 |
ໃນພິທີ, ສະຫາຍ ມອນໄຊ ລາວມົວຊົ່ງ ໄດ້ຍົກໃຫ້ເຫັນການກໍາເນີດຂອງຄະນະຈັດຕັ້ງສູນກາງພັກ ກໍຄືຂະແໜງຈັດຕັ້ງໃນໄລຍະການປະຕິວັດຊາດ ປະຊາທິປະໄຕ, ຕໍ່ສູ້ຕ້ານການຮຸກຮານຂອງຈັກກະພັດຕ່າງດ້າວທັງແບບເກົ່າ-ແບບໃໝ່ ແລະ ລະບອບສັກດີນາປະຕິການລາວ; ເວລານັ້ນ, ພັກໄດ້ກໍານົດແນວທາງການເມືອງຂອງຕົນໂດຍສຸມໃສ່ປຸກລະດົມ ແລະ ຈັດຕັ້ງກໍາລັງມະຫາຊົນຕໍ່ສູ້ກັບສັດຕູເພື່ອປົດປ່ອຍປະເທດຊາດ. ສະນັ້ນ, ວຽກງານຈັດຕັ້ງກໍ່ສ້າງພັກ ກໍຄືວຽກງານປັບປຸງກົງຈັກການຈັດຕັ້ງຂອງພັກ ພາຍໃຕ້ການຊີ້ນໍາໂດຍກົງ ຂອງສະຫາຍ ໄກສອນ ພົມວິຫານ ເລຂາທິການໃຫຍ່ຂອງພັກ ໄດ້ເປັນເຈົ້າການຜັນຂະຫຍາຍແນວທາງຂອງພັກ ເປັນແນວທາງການຈັດຕັ້ງ ຊຶ່ງເວລານັ້ນມີຊື່ເອີ້ນວ່າ: ຫ້ອງການພະນັກງານທົ່ວປະເທດ.
ຕະຫຼອດ 70 ປີ ບົນເສັ້ນທາງແຫ່ງການເຕີບໃຫຍ່ຂະຫຍາຍຕົວຂອງວຽກງານການຈັດຕັ້ງ, ກໍ່ສ້າງພັກ-ພະນັກງານ, ຄະນະຈັດຕັ້ງສູນກາງພັກ ກໍຄືຂະແໜງຈັດຕັ້ງແຕ່ສູນກາງລົງຮອດທ້ອງຖິ່ນ ນັບແຕ່ໄດ້ສ້າງຕັ້ງຂຶ້ນຈົນເຖິງປັດຈຸບັນ ບໍ່ວ່າໃນເງື່ອນໄຂໃດ ແລະ ສະພາບແວດລ້ອມອັນໃດກໍຕາມ, ການນໍາຂອງຄະນະຈັດຕັ້ງສູນກາງພັກແຕ່ລະຮຸ່ນ, ແຕ່ລະສະໄໝລ້ວນແຕ່ໄດ້ອຸທິດເຫື່ອແຮງສະຕິປັນຍາຂອງຕົນນໍາພາພະນັກງານ, ສະມາຊິກພັກແບກຫາບໜ້າທີ່ວຽກງານທີ່ພັກ ແລະ ປະຊາຊົນມອບໝາຍໃຫ້, ໄດ້ເປັນເສນາທິການຄົ້ນຄວ້າກໍ່ສ້າງພັກທາງດ້ານການ ຈັດຕັ້ງ ປະກອບສ່ວນເຮັດໃຫ້ການຈັດຕັ້ງພັກ, ຖັນແຖວສະມາຊິກພັກ-ພະນັກງານມີຄວາມເຕີບໃຫຍ່ເຂັ້ມແຂງເປັນກ້າວໆມາ ບໍ່ວ່າໃນໄລຍະຕໍ່ສູ້ກູ້ຊາດ ກໍຄືໄລຍະປົກປັກຮັກສາ ແລະ ສ້າງສາພັດທະນາປະເທດຊາດໃນປັດຈຸບັນ. ຄະນະຈັດຕັ້ງສູນກາງພັກ ແລະ ຂະແໜງຈັດຕັ້ງແຕ່ລະຂັ້ນໄດ້ມີຄວາມເຕີບໃຫຍ່ນັບທັງດ້ານຈໍານວນ ແລະ ຄຸນນະພາບ ຊຶ່ງເລີ່ມຈາກມີພະນັກງານພຽງ 13 ສະຫາຍ ໃນເວລາສ້າງຕັ້ງເປັນຫ້ອງການພະນັກງານ, ມາຮອດປັດຈຸບັນປີ 2024 ມີພະນັກງານທັງໝົດ 2,765 ສະຫາຍ ຍິງ 1,137 ສະຫາຍ; ຢູ່ບັນດາກະຊວງ-ອົງການອ້ອມຂ້າງສູນກາງ 909 ສະຫາຍ, ຢູ່ຂັ້ນແຂວງ-ນະຄອນຫຼວງ 482 ສະຫາຍ, ຢູ່ຂັ້ນເມືອງ 1,183 ສະຫາຍ; ສະເພາະແຕ່ຄະນະຈັດຕັ້ງສູນກາງພັກມີພະນັກງານ-ລັດຖະກອນທັງໝົດ 203 ສະຫາຍ ຍິງ 89 ສະຫາຍ; ມີ 8 ໜ່ວຍພັກ, 7 ກົມ ແລະ 1 ຫ້ອງການ.
ຜົນງານທີ່ຄະນະຈັດຕັ້ງສູນກາງພັກ ແລະ ຂະແໜງຈັດຕັ້ງຍາດມາໄດ້ຕະຫຼອດ 70 ປີຜ່ານມາມີຄວາມໝາຍປະຫວັດສາດ ແລະ ໃຫຍ່ຫຼວງທີ່ສຸດ ໃນການປະກອບສ່ວນເຂົ້າໃນພາລະກິດປະຕິວັດຊາດ ປະຊາທິປະໄຕ ຕໍ່ສູ້ຕ້ານການຮຸກຮານຂອງຈັກກະພັດຕ່າງດ້າວ ແລະ ໃນພາລະກິດປົກປັກຮັກສາ-ສ້າງສາພັດທະນາປະເທດຊາດຕາມແນວທາງປ່ຽນແປງໃໝ່ຢ່າງມີຫຼັກການຂອງພັກ ໂດຍສະເພາະວຽກງານກໍ່ສ້າງພັກ-ພະນັກງານ ແລະ ວຽກງານປັບ ປຸງກົງຈັກການຈັດຕັ້ງຂອງພັກໃຫ້ມີຄວາມເຂັ້ມແຂງ, ໜັກແໜ້ນໃນທຸກດ້ານ ຊຶ່ງຜົນງານທັງໝົດນັ້ນໄດ້ສັງລວມມີ 4 ມູນເຊື້ອຂອງຂະແໜງຈັດຕັ້ງຄື: ມູນເຊື້ອແຫ່ງຄວາມຈົງຮັກພັກດີ, ຕັ້ງຕໍ່ບໍລິສຸດຕໍ່ພັກ, ຕໍ່ປະເທດຊາດ, ຕໍ່ປະຊາຊົນ; ມູນເຊື້ອໃນການຢຶດໝັ້ນ ແລະ ປະຕິບັດຖືກຕ້ອງບັນດາຫຼັກການພື້ນຖານດ້ານການຈັດຕັ້ງ ແລະ ການເຄື່ອນໄຫວຂອງພັກ; ວຽກງານຈັດຕັ້ງ-ກໍ່ສ້າງພັກ-ພະນັກງານ ແມ່ນຄວາມຮັບຜິດຊອບໂດຍກົງຂອງຄະນະພັກທຸກຂັ້ນ ໂດຍສະເພາະແມ່ນສະຫາຍເລຂາຄະນະພັກ, ຜູ້ທີ່ເປັນຫົວໜ້າແຕ່ລະຂັ້ນ ແລະ ພະນັກງານຈັດຕັ້ງ ຕ້ອງແມ່ນຜູ້ທີ່ມີຈິນຕະນາການໃໝ່, ຜູ້ທີ່ເປັນແບບຢ່າງທາງດ້ານຄຸນສົມບັດ, ເປັນຜູ້ທີ່ທ່ຽງທໍາ, ພາວະວິໄສ, ບໍ່ເຫັນແກ່ຕົວ ແລະ ຮັກແພງພະນັກງານ ແມ່ນມູນເຊື້ອອັນດີງາມສືບທອດຕໍ່ເນື່ອງຂອງຜູ້ທີ່ເຮັດວຽກງານຈັດຕັ້ງ.
ຂ່າວ: ຍຸພິນທອງ
ຄໍາເຫັນ