ບຸນເຊັງເມັງ ເປັນໜຶ່ງໃນ 24 ຈຸດແບ່ງລະດູການຕາມຈັນທະຄະຕິຈີນ ຊຶ່ງຖືກເອີ້ນວ່າ:ເປັນບຸນສຳຜັດກັບທຳມະຊາດສີຂຽວ ແລະ ເປັນມື້ບຸນໄຫວ້ບູຊາບັນພະບູລຸດທີ່ໄດ້ລ່ວງລັບໄປແລ້ວຂອງຈີນ, ຕາມທຳມະດາຈະຢູ່ລະຫວ່າງວັນທີ 4 - 6 ເມສາຂອງທຸກໆປີ. ໃນໄລຍະນີ້, ລະດູບານໃໝ່ໄດ້ໝູນວຽນມາເຖິງ, ຕົ້ນໄມ້ໃບຫຍ້າໄດ້ແຕກໜໍ່ຈໍ່ແໜງ ແລະ ເຕັມໄປດ້ວຍຄວາມມີຊີວິດຊີວາ, ເປັນມື້ບຸນທີ່ຄົນທັງຫຼາຍໄປສຳຜັດກັບທຳມະຊາດສີຂຽວ.
ບຸນເຊັງເມັງ ຈະມີຮີດຄອງປະເພນີຫຼາຍຢ່າງ, ຮີດຄອງປະເພນີໃນການສະຫຼອງບຸນຂອງທ້ອງຖິ່ນຕ່າງໆ ກໍມີຄວາມແຕກຕ່າງກັນ, ແຕ່ການໄປໄຫວ້ບູຊາບັນພະບູລຸດ ແລະ ສຳຜັດກັບທຳມະຊາດ ເປັນເນື້ອໃນຕົ້ນຕໍຂອງບຸນເຊັງເມັງ ເພື່ອສະແດງໃຫ້ເຫັນເຖິງຄວາມຄິດຮອດຄິດເຖິງບັນພະບູລຸດທີ່ໄດ້ລ່ວງລັບໄປແລ້ວ. ນອກນີ້, ບາງທ້ອງຖິ່ນຂອງຈີນ ຍັງມີປະເພນີກິນ ເຂົ້າໜົມຊິງຖວນ (ເຂົ້າໜົມສີຂຽວ ທີ່ເຮັດດ້ວຍແປ້ງເຂົ້າໜຽວປະສົມກັບນ້ຳກົກໜາດ, ຫໍ່ໃສ້ ແລະ ໜຶ້ງປັນ ໄປສຳຜັດກັບທຳມະຊາດສີຂຽວ, ຊົມດອກໄມ້ ແລະ ປ່ອຍວ່າວເປັນ ຕົ້ນ, ໃນໄລຍະບຸນເຊັງເມັງ, ຄົນທັງຫຼາຍໄປທ່ຽວຫຼິ້ນຢູ່ຕາມພູ ແລະ ທົ່ງນາສີຂຽວ, ໄດ້ສຳຜັດກັບທຳມະຊາດທີ່ຂຽວງາມ. ຢູ່ເມືອງເກົ່າສີໂຈ່ວ (Xizhou) ນະຄອນຕ້າຫຼີ ແຂວງຢຸນນານ, ທົ່ງນາຂຽວອຸ່ມທຸ່ມ, ມີລົມພັດມາແບບຄ່ອຍໆ, ທົ່ງນາເຂົ້າປຽບເໝືອນຟອງສີຂຽວ. ກຳແພງສີຂາວ ແລະ ຫຼັງຄາສີຂີ້ເທົ່າປະສົມກັບ ຕົ້ນເຂົ້າສີຂຽວ, ໄດ້ດຶງດູດນັກທ່ອງທ່ຽວຈາກແຫ່ງຕ່າງໆໃນທົ່ວປະເທດຈີນ ທີ່ມາສຳຜັດກັບບັນຍາກາດຂອງສາຍລົມໃນລະດູບານໃໝ່. “ຊາດນີ້ເອົາດອກໄມ້ເນັບໃສ່ຫົວ, ຊາດໜ້າຈະສວຍງາມກວ່າເກົ່າ”, ສີມືເອົາດອກໄມ້ເນັບໃສ່ຫົວ ທີ່ເປັນມູນເຊື້ອວັດທະນະທຳນາມມະທຳທີ່ມີປະຫວັດສາດ ຍາວນານ ມາເປັນເວລາ 3.000 ກວ່າປີ ໄດ້ພາກັນຫັນມານິຍົມຂຶ້ນອີກຢູ່ເມືອງເກົ່າຊິງໂຈ່ວ ນະຄອນເວີຍຟາງ ແຂວງຊານຕຸ່ງຈີນ, ທັງເປັນຮີດຄອງປະເພນີເກົ່າແກ່ ແລະ ກໍມີສີສັນຍຸກໃໝ່. ລະດູບານໃໝ່ ທີ່ ໝູນວຽນມາເຖິງ, ຊາວໜຸ່ມທັງຫຼາຍໄດ້ມາທ່ຽວໃນເມືອງເກົ່າຊິງໂຈ່ວ, ໄດ້ພາກັນເອົາດອກໄມ້ເນັບໃສ່ຫົວ ແລະ ຖ່າຍຮູບ ເພື່ອເປັນທີ່ລະນຶກ, ຖືວ່າເປັນ “ເຈົ້າຍິງດອກໄມ້”.
ກຸ່ມບໍລິສັດ Trip.com ຈຳກັດ ທີ່ເປັນເວັບໄຊຂາຍປີ້ທາງອອນລາຍຂອງຈີນ ໄດ້ເຜີຍແຜ່ “ບົດລາຍງານຄາດຄະເນການທ່ອງທ່ຽວໃນໄລຍະບຸນເຊັງເມັງ ປີ 2024” ໂດຍສະແດງໃຫ້ເຫັນວ່າ: ໃນໄລຍະພັກບຸນເຊັງເມັງປີນີ້, ແຂວງຊານຕົງຈີນ ໄດ້ເປັນອັນດັບ 4 ໃນການລຽງລຳດັບເຂດແຂວງ ຕ້ອນຮັບນັກທ່ອງທ່ຽວໃນທົ່ວປະເທດຈີນ, ຄາດວ່າ: ປະລິມານການຈອງປີ້ລ່ວງໜ້າຈະເພີ່ມຂຶ້ນ 866% ເມື່ອທຽບໃສ່ບຸນເຊັງເມັງປີຜ່ານມາ. ຍ້ອນວ່າການທ່ອງທ່ຽວແບບຂັບລົດເອງໄດ້ເພີ່ມຂຶ້ນ ແລະ ນັກທ່ອງທ່ຽວຕ່າງປະເທດ ໄດ້ເຂົ້າມາທ່ຽວແຂວງຢຸນນານເພີ່ມຂຶ້ນ, ຈຳນວນນັກທ່ອງທ່ຽວ ທີ່ກຽມຈະໄປທ່ຽວແຂວງຢຸນນານ ໃນໄລຍະພັກບຸນເຊັງເມັງ ໄດ້ເພີ່ມຂຶ້ນ 96% ເມື່ອທຽບໃສ່ບຸນເຊັງເມັງປີຜ່ານມາ. ນອກນີ້, ການໄປຮຽນວິທີຜະລິດແກ້ວ ແລະ ເຮັດເຄື່ອງປັ້ນດິນເຜົາ ຢູ່ ນະຄອນຈິງເຕີເຈິ້ນແຂວງຈ່ຽງຊີ ກໍໄດ້ຮັບຄວາມນິຍົມຊົມຊອບຈາກຊາວໜຸ່ມທັງຫຼາຍ. ໃນໄລຍະພັກບຸນເຊັງເມັງປີນີ້, ດັດສະນີໄດ້ຮັບຄວາມນິຍົມຊົມຊອບຈາກນັກທ່ອງທ່ຽວຂອງນະຄອນຈິງເຕີເຈິ້ນ ເພີ່ມຂຶ້ນ 331% ເມື່ອທຽບໃສ່ ບຸນເຊັງເມັງປີຜ່ານມາ.
ອາຫານພື້ນເມືອງໄດ້ຮັບຄວາມນິຍົມຊົມຊອບຫຼາຍ ບຸນເຊັງເມັງ ໃກ້ຈະໝູນວຽນມາເຖິງ, ການບໍລິໂພກເຂົ້າໜົມຊິງຖວນ ໄດ້ຮັບຄວາມນິຍົມຊົມຊອບຈາກລູກຫຼານຫຼາຍ. ໂຕເລກຂໍ້ມູນສະແດງໃຫ້ເຫັນວ່າ: ດັດສະນີເຂົ້າໜົມຊິງຖວນ ໄດ້ບັນລຸເຖິງ 38 ລ້ານ ແລະ ໄດ້ເພີ່ມຂຶ້ນ 424% ໃນໜຶ່ງອາທິດຜ່ານມາ. ຢູ່ນະຄອນເສິງຕູ່ແຂວງເສສວນຈີນ, ນອກຈາກ ເຂົ້າ
ໜົມຊິງຖວນ ທີ່ມີຫຼາຍລົດຊາດແຊບແລ້ວ, ຍັງມີຊຸກິຢາກິເຂົ້າໜົມຊິງຖວນ, ເຄັກຊິງຖວນ ແລະ ນົມຊາຊິງຖວນ. ຍອດປະລິມານຈຳໜ່າຍເຄັກຊິງຖວນ ຂອງຮ້ານກາເຟແຫ່ງໜຶ່ງ ໃນນະຄອນເສິງຕູ່ ໄດ້ບັນລຸເຖິງ 500 ຫາ 600 ກ້ອນ, ໄດ້ຂາຍໄປ ທົ່ວປະເທດຈີນ. ນອກນີ້, ຍັງມີຮ້ານຄ້າຫຼາຍແຫ່ງໄດ້ຈັດກິດຈະກຳຊວນລູກຄ້າເຮັດ ເຂົ້າໜົມຊິງຖວນ, ກໍໄດ້ຮັບຄວາມນິຍົມຊົມຊອບຈາກລູກຄ້າຫຼາຍ.
ການໄຫວ້ບູຊາທາງ ອອນລາຍໄດ້ກາຍເປັນຄວາມນິຍົມໃໝ່. ຫວ່າງມໍ່ໆມານີ້, ນະຄອນຫຼວງປັກກິ່ງ ໄດ້ຈັດກິດຈະກຳໄຫວ້ບູຊາບັນພະບູລຸດທາງອອນລາຍໃນໄລຍະບຸນເຊັງເມັງ ໂດຍສົ່ງເສີມໃຫ້ຄົນທັງຫຼາຍໄຫວ້ບູຊາບັນພະບູລຸດແບບມາລະຍາດທາງອອນລາຍ ຄື: ເຫຍັ້ນເຫຼົ້າຈອກໜຶ່ງ, ມອບດອກໄມ້ພວງໜຶ່ງ, ຫຼິ້ນດົນຕີຕອນໜຶ່ງ ຫຼື ຂຽນຈົດໝາຍກ້ານໜຶ່ງ ໂດຍຜ່ານທາງອອນລາຍ ເພື່ອບັນພະບູລຸດທີ່ໄດ້ລ່ວງລັບໄປແລ້ວ. ໃນຊຸມປີຜ່ານມາ, ພາຍໃຕ້ການກະຕຸກຊຸກຍູ້ຂອງເຕັກນິກອິນເຕີເນັດ, ຄົນທັງຫຼາຍໄດ້ໄຫວ້ບູຊາບັນພະບູລຸດໂດຍຜ່ານທາງອອນລາຍນັບມື້ນັບຫຼາຍຂຶ້ນ. ນອກນີ້, ການເຮັດປຶ້ມທີ່ລະນຶກ ແລະ ການປູກຕົ້ນໄມ້ ກໍເປັນວິທີລະນຶກໜຶ່ງ ທີ່ໄດ້ຮັບຄວາມນິຍົມຊົມຊອບຈາກຊາວຈີນ ນັບມື້ນັບຫຼາຍຂຶ້ນ. ຂ່າວ: ໜັງສືພິມລາຍວັນຢຸນນານ, ຂ່າວຊັນຕ້ຽນ, ຂ່າວຫົງຊິນ, ຂ່າວທຽນຢັນ ບັນນາທິການ: Yang Chunmei
ຄໍາເຫັນ