່ມວນຊົນ ແລະ ການພິມຈຳໜ່າຍ ຄົບຮອບ 74 ປີ ທີ່ໃກ້ຈະມາເຖິງນີ້ ຊຶ່ງທຸກໆປີກໍໄດ້ມີການຈັດຕັ້ງການສະເຫຼີມສະຫຼອງວັນສຳຄັນດັ່ງກ່າວ, ມີການໂຮມຊຸມນຸມມິດຕິງ, ການແຂ່ງຂັນກິລາ, ສະແດງສິລະປະ ແລະ ອື່ນໆຢ່າງເປັນຂະບວນຟົດຟື້ນ ເພື່ອເປັນການຊົມເຊີຍຕໍ່ວັນສຳຄັນດັ່ງກ່າວ, ຕະຫຼອດໃນໄລຍະທີ່ຜ່ານມາກໍຄືໃນປັດຈຸບັນ, ສື່ມວນຊົນລາວແມ່ນມີຄວາມບຸກໜ້າບືນຕົວ, ມີຄວາມດຸໝັ່ນຫ້າວຫັນ ແລະ ເສຍສະຫຼະຢ່າງບໍ່ຮູ້ອິດຮູ້ເມື່ອຍ, ປະກອບສ່ວນຢ່າງຕັ້ງໜ້າໃນຂະບວນການຕໍ່ສູ້ກູ້ຊາດຕ້ານຈັກກະພັກຜູ້ຮຸກຮານ, ກໍຄືໃນໄລຍະແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ, ສື່ມວນຊົນລາວຮັກສາໄດ້ມູນເຊື້ອຄວາມຈົ່ງຮັກພັກດີຕໍ່ພັກ-ລັດຢ່າງແທ້ຈິງ, ສື່ມວນຊົນລາວໄດ້ເຮັດໜ້າທີ່ໂຄສະນາແນວທາງນະໂຍບາຍຂອງພັກ, ມະຕິ, ຄໍາສັ່ງ, ກົດໝາຍຂອງລັດ, ທັງເຮັດໜ້າທີ່ຕອບໂຕ້ຖ້ອຍທຳນອງພວກຄົນບໍ່ຫວັງດີທີ່ໃສ່ຮ້າຍປ້າຍສີຕໍ່ລະບອບໃໝ່ຂອງພວກເຮົາໄດ້ຢ່າງທັນການ, ເປັນຂົວຕໍ່ລະຫວ່າງພັກກັບປະຊາຊົນ ແລະ ເປັນເວທີເສີມຂະຫຍາຍປະຊາທິປະໄຕ ປະຊາຊົນ ແລະ ສິດເປັນເຈົ້າຂອງປະຊາຊົນບັນດາເຜົ່າ.
ເນື່ອງໃນໂອກາດວັນສື່ມວນຊົນ ແລະ ພິມຈຳໜ່າຍ ຄົບຮອບ 74 ປີ ນີ້ ຂ້າພະເຈົ້າຂໍອວຍພອນ ໃຫ້ທ່ານ ຜູ້ນຳພັກ-ລັດ, ຫົວໜ້າບັນນາທິການ, ຂົງເຂດສື່ມວນຊົນ ເວົ້າລວມ ເວົ້າສະເພາະ ກໍຄືພະນັກງານ-ລັດຖະກອນ ທີ່ເປັນນັກຂ່າວສື່ມວນຊົນ ຈົ່ງມີສຸຂະພາບເຂັ້ມແຂງ, ມີພະລານາໄມທີ່ສົມບູນ ແລະ ປະສົບຜົນສຳເລັດໃນໜ້າທີ່ວຽກງານທີ່ໄດ້ຮັບມອບໝາຍ.
ຊົມເຊີຍວັນສື່ມວນຊົນ ແລະ ພິມຈຳໜ່າຍ !
ຄໍາເຫັນ