ສືບຕໍ່ເພີ່ມທະວີວຽກງານປ້ອງກັນ-ການຄວບຄຸມ ແລະ ການຟື້ນຟູຫຼັງໄພພິບັດໃຫ້ມີຄວາມເຂັ້ມແຂງ

ທ່ານ ກິນດາວົງ ຫຼວງຣາຊ ຮອງຫົວໜ້າກົມສັງຄົມສົງເຄາະ ກະຊວງ ຮສສ ໄດ້ຂຶ້ນລາຍງານການຈັດຕັ້ງປະຕິບັດວຽກງານຄຸ້ມຄອງໄພພິບັດ ປີ 2025, ທິດທາງແຜນການປີ 2026 ແລະ ແຜນກຽມພ້ອມຕອບໂຕ້ໄພພິບັດ ປີ 2026 ຕໍ່ກອງປະຊຸມຄະນະກຳມະການຄຸ້ມຄອງໄພພິບັດ ທົ່ວປະເທດ ປະຈໍາປີ 2025 ທີ່ຈັດຂຶ້ນໃນວັນທີ 16 ມີນາຜ່ານມານີ້, ທີ່ນະຄອນຫຼວງວຽງຈັນວ່າ: ການຈັດຕັ້ງປະຕິບັດວຽກງານຄຸ້ມຄອງໄພພິບັດປີ 2026 ຈະສືບຕໍ່ເພີ່ມທະວີວຽກງານປ້ອງກັນ, ການຄວບຄຸມ ແລະ ການຟື້ນຟູຫຼັງໄພພິບັດຕ່າງໆ ໃຫ້ມີຄວາມເຂັ້ມແຂງ ແລະ ສາມາດປະຕິບັດວຽກງານໄດ້ຢ່າງມີປະສິດທິຜົນ ໂດຍມີມາດຕະການປ້ອງກັນ ແລະ ຫຼຸດຜ່ອນຄວາມສ່ຽງໄພພິບັດ: ການເຝົ້າລະວັງຕິດຕາມ ແລະ ການແຈ້ງຂ່າວເຕືອນໄພລ່ວງໜ້າການກວດກາຄືນຄວາມພ້ອມທາງດ້ານເຄື່ອງມືວັດຖຸອຸປະກອນ, ພາຫະນະ, ຢາປົວພະຍາດ ແລະ ການເກັບແຮເຄື່ອງຊ່ວຍເຫຼືອບັນເທົາທຸກສຸກເສີນ ເພື່ອຮັບໃຊ້ເຂົ້າໃນການຕອບໂຕ້ເຫດການໄພພິບັດ; ຄວາມພ້ອມຂອງທີມງານໃຫ້ການຊ່ວຍເຫຼືອສຸກເສີນ ເປັນຕົ້ນທີມງານປະເມີນຜົນສຸກເສີນ, ທີມງານຊອກຄົ້ນ-ຄົ້ນຫາ ແລະ ກູ້ໄພ, ທີມງານຊ່ວຍເຫຼືອທາງດ້ານການແພດ ແລະ ບໍລິການສຸຂະພາບ ແລະ ອື່ນໆ; ມາດຕະການໃນການຄວມຄຸມ/ຕອບໂຕ້ສຸກເສີນ: ການຮັບປະກັນຄວາມປອດໄພ (ຂອງທີມງານເຂົ້າໃຫ້ການຊ່ວຍເຫຼືອຜູປະສົບໄພ ແລະ ຜູ້ທີ່ໄດ້ຮັບຜົນກະທົບຈາກໄພພິບັດ); ການຊ່ວຍເຫຼືອສຸກເສີນແກ່ຜູ້ໄດ້ຮັບຜົນກະທົບໃຫ້ທັນສະພາບການ; ການຊອກຄົ້ນ ຫຼື ຄົ້ນຫາ ແລະ ກູ້ໄພ; ການປະເມີນຜົນເສຍຫາຍ ແລະ ຄວາມຕ້ອງການຮີບດ່ວນເບື້ອງຕົ້ນ; ການຊ່ວຍເຫຼືອບັນເທົາທຸກ; ການຮ້ອງຂໍການຊ່ວຍເຫຼືອ; ການອໍານວຍຄວາມສະດວກໃນການຊ່ວຍເຫຼືອຈາກສາກົນ; ການຄຸ້ມຄອງການຊ່ວຍເຫຼືອ; ການສ້ອມແປງໂຄງລ່າງພື້ນຖານທີ່ຈຳເປັນ; ການປະກາດເປັນເຂດປະສົບໄພພິບັດ; ການປະກາດຍົກເລີກເຂດປະສົບໄພພິບັດ.

ທ່ານ ກິນດາວົງ ຫຼວງຣາຊ ກ່າວຕື່ມວ່າ: ພ້ອມນັ້ນ, ຈະໄດ້ມີມາດຕະການໃນການຟື້ນຟູ: ການປົວແປງຊີວິດການເປັນຢູ່ຂອງຜູ້ປະສົບໄພພິບັດ ແລະ ການບູລະນະສ້ອມແປງ, ກໍ່ສ້າງໂຄງລ່າງພື້ນຖານ ທີ່ຖືກຜົນກະທົບ ຫຼື ໄດ້ຮັບຄວາມເສຍຫາຍຈາກໄພພິບັດ ຄືນສູ່ສະພາບປົກກະຕິ ຫຼື ດີກວ່າເກົ່າ.