ໃຫ້ແກ່ພະນັກງານພາຍໃນ ສພຊ ໂດຍການເປັນປະທານຂອງທ່ານ ນາງ ອຳໄພວອນ ລ້ອມບຸນແພງ ກຳມະການສຳຮອງສູນກາງພັກ ເລຂາທິການສະພາແຫ່ງຊາດ; ມີບັນດາຄະນະກົມ, ຄະນະພະແນກ, ຜູ້ປະສານງານຂອງໂຄງການຈາກກົມ, ສູນ, ຫ້ອງການ ພ້ອມດ້ວຍຜູ້ຕາງໜ້າອົງການຈັດຕັ້ງສາກົນທີ່ເປັນຄູ່ຮ່ວມງານຂອງ ສພຊ, ວິທະຍາກອນ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມຫຼາຍກວ່າ 80 ຄົນ.
ຈຸດປະສົງແມ່ນເພື່ອຝຶກອົບຮົມໃຫ້ແກ່ຜູ້ປະສານງານໂຄງການພາຍໃນສະພາແຫ່ງຊາດ ທີ່ຮັບຜິດຊອບຂຶ້ນແຜນການຮັບໃຊ້ວຽກງານຂອງຕົນໃຫ້ຖືກຕ້ອງ ແລະ ສອດຄ່ອງຕາມລະບຽບກົດໝາຍ, ຍົກສູງຄວາມຮັບຜິດຊອບ ແລະ ສ້າງຂີດຄວາມສາມາດໃຫ້ແກ່ພະນັກງານກົມການເງິນ ແລະ ຜູ້ປະສານງານໂຄງການພາຍໃນ ສພຊ, ແນະນຳລະບຽບການຄຸ້ມຄອງການນຳໃຊ້ງົບປະມານຂອງອົງການຈັດຕັ້ງສາກົນ ແລະ ຂັ້ນຕອນການປະສານງານລະຫວ່າງຜູ້ປະສານງານໂຄງການພາຍໃນ ສພຊ ແລະ ກອງເລຂາຄຸ້ມຄອງແຫ່ງທຶນຊ່ວຍເຫຼືອຂອງສະພາແຫ່ງຊາດ ທັງເປັນການປັບປຸງຂອດການປະສານງານລະຫວ່າງກອງເລຂາຄຸ້ມຄອງແຫຼ່ງທຶນຊ່ວຍເຫຼືອ ແລະ ຜູ້ປະສານງານໂຄງການພາຍໃນ ສພຊ ໃນການນຳໃຊ້ງົບປະມານຂອງລັດ ແລະ ງົບປະມານຈາກອົງການຈັດຕັ້ງສາກົນ ໃຫ້ມີຄວາມສະດວກ, ວ່ອງໄວ, ຖືກຕ້ອງຕາມແຜນການ, ຕາມລະບຽບຫຼັກການ, ເປັນລະບຽບ, ມີຄວາມເປັນເອກະພາບ ແລະ ມີປະສິດທິຜົນສູງຂຶ້ນກວ່າເກົ່າ; ທ່ານ ນາງ ອຳໄພວອນ ລ້ອມບຸນແພງ ໄດ້ມີຄຳເຫັນເປີດກອງປະຊຸມວ່າ: ວຽກງານການເງິນ ເປັນວຽກງານໜຶ່ງທີ່ມີຄວາມສໍາຄັນ ແລະ ເປັນປັດໄຈຕົ້ນຕໍໃນການຂັບເຄື່ອນໃຫ້ບັນດາແຜນການ, ແຜນງານຂອງສະພາແຫ່ງຊາດ ໄດ້ຮັບການຈັດຕັ້ງປະຕິບັດດ້ວຍຜົນສໍາເລັດເປັນຢ່າງດີຕະຫຼອດມາ; ດັ່ງນັ້ນ, ຈຸດປະສົງຂອງກອງປະຊຸມທີ່ມີຄວາມສໍາຄັນດັ່ງກ່າວນີ້ ແມ່ນເພື່ອເປັນການຍົກສູງພາລະບົດບາດການເປັນເສນາທິການທີ່ດີ, ມີຄຸນນະພາບ ໃຫ້ແກ່ຄະນະນໍາຂອງສະພາແຫ່ງຊາດໃນວຽກງານການເງິນ ຮັບປະກັນການປະຕິບັດໃຫ້ຖືກຕ້ອງ, ສອດຄ່ອງກັບລະບຽບຫຼັກການ ເປັນຕົ້ນການຄຸ້ມຄອງນໍາໃຊ້ງົບປະມານລວມຂອງລັດ, ການນໍາໃຊ້ງົບປະມານຂອງອົງການຈັດຕັ້ງສາກົນ, ແຫຼ່ງທຶນຊ່ວຍເຫຼືອຂອງສະພາແຫ່ງຊາດ ລວມໄປເຖິງຂັ້ນຕອນການປະສານງານລະຫວ່າງຜູ້ປະສານງານຂອງບັນດາກົມ, ສູນ, ຫ້ອງການ ກັບ ກອງເລຂາຄຸ້ມຄອງແຫຼ່ງທຶນຊ່ວຍເຫຼືອໃຫ້ແກ່ສະພາແຫ່ງຊາດ. ທ່ານເລຂາທິການສະພາແຫ່ງຊາດ ກ່າວອີກວ່າ: ກອງປະຊຸມຄັ້ງນີ້ ເປົ້າໝາຍເຂົ້າຮ່ວມກໍລ້ວນແລ້ວແຕ່ແມ່ນພະນັກງານຜູ້ທີ່ຖືກມອບໝາຍຮັບຜິດຊອບລົງເລິກໃນການຈັດຕັ້ງປະຕິບັດວຽກງານຕົວຈິງທີ່ມີປະສົບປະການ, ມີຄວາມຮູ້ຄວາມສາມາດ, ມີຄວາມຊຳນານດ້ານວຽກງານການເງິນເປັນຢ່າງດີ ຫວັງຢ່າງຍິ່ງວ່າພາຍຫຼັງສໍາເລັດການຝຶກອົບຮົມແລ້ວ, ບັນດາທ່ານຈະນຳເອົາບົດຮຽນໄປຈັດຕັ້ງປະຕິບັດໃຫ້ເກີດດອກອອກຜົນໃນກົມກອງຂອງຕົນ ໃຫ້ໄດ້ຮັບປະສິດທິຜົນໃນຕໍ່ໜ້າ.
ຜູ້ເຂົ້າຮ່ວມໄດ້ຮັບຟັງການເຜີຍແຜ່ຄຳແນະນຳກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດປະຈຳປີ 2024 ສະບັບເລກທີ 3797/ກງ, ລົງວັນທີ 24 ພະຈິກ 2023; ຂໍ້ຕົກລົງຂອງກະຊວງການເງິນວ່າດ້ວຍການກຳນົດໝາຍການໃຊ້ຈ່າຍງົບປະມານຂອງລັດ, ການປະຢັດ ແລະ ຕ້ານການຟຸ່ມເຟືອຍ ສະບັບເລກທີ 200/ກງ, ລົງວັນທີ 25 ມັງກອນ 2023; ຄຳແນະນຳວ່າດ້ວຍການປະກອບເອກະສານ ແລະ ກວດກາລາຍຈ່າຍງົບປະມານຂອງລັດ ແລະ ທຶນຊ່ວຍເຫຼືອທາງການເພື່ອການພັດທະນາ ຢູ່ຄັງເງິນແຫ່ງຊາດ ສະບັບເລກທີ 0866/ກງ, ລົງວັນທີ 22 ມີນາ 2019; ພາບລວມຂອງການສະໜັບສະໜູນສະພາແຫ່ງຊາດ ແລະ ສະພາປະຊາຊົນຂັ້ນແຂວງ; ຂັ້ນຕອນການປະສານງານ, ການສ້າງແຜນກິດຈະກຳປະຈຳປີ, ແຜນກິດຈະກຳ, ການປະກອບເອກະສານ ເພື່ອຂໍນຳໃຊ້ງົບປະມານຊ່ວຍເຫຼືອ ແລະ ການສະຫຼຸບລາຍງານດ້ານເນື້ອໃນ; ແນະນຳ ແລະ ຝຶກປະຕິບັດຕົວຈິງໃນການສະໜອງເອກະສານຜ່ານ Google Drive ແລະ ສ້າງຟອມປະເມີນຜ່ານ Google Form; ແນະນຳລະບຽບການນຳໃຊ້ງົບປະມານຈາກອົງການຈັດຕັ້ງສາກົນທີ່ເປັນຄູ່ຮ່ວມງານຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ; ແນະນຳກ່ຽວກັບການປະເມີນ ແລະ ການລາຍງານ ກິດຈະກຳ (MEL). ຜູ້ເຂົ້າຮ່ວມຍັງໄດ້ສົນທະນາແລກປ່ຽນບົດຮຽນກັບບັນດານັກວິທະຍາກອນ ພ້ອມທັງດຳເນີນການປະເມີນຜົນຂອງການເຂົ້າຮ່ວມກອງປະຊຸມຜ່ານ Google Form.ກອງປະຊຸມຄັ້ງນີ້ ຈັດຂຶ້ນໃນວັນທີ 7-8 ກັນຍາ ຜ່ານມາ ທີ່ເມືອງວັງວຽງ ແຂວງວຽງຈັນ, ໂດຍໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານຈາກໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຫຼື ສະເຕັບສ (STEPs) ໂດຍຜ່ານກອງເລຂາຄຸ້ມຄອງແຫຼ່ງທຶນຊ່ວຍເຫຼືອໃຫ້ແກ່ສະພາແຫ່ງຊາດ ສົມທົບກັບງົບປະມານຂອງຄະນະເລຂາທິການສະພາແຫ່ງຊາດ.
(ນາງ-ພາບ: ສຸພາວັນ ຫອມສະນິດສພຊ)
ຄໍາເຫັນ