ສຊປລ ຫວນຄືນວັນສ້າງຕັ້ງພັກປະຊາຊົນປະຕິວັດລາວ ແລະ ວັນສໍາຄັນຕ່າງໆຂອງຊາດ

ກົມອົບຮົມຊາວໜຸ່ມ ສູນກາງຊາວໜຸ່ມປະຊາຊົນປະຕິວັດລາວ(ສຊປລ) ຮ່ວມກັບ ຄະນະຊາວໜຸ່ມປະຊາຊົນປະຕິວັດລາວ ນະຄອນຫຼວງວຽງຈັນ ໄດ້ຈັດພິທີປາຖະກະຖາ ເນື່ອງໃນໂອກາດວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 69 ປີ, ວັນຄຽດແຄ້ນຂອງປະຊາຊົນລາວ-ວັນລະນຶກນັກຮົບເສຍອົງຄະ ແລະ ເສຍສະຫຼະຊີວິດເພື່ອປະເທດຊາດ ຄົບຮອບ 78 ປີ ແລະ ວັນສ້າງຕັ້ງຄະນະຊາວໜຸ່ມປະຊາຊົນປະຕິວັດລາວ ຄົບຮອບ 69 ປີ ຂຶ້ນໃນວັນທີ 26 ມີນາ ນີ້ ທີ່ ສຊປລ.ໃຫ້ກຽດປາຖະກະຖາ ໂດຍ ສະຫາຍ  ມອນໄຊ ລາວມົວຊົ່ງ ກໍາມະການສໍາຮອງສູນກາງພັກເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ.ມີບັນດາສະຫາຍ ຄະນະຊາວໜຸ່ມຈາກ ນະຄອນຫຼວງວຽງຈັນ, ຄະນະຊາວໜຸ່ມບັນດາພະແນກການອ້ອມຂ້າງ ນະຄອນຫຼວງວຽງຈັນ, ຊາວໜຸ່ມ-ເຍົາວະຊົນທີ່ມາຈາກ ມ.ສ ໂພນທັນ ເຂົ້າຮ່ວມ.
ໃນການປະຖະກາຖາຄັ້ງນີ້ ເພື່ອເປັນການລະນຶກເຖິງ ວັນຄຽດແຄ້ນຂອງປະຊາຊົນລາວ ວັນລະນຶກນັກຮົບເສຍອົງຄະ ແລະ ເສຍສະຫຼະຊີວິດເພື່ອປະເທດຊາດ ຄົບຮອບ 78 ປີ (ວັນທີ 21 ມີນາ 1946–21 ມີນາ 2024),ຫວນຄືນມູນເຊື້ອໃນການນໍາພາ-ຊີ້ນໍາ ຂອງພັກປະຊາຊົນປະຕິວັດລາວໃນການຕໍ່ສູ້ຕີເອົາຊະນະຈັກກະພັດຕ່າງດ້າວຜູ້ຮຸກຮານ, ມູນເຊື້ອໃນການປົກປັກຮັກສາ, ສ້າງສາພັດທະນາປະເທດຊາດ ຄົບຮອບ 69 ປີ(ວັນທີ 22 ມີນາ 1955 – 22 ມີນາ 2024)ພ້ອມທັງຫວນຄືນມູນເຊື້ອອັນພິລະອາດຫານ ແລະ ຂະບວນການແຫ່ງການເຕີບໃຫຍ່ຂະຫຍາຍຕົວຂອງຄະນະຊາວໜຸ່ມປະຊາຊົນປະຕິວັດລາວ ຄົບຮອບ 69 ປີ (ວັນທີ 14 ເມສາ 1955 – 14 ເມສາ 2024).ນອກນີ້,ຍັງໄດ້ມີກິດຈະກໍາຖາມ - ຕອບ ກ່ຽວກັບສະພາບການຕໍ່ສູ້ຕ້ານພວກລ່າເມືອງຂຶ້ນແບບເກົ່າ ຂອງໜ່ວຍພັກເມືອງທ່າແຂກ ແຂວງຄໍາມ່ວນ, ການກໍາເນີດຂອງພັກປະຊາຊົນປະຕິວັດລາວ ແລະ ການເຕີບໃຫຍ່ຂະຫຍາຍຕົວຂອງຄະນະຊາວໜຸ່ມປະຊາຊົນປະຕິວັດລາວ ເພື່ອຮັບຂອງລາງວັນ.
ຂ່າວ-ພາບ: ສຊປລ