ທະຫານອາກາດຈະນຳໃຊ້ 4 ຝູງບິນ ປະຕິບັດໜ້າທີ່ບິນໂຊ ສະແດງຢູ່ເທິງດ່ານຟ້າ

ເຫຼົ່າຮົບທະຫານອາກາດ ແມ່ນເຫຼົ່າຮົບໜຶ່ງຂອງກອງທັບປະຊາຊົນລາວ ພາຍໃຕ້ການຊີ້ນໍາ-ນໍາພາໂດຍກົງຮອບດ້ານຂອງຄະນະພັກກະຊວງປ້ອງກັນປະເທດ ໄດ້ຮັບການສ້າງຕັ້ງຂຶ້ນໃນວັນທີ 4 ເມສາ 1970 ຢູ່ເຂດທີ່ໝັ້ນ ເມືອງວຽງໄຊ ແຂວງຫົວພັນ ໃນເວລານັ້ນມີພຽງແຕ່ 1 ກອງຮ້ອຍ ແລະ ຈໍານວນພົນມີແຕ່ປະມານ 100 ຄົນ, ນັບແຕ່ມື້ສ້າງຕັ້ງມາເຖິງປັດຈຸບັນໄດ້ມີການເຕີບໃຫຍ່ຂະຫຍາຍຕົວທາງດ້ານປະລິມານ ແລະ ຄຸນນະພາບ.ດັ່ງນັ້ນ, ການນໍາພັກ-ລັດຂັ້ນເທິງຈຶ່ງໄດ້ເອົາໃຈໃສ່ຈັດຊື້ເຄື່ອງບິນປະກອບໃຫ້ກອງທັບອາກາດເຊັ່ນ: ເຮືອບິນຂັບໄລ່, ເຮືອບິນອາຍພົ່ນ, ເຮືອບິນຫັດແອບຂັ້ນກາງ, ຂັ້ນສູງ ແລະ ເຮືອບິນລໍາລຽງຂົນສົ່ງ, ໜ້າທີ່ຕົ້ນຕໍຂອງກອງທັບອາກາດແມ່ນບິນຫັດແອບກຽມພ້ອມສູ້ຮົບ ແລະ ເຮັດໜ້າທີ່ສູ້ຮົບໂດຍກົງ, ບິນຮັບໃຊ້ການນໍາຂັ້ນສູງພັກ-ລັດ, ບິນຮັບປະກັນໃນເຂດຈຸດສຸມເຂດຊົນນະບົດ ຫຼື ເຂດທຸລະກັນດານ. ນອກຈາກນັ້ນ, ຍັງໄດ້ບິນຂົນສົ່ງລໍາລຽງກໍາລັງພົນ ແລະ ວັດຖຸຍຸດໂທປະກອນຢູ່ທຸກເຂດແຂວງໃນທົ່ວປະເທດ. ສັງເກດເຫັນວ່ານັບແຕ່ມື້ສ້າງຕັ້ງມາຮອດປັດຈຸບັນ, ສາມາດເຮັດສໍາເລັດໜ້າທີ່ທີ່ຂັ້ນເທິງມອບໝາຍໃຫ້.
    ສະຫາຍ ພັນເອກ ພິມມະຈັນ ວົງປັນຍາ ຮອງຜູ້ບັນຊາການທະຫານອາກາດ ຫົວໜ້າຫ້ອງອົບຮົມການບິນທັງເປັນຫົວໜ້າຄະນະຮັບຜິດຊອບການບິນສະແດງສວນສະໜາມຂອງເຫຼົ່າຮົບອາກາດກອງທັບປະຊາຊົນລາວໄດ້ໃຫ້ສໍາພາດວ່າ: ເນື່ອງໃນໂອກາດສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວຄົບຮອບ 75 ປີ, ເຫຼົ່າຮົບທະຫານອາກາດໄດ້ຮັບມອບໝາຍຈາກຂັ້ນເທິງໃຫ້ເອົາເຮືອບິນຈໍານວນໜຶ່ງເຂົ້າຮ່ວມການສະແດງສວນສະໜາມເພື່ອໃຫ້ມວນຊົນເຫັນການເຕີບໃຫຍ່ຂອງກອງທັບອາກາດ, ໃນການເຂົ້າຮ່ວມໃນຄັ້ງນີ້ມີ 4 ຝູງບິນຄື: ຝູງບິນຍົນຫັດແອບຂັ້ນຕົ້ນ, ຝູງບິນຍົນຂຶ້ນຊື່, ຝູງບິນອາຍພົ່ນຫັດແອບ, ຍັກ 130 ເປັນເຄື່ອງບິນສູ້ຮົບທັງເປັນເຄື່ອງບິນຫັດແບບຂັ້ນສູງຫຼັງຈາກບິນເປັນຝູງແລ້ວຈະມີຍົນຍັກ 130 ໜຶ່ງລໍາປະຕິບັດບິນໂຊ ແລະ ສະແດງຢູ່ເທິງດ່ານຟ້າ. 
    ສະຫາຍ ພັນເອກ ພິມມະຈັນ ວົງປັນຍາ ໃຫ້ຮູ້ຕື່ມວ່າ: ພິເສດປີນີ້ຈະມີທີມເຄື່ອງບິນກອງທັບອາກາດປະຊາຊົນຈີນນົກເຂົາແດງຈະມາຮ່ວມສ້າງບັນຍາກາດໃນໂອກາດສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວຄົບຮອບ 75 ປີໂດຍຈະນໍາໃຊ້ເຄື່ອງບິນອາຍພົ່ນ GL8 ຈໍານວນ 9 ລໍາ ບິນສະແດງໂຊຢູ່ເທິງຟ້າໃຫ້ມວນຊົນໄດ້ຊົມ.
ຂ່າວ-ພາບ: ລຸນທອງ