ສູນກາງຊາວໜຸ່ມ ປະຊາ ຊົນ ປະຕິວັດລາວ (ສຊປລ) ຮ່ວມກັບຄະນະບໍລິຫານງານຊາວໜຸ່ມນະຄອນ ຫຼວງວຽງຈັນ (ນວ) ໂດຍໄດ້ຮັບການສະໜັບສະໜູນຈາກບໍລິສັດເບຍລາວ ຈຳກັດ ໄດ້ສ້າງຂະບວນການອອກແຮງງານລວມວັນເສົາແດງ ພາຍໃຕ້ຫົວ ຂໍ້: ຊາວໜຸ່ມຍຸກໃໝ່ໃສ່ໃຈ ສ.ສະອາດ ຂຶ້ນໃນຕອນເຊົ້າວັນທີ 10 ກຸມພານີ້ ຊຶ່ງຈັດຂຶ້ນພ້ອມກັນ 5 ເມືອງໃນ ນວ ນຳພາຂະບວນການອອກແຮງງານຄັ້ງນີ້ໂດຍມີທ່ານ ມອນໄຊ ລາວມົວຊົ່ງ ເລຂາຄະນະບໍລິ ຫານງານ ສຊປລ, ທ່ານ ຖະໜອມ ທຳທອງ ປະທານແນວລາວສ້າງຊາດ ຜູ້ຊີ້ນຳອົງການຈັດຕັ້ງມະຫາຊົນ ນວ, ທ່ານ ຫຸມແພງ ສີສົມບັດ ວ່າການເລຂາຄະນະບໍລິຫານງານຊາວໜຸ່ມ ນວ, ມີບັນດາຄະນະນຳເມືອງ 5 ຕົວເມືອງຄື: ເມືອງໄຊທານີ, ເມືອງສີສັດຕະນາກ, ເມືອງຈັນທະບູລີ, ເມືອງສີໂຄດຕະບອງ ແລະ ເມືອງໄຊເສດຖາ ພ້ອມດ້ວຍສະມາຊິກຊາວໜຸ່ມ, ພະນັກງານ-ລັດຖະກອນ, ຄະນະຮັບຜິດຊອບເຂົ້າຮ່ວມ.
ການສ້າງຂະບວນການອອກແຮງງານຄັ້ງນີ້ ເພື່ອຂ່ຳນັບຊົມເຊີຍວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ, ວັນເກີດປະທານ ຄຳໄຕ ສີພັນດອນ ຄົບຮອບ 100 ປີວັນສ້າງຕັ້ງສູນກາງຊາວ ໜຸ່ມ ປະຊາຊົນ ປະຕິວັດລາວ ຄົບຮອບ 69 ປີ ແລະ ວັນສໍາຄັນອື່ນໆຂອງຊາດ-ຂອງພັກໃຫ້ເປັນຂະບວນຟົດຟື້ນ. ພ້ອມທັງເປັນການອະນາໄມ ຮັກສາຄວາມສະອາດ ປະກອບ ສ່ວນເຮັດໃຫ້ຕົວເມືອງມີສະພາບແວດລ້ອມທີ່ດີ, ບັນລຸ 8 ຕົວຊີ້ວັດສະອາດ (ເສັ້ນທາງສະອາດ, ເຄຫາສະຖານສະອາດ, ພາຫະ ນະສະອາດ, ສາທາລະນຸປະໂພກສະອາດ, ໂຮງຈັກ-ໂຮງງານສະອາດ, ການບໍລິ ໂພກສະອາດ, ນໍ້າສະອາດ, ທ້ອງຟ້າສົດໃສ). ເພື່ອຕ້ອນຮັບປີທ່ອງທ່ຽວລາວ 2024 ແລະ ໃນໂອກາດ ສປປ ລາວ ເປັນເຈົ້າພາບຈັດກອງປະຊຸມສຸດຍອດອາຊຽນ ທັງເປັນການປະກອບສ່ວນໃນການຈັດຕັ້ງປະຕິບັດຄຳຂວັນ “ 6 ສ” ຂອງຄະນະພັກ ນວ ວາງອອກ ໂດຍສະເພາະແມ່ນ “ສ ສະອາດ”. ນອກຈາກນີ້ ຍັງເປັນການປະກອບສ່ວນຮັກສາຄວາມສະອາດ; ຮັກ ສາສິ່ງແວດລ້ອມ; ຄວາມສວຍສົດງົດງາມຕາມຖະໜົນທົນທາງ ເພື່ອເປັນການພັດທະນາບ້ານ, ພັດທະນາຊຸມຊົນໃຫ້ມີຄວາມເຂັ້ມແຂງ, ສັງຄົມມີຄວາມສາມັກຄີປອງດອງ, ຍຸຕິທຳ ແລະ ສີວິໄລ. ພາຍຫຼັງສຳ ເລັດແລ້ວຄະນະຮັບຜິດ ຊອບຈະໄດ້ຈັດກອງປະຊຸມເພື່ອຖອດຖອນບົດຮຽນ ແລະ ວາງແຜນປຸກລະດົມທຸກພາກສ່ວນໃຫ້ເຂົ້າຮ່ວມຫຼາຍຂຶ້ນ ເຮັດໃຫ້ກາຍເປັນຂະບວນການທີ່ຍືນຍົງ, ມີປະສິດທິພາບ ແລະ ປະສິດທິພົນ.
(ຂ່າວ-ພາບ: ວັນເພັງ)
ຄໍາເຫັນ