ສື່ມວນຊົນພາກກາງຝຶກອົບຮົມ ການລາຍງານຂ່າວບັນຫາຫາສີຂຽວ

ຈຸດປະສົງຂອງການຝຶກອົບຮົມໃນຄັ້ງນີ້ ແມ່ນເປັນການສືບຕໍ່ຍົກລະດັບຄວາມຮູ້, ຄວາມສາມາດ ແລະ ທັກສະໃຫ້ນັກຂ່າວໃນການນໍາໃຊ້ອຸປະກອນ ແລະ ເຄື່ອງມືທີ່ທັນສະ ໄໝໃນຍຸກດີຈີຕອນ ເພື່ອໃຫ້ເຂົາເຈົ້າໄດ້ຜະລິດຂ່າວ-ຜະລິດບົດດ້ວຍຫຼາກຫຼາຍວິທີ, ຫຼາຍຮູບແບບສີສັນ ແລະ ກະຈາຍຜ່ານຫຼາຍລະບົບສື່ສານໄປເຖິງກຸ່ມເປົ້າໝາຍໃນສັງຄົມທັງພາຍໃນ ແລະ ຕ່າງປະເທດ ໂດຍສະເພາະການພັດທະນາສີຂຽວຢືນຍົງ. ບັນດາຫົວຂໍ້ນໍາມາຝຶກອົບຮົມໃນຄັ້ງນີ້ລວມມີ: ບົດບາດ ແລະ ຄວາມສະເໝີພາບຍິງ-ຊາຍ, ການພັດທະນາສີຂຽວຍືນຍົງ ແລະ ບັນຫາສິ່ງແວດລ້ອມ, ຄວາມປອດໄພໃນການໃຊ້ສື່ສັງຄົມອອນລາຍ, ການຄຸ້ມຄອງສື່, ຈັນຍາບັນນັກຂ່າວ, ການນໍາໃຊ້ປັນຍາປະດິດເຂົ້າໃນວຽກງານສື່, ຜະລິດບົດເລື່ອງສັ້ນໃນຮູບແບບຕ່າງໆສໍາລັບສື່ອອນລາຍ. ພ້ອມນັ້ນ ຍັງຈະໄດ້ໄປທັດສະນະສຶກສາ ໃນຫົວຂໍ້: ທ່ອງທ່ຽວສີຂຽວຍືນຍົງ (Green and Sustainable Eco-tourism) ຢູ່ເມືອງວັງວຽງ ແຂວງວຽງຈັນ ເພື່ອໄປເກັບກຳຂໍ້ມູນມາຜະລິດເປັນຄຣິບວິດີໂອເລື່ອງສັ້ນ (Storytelling) ອອກໃສ່ສື່ ອາດຈະເປັນໜ້າເຟສບຸກ ຫຼື ຢູທູບ ຫຼື ເວັບໄຊ ທີ່ສໍາມະນາກອນສັງກັດ ແລະ ສົ່ງໄປແຂ່ງຂັນ ໂດຍຈະມີລາງວັນທີ 1 ທີ 2 ແລະ ທີ 3 ແລະ ລາງວັນຊົມເຊີຍ. ບົດໃດທີ່ຖືກຄັດເລືອກໄດ້ລາງວັນທີ 1 ຫາ ທີ 3 ເຈົ້າຂອງບົດຈະໄດ້ສືບຕໍ່ໄປທັດສະນະສຶກສາຢູ່ ສສ ຫວຽດນາມ ໃນທ້າຍປີນີ້ ຫຼື ຕົ້ນປີໜ້າ, ປີຜ່ານມາເຈົ້າຂອງບົດທີ່ໄດ້ຮັບລາງວັນແມ່ນໄດ້ໄປທັດສະນະສຶກສາຢູ່ປະເທດໄທ.

ສຳລັບຊຸດຝຶກອົບຮົມຄັ້ງນີ້ແມ່ນໄດ້ຮັບການສະໜັບສະໜູນຈາກສະຫະພາບເອີຣົບ ແລະ ຈະໄດ້ດຳເນີນໄປຮອດວັນທີ 29 ມິຖຸນານີ້ຈຶ່ງຈະສຳເລັດ.

(ຂ່າວ-ພາບ: ບຸນຕອມ)