 |
ເນື່ອງໃນໂອກາດວັນປູກຕົ້ນໄມ້ແຫ່ງຊາດ ແລະ ວັນສິ່ງແວດລ້ອມໂລກ ປະຈຳປີ 2026 ນີ້, ທ່ານ ບຸນທາ ຍົມມະລາດ ຫົວໜ້າຫ້ອງການກະສິກໍາ ແລະ ສິ່ງແວດລ້ອມ ເມືອງຕະໂອ້ຍ ແຂວງສາລະວັນ ໄດ້ເປີດເຜີຍວ່າ: ເມືອງຕະໂອ້ຍ ໄດ້ວາງຄາດໝາຍສູ້ຊົນຈະປູກຕົ້ນໄມ້ໃຫ້ໄດ້ທົ່ວເມືອງທັງໝົດ 218,157 ຕົ້ນໃນເນື້ອທີ່ 306 ເຮັກຕາ; ເພື່ອຮອງຮັບແຜນດັ່ງກ່າວ, ທາງຫ້ອງການກະສິກຳ ແລະ ສິ່ງແວດລ້ອມໄດ້ກະກຽມເກັບແກ່ນ ແລະ ກ້າເບ້ຍໄມ້ຈຳນວນ 25 ກິໂລກຣາມ, ລວມມີ 10 ຊະນິດພັນໄມ້ ເຊັ່ນ: ໄມ້ດູ່, ກະຖິນນະລົງ, ໄມ້ໝາກຂາມ, ໄມ້ຍົມຜາ, ໄມ້ຈຳປາປ່າ, ຫວາຍ, ໄມ້ກະເລົາ, ໄມ້ຍີ່ນໍ້າ, ໄມ້ຂະຍຸງ ແລະ ໄມ້ແຕ້ຮໍ ໂດຍໄດ້ແບ່ງຄວາມຮັບຜິດຊອບອອກເປັນ 3 ພາກສ່ວນຄື: ພາກລັດ (ເນື້ອທີ່ 1 ເຮັກຕາ, ຈໍານວນ 1,157 ເບ້ຍ) ປະກອບມີ ໄມ້ດູ່ໃຫຍ່ 6 ຕົ້ນ, ຂະຍຸງ 1 ຕົ້ນ, ໄຮຍອນ 50 ຕົ້ນ, ໄມ້ຈານ 100 ຕົ້ນ, ແຕ້ຮໍ 50 ຕົ້ນ, ໄມ້ດູ່ 300 ຕົ້ນ, ຫວາຍ 100 ເບ້ຍ, ຍົມຜາ 500 ຕົ້ນ ແລະ ກະເລົາ 50 ຕົ້ນ;ພາກເອກະຊົນ 2 ບໍລິສັດ ຄື: ບໍລິສັດ ລາວອາໂກເທັກ ປູກໄມ້ກະຖິນນະລົງ 2,500 ເບ້ຍ ແລະ ໄມ້ຍີ່ນໍ້າ 60,000 ຕົ້ນ; ກຸ່ມບໍລິສັດ ໂຕມຸຫາ (ຫງອກຍູ້ງ) ປູກ 150,000 ເບ້ຍ; ພາກສ່ວນອຸທິຍານແຫ່ງຊາດເຊຊັບ ກໍານົດປູກໃນ 5 ບ້ານເປົ້າໝາຍ (ບ້ານຕຸງແຕ່ງ, ບ້ານດູບ, ບ້ານກະເຕັນ, ບ້ານປະເຕມ ແລະ ບ້ານທົ່ງຊະ) ບ້ານລະ 1,000 ເບ້ຍ, ລວມເປັນ 5,000 ເບ້ຍ.
ເພື່ອແກ້ໄຂເລື່ອງອັດຕາການລອດເຫຼືອຂອງຕົ້ນໄມ້, ທາງເມືອງໄດ້ວາງມາດຕະການຕິດຕາມຢ່າງເຂັ້ມງວດ ເຊິ່ງເຂດຕົວເມືອງ ປູກຕາມແລວເສົາໄຟໂຊລາເຊວ (ສໍສີຂຽວ), ຕ້ອງເຮັດຮົ້ວອ້ອມ ແລະ ມອບໝາຍໃຫ້ບຸກຄົນ, ຄອບຄົວ ຫຼື ຫ້ອງການຮັບຜິດຊອບເບິ່ງແຍງ. ຫາກຕົ້ນໄມ້ຕາຍ ຕ້ອງໄດ້ຊື້ປູກທົດແທນ ໂດຍມີຄະນະຮັບຜິດຊອບລົງກວດກາການເຕີບໂຕເປັນໄລຍະ; ເຂດບ້ານ: ປູກເສີມເພື່ອຟື້ນຟູປ່າຕາມເຂດກັນຊົນຂອງປ່າສະຫງວນແຫ່ງຊາດເຊຊັບ, ໂດຍມອບໃຫ້ຄົນໃນບ້ານເປັນຜູ້ປົກປັກຮັກສາຕາມກົດລະບຽບທີ່ຮ່ວມກັນສ້າງໄວ້.
ນອກຈາກກິດຈະກຳປູກຕົ້ນໄມ້ແລ້ວ, ທາງເມືອງຍັງຈະຈັດກິດຈະກຳອື່ນໆຄວບຄູ່ກັນໄປ ເຊັ່ນ: ການແຂ່ງຂັນກິລາ, ການສັກຢາກັນພະຍາດໃຫ້ເດັກນ້ອຍ ແລະ ກິດຈະກຳວັນສິ່ງແວດລ້ອມໂລກ ເພື່ອສ້າງບັນຍາກາດໃຫ້ຟົດຟື້ນ.
ທ່ານ ບຸນທາ ຍົມມະລາດ ໄດ້ຮຽກຮ້ອງມາຍັງປະຊາຊົນ ແລະ ຊາວເມືອງຕະໂອ້ຍທຸກພາກສ່ວນ ຈົ່ງຮ່ວມແຮງຮ່ວມໃຈກັນ ເຂົ້າຮ່ວມຂະບວນການປູກ ແລະ ບົວລະບັດຮັກສາຕົ້ນໄມ້ໃນຄັ້ງນີ້ ໃຫ້ປະສົບຜົນສຳເລັດຕາມຄາດໝາຍ ພ້ອມກັນສ້າງທ້ອງຖິ່ນໃຫ້ມີສີຂຽວອຸດົມສົມບູນ.
ຂ່າວ: ສີສະຫວາດ
ຄໍາເຫັນ