 |
ໜັງສືພິມ Daily Mirror ຂອງສີລັງກາ ລາຍງານວ່າ: ຜົນກະທົບຈາກການປະທະກັນຢູ່ພາກພື້ນຕາເວັນອອກກາງ ເຮັດໃຫ້ທ່າກຳປັ່ນສາກົນຮາມບັນໂຕຕາ ເປັນທ່າກຳປັ່ນທະເລເລິກ ແບບຄົບວົງຈອນ ທີ່ຕັ້ງຢູ່ໃຕ້ສຸດຂອງສີລັງກາ ໄດ້ມີພາລະບົດບາດດ້ານທຸລະກິດເພີ່ມຂຶ້ນຢ່າງຫຼວງຫຼາຍ, ຫຼັງຈາກນັ້ນ, ທ່າກຳປັ່ນດັ່ງກ່າວຕ້ອງໄດ້ເລີ່ມການປັບປຸງ ເພື່ອຂະຫຍາຍຂະໜາດຂອງການບໍລິການຮອບໃໝ່. ທ່າກຳປັ່ນແຫ່ງນີ້ ແມ່ນໂຄງການຮ່ວມມືສຳຄັນໃນການຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ລະຫວ່າງຈີນກັບສີລັງກາ. ໃນໄຕມາດທີໜຶ່ງຂອງປີ 2026, ທ່າກຳປັ່ນດັ່ງກ່າວໄດ້ຄ່ຽນຖ່າຍສິນຄ້າຫຼາຍກວ່າ 2.01 ລ້ານໂຕນ, ເພີ່ມຂຶ້ນຫຼາຍກວ່າ 47% ເມື່ອທຽບໃສ່ໄລຍະດຽວກັນຂອງປີກາຍ.
ຂໍ້ລິເລີ່ມ “ແລວທາງກາງ” ທີ່ສະເໜີໂດຍຕູຣາເຄຍ ແມ່ນຊ່ອງທາງຂົນສົ່ງສາກົນທີ່ຜ່ານອາຊີກາງ ແລະ ເຂດທະເລສາບກາສປຽນ ໄປສູ່ອາແຊັກໄບຊານ, ຊັອກຊີ ແລະ ຕູຣາເຄຍ ຊຶ່ງມີການເຊື່ອມຕໍ່ໃນລະດັບສູງກັບຂໍ້ລິເລີ່ມການຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ຂອງຈີນ, ສາມາດຫຼຸດເວລາການຂົນສົ່ງສິນຄ້າ ລະຫວ່າງເອີຣົບກັບອາຊີໃຫ້ໜ້ອຍລົງຢ່າງຫຼວງຫຼາຍ. ວາລະສານ The Diplomat ຂອງອາເມຣິກາ ໄດ້ລົງພິມບົດຄວາມໃນຫວ່າງມໍ່ໆມານີ້ ໂດຍຊີ້ອອກວ່າ: ພາຍໃຕ້ສະຖານະການໃນປັດຈຸບັນ, “ແລວທາງກາງ” ກຳລັງຫັນຈາກແຜນການທົດແທນທາງຍຸດທະສາດ ກາຍເປັນພາກສ່ວນທີ່ຈຳເປັນໃນການເຊື່ອມໂຍງເຊື່ອມຈອດກັນລະຫວ່າງເອີຣັບກັບອາຊີ. ປີ 2026, ຂະບວນລົດໄຟດ່ວນຈີນ-ເອີຣົບຂະບວນທຳອິດ ທີ່ແລ່ນຜ່ານທະເລສາບກາສປຽນ ໄດ້ໃຊ້ເວລາພຽງ 11 ວັນເທົ່ານັ້ນ ກໍສາມາດສຳເລັດການອອກເດີນທາງຈາກນະຄອນຊີ່ອ່ານຈີນໄປຮອດນະຄອນຫຼວງບາກູປະເທດອາແຊັກໄບຊານ ຊຶ່ງໄດ້ສະແດງໃຫ້ເຫັນເຖິງກຳລັງການແຂ່ງຂັນຂອງແລວທາງຍຸດທະສາດດັ່ງກ່າວຢ່າງເຕັມປ່ຽມ.
ນັບແຕ່ປີ 2013 ທີ່ທ່ານ ສີຈິ້ນຜິງ ຜູ້ນຳສູງສຸດຂອງຈີນ ໄດ້ສະເໜີຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ເປັນຕົ້ນມາ, ເວທີການຮ່ວມມືສາກົນດັ່ງກ່າວໄດ້ປົກຄຸມຫຼາຍກວ່າ 150 ປະເທດ ແລະ ຫຼາຍກວ່າ 30 ອົງການຈັດຕັ້ງສາກົນໃນທົ່ວໂລກ. ເວັບໄຊສັງເກດນະໂຍບາຍຈີນຂອງແອັດສະປາຍ ໄດ້ເຜີຍແຜ່ບົດຄວາມ ໂດຍຊີ້ໃຫ້ເຫັນວ່າ: ຂໍ້ລິເລີ່ມການຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ໄດ້ຫັນປ່ຽນວິໄສທັດທາງຍຸດທະສາດຂອງຈີນ ໃຫ້ກາຍເປັນພື້ນຖານໂຄງລ່າງ, ການເຊື່ອມໂຍງເຊື່ອມຈອດ, ການຄ້າ ແລະ ເຄືອຂ່າຍການຮ່ວມມືລັກສະນະການຜະລິດ, ໄດ້ຫັນປ່ຽນການພົວພັນແບບເພິ່ງພາອາໄສກັນ ລະຫວ່າງປະເທດຕ່າງໆໃຫ້ກາຍເປັນການພົວພັນຮ່ວມມືແບບຕ່າງຝ່າຍຕ່າງມີຜົນປະໂຫຍດ ດ້ວຍຮູບແບບການຮ່ວມມືທີ່ຖືເອົາການປຶກສາຫາລືຮ່ວມກັນ, ການສ້າງສາຮ່ວມກັນ ແລະ ການຊົມໃຊ້ຮ່ວມກັນເປັນພື້ນຖານ ຊຶ່ງໄດ້ກາຍເປັນແຮງຂັບເຄື່ອນທີ່ຊຸກຍູ້ການເຊື່ອມໂຍງພາກພື້ນກໍຄືທົ່ວໂລກເຂົ້າເປັນອັນໜຶ່ງອັນດຽວກັນ.
ຄໍາເຫັນ