ເນື່ອງໃນໂອກາດວັນສື່ມວນຊົນ ແລະ ການພິມຈໍາໜ່າຍແລະ ວັນສ້າງຕັ້ງໜັງສືພິມປະຊາຊົນ ຄົບຮອບ 74 ປີ (13 ສິງຫາ 1950-13 ສິງຫາ 2024) ທີ່ໃກ້ຈະມາເຖິງນີ້, ທ່ານວັນໄຊ ຕະວິນຍານ ຮອງຫົວໜ້າຄະນະໂຄສະນະອົບຮົມສູນກາງພັກ ຫົວໜ້າບັນນາທິການໃຫຍ່ໜັງສືພິມປະຊາຊົນ ໄດ້ໃຫ້ສຳພາດຕໍ່ຜູ້ຂຽນເມື່ອບໍ່ດົນຜ່ານມານີ້ທີ່ສຳນັກງານໜັງສືພິມປະຊາຊົນວ່າ: ປັດຈຸບັນໂລກມີການພັດທະນາຂະຫຍາຍຕົວຢ່າງຕໍ່ເນື່ອງ, ສື່ສັງຄົມອອນລາຍກໍນັບມື້ນັບມີບົດບາດຢູ່ໃນສັງຄົມ ສື່ມວນຊົນຕ້ອງຕັ້ງໜ້າພັດທະນາຕົນເອງຢ່າງບໍ່ຢຸດຢັ້ງນັບແຕ່ການຂີດຂຽນ, ການເຈາະບັນຫາປະເດັນສຳຄັນຕ່າງໆ ເພື່ອເຮັດແນວໃດໃຫ້ໄດ້ຂໍ້ມູນຂ່າວສານທີ່ຖືກຕ້ອງຕາມຄວາມຈິງ, ໃຫ້ມີຄວາມຫຼາກຫຼາຍ, ສັ້ນກະທັດຮັດ ແລະ ອື່ນໆ;ສື່ມວນຊົນຕ້ອງໄດ້ຕິດຕາມສັງຄົມວ່າມີທ່າອ່ຽງການປ່ຽນແປງຄືແນວໃດໂດຍອີງໃສ່ແນວທາງນະໂຍບາຍຂອງພັກມາເປັນທິດເຍືອງທາງໃນການຂີດຂຽນ, ວິໄຈ, ວິເຄາະໃຫ້ມັນເປັນອັນລະອຽດໂດຍສະເພາະໜັງສືພິມປະຊາຊົນປັດຈຸບັນມີການປັບປຸງຢ່າງຕັ້ງໜ້າ ເປັນຕົ້ນໄດ້ປັບປຸງການຂຽນບົດນໍາ, ບົດຄວາມໃຫ້ມີຫຼາກຫຼາຍບົດ, ຫຼາຍຫົວຂໍ້ຂຶ້ນກວ່າເກົ່າ ໂດຍໄດ້ຈັດລຽງໜ້າໜັງສືພິມຂອງຕົນຢ່າງລະອຽດ. ນອກນັ້ນ, ສື່ມວນຊົນຕ້ອງເຂົ້າໃຈວ່າການນຳສະ ເໜີຂໍ້ມູນທີ່ໄວ, ທັນໃຈເປັນສິ່ງທີ່ມີຄວາມຕ້ອງການສູງໃນສັງຄົມ. ສະນັ້ນ,ເວລາວາງແຜນໃນການໂຄສະນາແຕ່ລະອາທິດ, ແຕ່ລະເດືອນ ກໍຕ້ອງໄດ້ມີການກຳນົດລະອຽດຄັກແນ່. ເຊື່ອແນ່ວ່າສື່ສັງຄົມອອນລາຍຍັງຈະມີບົດບາດສູງຢູ່ໃນສັງຄົມ ພ້ອມສັງເກດໄດ້ຍາກວ່າຂ່າວໃດທີ່ມີຄວາມຈິງ ແລະ ບໍ່ມີຄວາມຈິງ. ດັ່ງນັ້ນ, ສື່ມວນຊົນຈະຕ້ອງມີການພັດທະນາ ແລະ ຕັດສິນໃຈໃຫ້ຖືກຕ້ອງ, ຊອກເອົາຂໍ້ມູນທີ່ມີຄວາມຈິງທີ່ສຸດ ເພື່ອນໍາມາເຜີຍແຜ່ໃຫ້ກັບສັງຄົມກໍຄືຜູ້ອ່ານໄດ້ຮັບຊາບ. ປັດຈຸບັນໃຜໆກໍສາມາດນໍາເອົາຂໍ້ມູນມາລົງສື່ຂອງຕົນໄດ້ແຕ່ບໍ່ຮູ້ວ່າອັນໃດເປັນຄວາມຈິງ ແລະ ບໍ່ເປັນຄວາມຈິງ. ໃນນັ້ນ, ຢາກໃຫ້ສື່ມວນຊົນໄດ້ພັດທະນາຕົນເອງຍົກລະດັບຂຶ້ນເປັນກ້າວໆເປັນຕົ້ນດ້ານຄວາມຮູ້, ຄວາມສາມາດ, ດ້ານວິຊາສະເພາະ, ດ້ານພາສາຕ່າງໆປະເທດ ແລະ ອື່ນໆ.
ໃນໂອກາດວັນສື່ມວນຊົນ ແລະ ການພິມຈໍາໜ່າຍ ແລະ ວັນສ້າງຕັ້ງໜັງສືພິມປະຊາຊົນ ຄົບຮອບ 74 ປີ, ທ່ານວັນໄຊ ຕະວິນຍານຍັງໄດ້ສະແດງຄວາມຮູ້ບຸນຄຸນຕໍ່ການນໍາພັກ-ລັດ ທີ່ໄດ້ໃຫ້ການອູ້ມຊູ້ຊ່ວຍເຫຼືອຕະຫຼອດໄລຍະຜ່ານມາ ແລະ ອວຍພອນໄຊອັນປະເສີດໃຫ້ສື່ມວນຊົນລາວທຸກທົ່ວໜ້າຈົ່ງມີສຸຂະພາບພະລານາໄມທີ່ແຂງແຮງ, ມີຄວາມສຸກໃນຊີວິດສ່ວນຕົວ, ຄອບຄົວ ແລະ ປະສົບຜົນສຳເລັດໃນໜ້າທີ່ວຽກງານຂອງຕົນທຸກປະການ.
ຄໍາເຫັນ